៦ វិធីអាចកែប្រែខ្លួនមនុស្សស្រីពូកែអៀន ទៅជាមនុស្សស្រីដ៏រឹងមាំម្នាក់

2017-07-29 05:00:00
ចំនួនមតិ 0 | ចំនួនចែករំលែក 0

នារីដែលមានការអៀនខ្មាសច្រើន មិនសូវបញ្ចេញកាយវិការ ឬពាក្យសម្ដីខ្លាំងៗរបៀបជឿជាក់លើខ្លួនឯងទេ។ ដូចនេះហើយដើម្បីកែប្រែខ្លួនឲ្យមានរឹងមាំ កញ្ញា សូមណែនាំមិត្តៗនារីឲ្យធ្វើតាមវិធីទាំង ៦ ដូចខាងក្រោមនេះ៖

១.ផ្លាស់ប្ដូរខ្លួនឯងជាមុន៖ សូមព្យាយាមផ្លាស់ប្ដូររូបរាងរបស់អ្នកដោយទៅហាងកែសម្ផស្សដើម្បីប្ដូរពីម៉ូដ ឬពណ៌សក់ថ្មី ពិសេសស្ទីលស្លៀកពាក់តែម្ដង។ ប្រសិនបើពីមុនជាមនុស្សមិនចេះតុបតែងខ្លួន គួរចាប់ផ្ដើមជាមួយការតុបផាត់មុខស្រាលៗបែបធម្មជាតិសិន។

រូបតំណាង

**២.នៅពីមុខកាមេរ៉ា**៖ មនុស្សស្រីពូកែអៀនមិនសូវថតរូបឡើយ ដូចនេះគួរ ព្យាយាមថតរូប selfie ឬឲ្យមិត្តភ័ក្ដិជួយថតក៏បាន។ បើមិនទាន់ហ៊ានគួរតែនៅជិតៗពួកគេ ពេលឃើញគេទាញទូរស័ព្ទមកថត។ បែបនេះយូរៗទៅនឹងក្លាហានថតរូបខ្លួនឯងគ្រប់ស្ទីលបង្ហោះអួតគេ។

៣.សាកចេញទៅដើរលេងយប់៖ មិនមែនមនុស្សស្រីលេងយប់អាក្រក់នោះទេ តែពួកគេគ្រាន់តែចង់ស្វែងយល់ និងរៀនពីអ្វីដែលថ្មីប៉ុណ្ណោះ។ ដូចនេះទៅញ៉ាំអីជាមួយមិត្តភ័ក្ដិពេលយប់ព្រលប់ខ្លះ ដើម្បីឲ្យខ្លួនឯងស្គាល់ និងដឹងនូវរឿងរ៉ាវដែលកើតឡើងនាពេលយប់ខ្លះ។

៤.កុំព្យាយាមគេចចេញពីខ្សែភ្នែកមនុស្សប្រុស៖ សម្រាប់មនុស្សប្រុសបើយើងកាន់តែអៀន គេកាន់តែហ៊ានលែបខាយ និងបៀតបៀន។ ដូចនេះបើដើរកាត់ហ្វូងបុរសកុំធ្វើខ្លួនរញីរញ័រអី តែត្រូវដើរពើងទ្រូង ភ្នែកសម្លឹងទៅឲ្យត្រង់ ទើបពួកគេញញើតវិញ។

៥.និយាយដោយទំនុកចិត្ត៖ មនុស្សស្រីអៀនពេលនិយាយមិនហ៊ានមើលមុខគេឡើយ។ ដូចនេះអ្នកត្រូវហាត់និយាយនៅចំពោះមុខកញ្ចក់ ហើយពេលជួបសន្ទនាជាមួយអ្នកដទៃគួរមើលឲ្យចំកែវភ្នែកគេវិញ។

៦.គ្រប់គ្រងអារម្មណ៍អៀនខ្មាសខ្លួនឯង៖ ទោះជាជួបរឿងគួរឲ្យអាម៉ាស់ខ្លាំងក៏ដោយ ត្រូវគ្រប់គ្រងអារម្មណ៍កុំឲ្យច្របូកច្របល់។ បន្ទាប់មកសម្រួលធ្វើទឹកមុខធម្មតា កុំឲ្យគេមើលដឹងថាយើងកំពុងខ្វាយខ្វល់៕