ជៀសវាងត្រូវគេស្អប់ដោយមិនដឹងខ្លួន អ្នកគួរតែប្រយ័ត្នចំពោះកាយវិការទាំងនេះ

2017-08-25 02:23:06
ចំនួនមតិ 0 | ចំនួនចែករំលែក 0

មនុស្សម្នាក់ៗតែងមានកាយវិការរាងៗខ្លួនក្នុងការប្រាស្រ័យទាក់ទងគ្នា ហើយពេលខ្លះអ្នកប្រហែលមិនចាប់អារម្មណ៍ផងក៏មិនដឹង។ ប៉ុន្តែកុំភ្លេចថាមនុស្សដែលអ្នកកំពុងនិយាយជាមួយគេតែងកត់ចំណាំវាជានិច្ច។ ខាងក្រោមនេះគឺជាកាយវិការមិនល្អមួយចំនួនក្នុងទំនាក់ទំនងដែលអ្នកគួរជៀសវាង៖

១. កាយវិការច្រងេងច្រងាងជ្រុល

គឺជាការលើដៃ ឬលាដៃហួសហេតុពេលអ្នកកំពុងនិយាយអ្វីមួយដែលមើលទៅដូចជាមិនគួរឲ្យទុកចិត្តសោះបើទោះបីអ្វីដែលអ្នកនិយាយជាការពិតក៏ដោយ។

២. ខ្វែងដៃ

គួរប្រយ័ត្នចំពោះកាយវិការនេះព្រោះវាធ្វើឲ្យដៃគូសន្ទនាមានអារម្មណ៍ថាអ្នកមិនទទួលយកនូវអ្វីដែលគេកំពុងនិយាយទេទោះអ្នកមិនបានតាំងចិត្តក៏ដោយ។

៣. សម្ដីនិងកាយវិការមិនស៊ីគ្នា

វានឹងធ្វើឲ្យគេគិតថាអ្នកកំពុងបិទបាំងរឿងអ្វីមួយហើយ។ បន្ទាប់ពីនោះមក តិចឬច្រើន ភាពមិនទុកចិត្តគ្នានឹងកើតឡើងមិនខាន។

៤. អង្គុយកោងខ្នងផ្អែកទៅកៅអី៖

ដូចជាក្នុងពេលប្រជុំជាដើម។ ចំពោះចៅហ្វាយអ្នក កាយវិការនេះអាចបង្ហាញច្បាស់ជាងសម្ដីទៅទៀងថាអ្នកកំពុងធុញនឹងការងារហើយ។

៥. ក្រសែភ្នែក

បើអាច អ្នកគួរតែជៀសវាងងាកឆ្វេងស្ដាំជ្រុលពេកពេលកំពុងស្ដាប់នរណាម្នាក់ព្រោះគេនឹងចាត់ទុកថាអ្នកមិនយកចិត្តទុកដាក់។ ម្យ៉ាងទៀតអ្នកក៏មិនគួរសម្លឹងខ្លាំងជ្រុលពេកដែរជាពិសេសទៅកាន់ដៃគូភេទផ្ទុយគ្នាព្រោះគេអាចគិតរឿងផ្សេងទៅវិញ។

៦. ទៅជិតជ្រុល៖

ការរក្សាគម្លាតក៏ជារឿងសំខាន់ណាស់ដែរព្រោះបើទៅជិតពេក ឬនៅឆ្ងាយពេកវាជាសញ្ញាថាអ្នកមិនបានបង្ហាញការគោរពចំពោះគេទាល់តែសោះ។ គួររក្សាគម្លាតឲ្យត្រឹមត្រូវ។