ឌី សាវ៉េត បង្ហើបពីតិចនិកថែរក្សាសម្រស់ងាយៗសោះ តែលទ្ធផលអស្ចារ្យ (វីដេអូ)

2017-08-08 07:08:04
ចំនួនមតិ 0 | ចំនួនចែករំលែក 0

មិនគួរឱ្យជឿទេថា សម្រស់ដ៏ស្រស់ស្អាតតាំងពីក្មេង រហូតមកដល់វ័យចំណាស់ និងសុខភាពដ៏រឹងមាំរបស់អ្នកស្រី ឌី សាវ៉េត គឺប្រើតាមវិធីងាយយ៉ាងនេះសោះ។

មានមនុស្សមិនតិចទេដែលថាអ្នកស្រី ឌី សាវ៉េត បានទៅកែសម្ផស្សដើម្បីធ្វើឱ្យមុខនៅតែស្រស់ស្អាត តែផ្ទុយទៅវិញកុំថាឡើយកែសម្ផស្ស សូម្បីតែជាតិឡេតែបន្តិចក៏មិនបានប៉ះសាច់អ្នកស្រីឡើយ។

តារាសម្ដែងដ៏មានប្រជាប្រិយភាពតាំងពីអំឡុងទសវត្សរ៍៦០ រហូតមកដល់ពេលបច្ចុប្បន្នរូបនេះបាន ប្រាប់ Sabay ថា ការថែរក្សាសុខភាព និងសម្រស់របស់អ្នកស្រី គឺគ្រាន់តែពឹងទៅលើការទទួលទានអាហារប្រចាំថ្ងៃតែប៉ុណ្ណោះ។ តារាទឹកភ្នែករូបនេះបន្ថែមថា ខ្លួនមិនទទួលទានអាហារផ្ដេសផ្ដាសតាំងតែពីក្មេងមកម្ល៉េះ ។ អ្នកស្រីទទួលស្គាល់ថាតាំងពីតូច មុននឹងញ៉ាំអ្វីអ្នកស្រីរើសណាស់ធ្វើយ៉ាងណាអាហារនោះត្រូវតែមានអនាម័យ និងត្រូវប្រាកដថាវាមានជីវជាតិគ្រប់គ្រាន់ទៅដល់រឿងកាយ។

“បើយើងចង់បានសុខភាពល្អចង់ឱ្យកម្លាំងយើងនៅតែរឹងមាំ គំនិតបញ្ញានៅតែចងចាំសំខាន់យើងត្រូវរកម្ហូបអាហារ ដែលយើងទទួលទានហ្នឹងឱ្យមានជាតិវីតាមីនគ្រប់គ្រាន់។ ខ្ញុំដឹងថាខ្លួនត្រូវញ៉ាំអីជួនកាលខ្ញុំអត់ចាំបាច់ញ៉ាំបាយកន្លះថ្ងៃក៏បាន គ្រាន់តែញ៉ាំនំប៉័ង ឬស៊ុបបន្លែ។ មិត្តខ្ញុំប្រាប់ថាធ្វើតាមខ្ញុំអត់បានទេ ខ្ញុំញ៉ាំទឹកសុទ្ធ ឬទឹកតែលាយជាមួយទឹកឃ្មុំ ហើយមិត្តភ័ក្ដិគេទិញឡេមកពីបារាំង អាមេរិក អូស្ត្រាលី មកផ្ញើតែខ្ញុំអត់ទម្លាប់លាប”។

សូមបញ្ជាក់ថា អ្នកស្រី ឌី សាវ៉េត បានប្រឡូកក្នុងខ្សែភាពយន្តតាំងពីឆ្នាំ១៩៦០ រហូតមកដល់ពេលបច្ចុប្បន្ន ដោយសម្ដែងបានប្រមាណជាង ១០០រឿង។ អ្នកស្រីមានភាពល្បីល្បាញតាំងពីក្នុងអំឡុងទសវត្ស៦០រហូតមកដល់ពេលបច្ចុប្បន្ន ហើយភាពល្បីល្បាញនេះគឺមិនត្រឹមតែនៅក្នុងប្រទេសនោះទេ តែថែមទាំងនៅលើឆាកអន្តរជាតិថែមទៀតផង។ បច្ចុប្បន្នតារាល្បីគ្រប់រដូវកាលរូបនេះ មានអាយុ ៧៣ឆ្នាំហើយ៕