រឿង ៦ យ៉ាងសំខាន់ៗ មនុស្សស្រីគួរធ្វើឲ្យបានសិន ចាំយកប្ដី

2017-07-13 02:48:29
ចំនួនមតិ 0 | ចំនួនចែករំលែក 0

ស្ត្រីក្រោយពេលរៀបការហើយ មិនអាចធ្វើអ្វីតាមតែចិត្តចង់របស់ខ្លួនឯងឡើយ ដូចនេះយើងគួរធ្វើរឿងដ៏មានន័យសម្រាប់ជីវិតសិនចាំរៀបការក៏មិនទាន់យឺតពេលដែរ។ ៦ យ៉ាងមនុស្សស្រីគួរតែធ្វើ ឲ្យបានមុនពេលមានប្ដី ដើម្បីកុំឲ្យស្ដាយក្រោយ៖

១.បានដើរលេងនៅក្រៅប្រទេស

យ៉ាងហោចណាស់ក៏ទៅបរទេសឲ្យបានម្ដងដែរមុនរៀបការ កុំឲ្យគេថាយើងមិនស្គាល់ពីពិភពខាងក្រៅស្រស់ស្អាតប៉ុណ្ណា។ ស្ត្រីណាក៏ប្រាថ្នារឿងនេះឡើយ តែកុំបណ្ដោយឲ្យនោះត្រឹមជាក្ដីស្រមៃអី គួរធ្វើវាឲ្យក្លាយជាការពិតមុនរៀបការ ព្រោះក្រោយមានគ្រួសារអាចនឹងគ្មានឱកាសចេញក្រៅទេ។

២.បញ្ចប់ការសិក្សាថ្នាក់បរិញ្ញាបត្រ

មនុស្សស្រីកុំអាលគិតគូររឿងប្ដីសីអី តែគួរគិតពីការសិក្សាឲ្យបានជ្រៅជ្រះជាមុនសិន ដោយក្នុងជីវិតយើងនេះគួរមានសញ្ញាប័ត្រថ្នាក់បរិញ្ញាបត្រមួយសន្លឹកទុកជាដើមទុនក្នុងការងារ ឬរកស៊ី។ ម្យ៉ាងទៀតបើអាចគួរបន្តទៅថ្នាក់អនុបណ្ឌិតរឹតតែល្អ ព្រោះយើងនឹងក្លាយជាស្ត្រីមានចំណេះដឹងខ្ពង់ខ្ពស់។

៣.ធ្វើការងារសង្គម

មុនពេលមានគ្រួសារ យើងគួរតែស្វែងយល់ពីបញ្ហាក្នុងសង្គមឲ្យបានច្រើន ហើយចូលរួមស្ម័គ្រចិត្តធ្វើការងារមនុស្សធម៌។ បែបនេះស្ត្រីអាចស្វែងយល់ពីបញ្ហាជាច្រើនដែលនឹងកើតឡើងក្រោយមានគ្រួសារ និងអាចត្រៀមខ្លួនដោះស្រាយបញ្ហាដែលកើតបានក្នុងជីវិតប្ដីប្រពន្ធ។

៤.មានមិត្តភ័ក្ដិថ្មីៗឲ្យបានច្រើន

យើងគួរតែបើកឱកាសឲ្យខ្លួនឯងបានសេពគប់មិត្តភ័ក្ដិថ្មីៗទាំងប្រុសស្រីថ្មីៗឲ្យបានច្រើន ហើយមុននឹងរាប់អានគួរតែពិនិត្យពិច័យឲ្យបានគ្រប់ជ្រុងជ្រោយ។

៥.មានការងារ ឬមុខរបរជាក់លាក់

ស្រីៗកុំរំពឹង និងផ្ដេកផ្ដួលលើគំនិតថា «ក្រោយរៀបការមានប្ដីចិញ្ចឹមហើយ» ព្រោះវាមិនត្រឹមត្រូវឡើយ។ មុនពេលមានប្ដី គ្រប់ស្ត្រីគួរតែមានការងារសមរម្យ ឬមុខរបរជាក់លាក់ ដើម្បីមានប្រាក់កាក់ចាយវាយផ្ទាល់ខ្លួន ហើយបែបនេះ ស្វាមីក៏មិនហ៊ានមើលងាយដែរ។

៦.មានទំនួលខុសត្រូវ

ចំណុចនេះពិតជាសំខាន់ណាស់ ព្រោះបើក្នុងខ្លួនគ្មានរបស់នេះទេ គេអាចនឹងដៀលដល់គ្រួសារយើងតែម្ដង។ ព្រោះតែបែបនេះហើយទើបការមានគ្រួសារមិនមែនជារឿងលេងសើចទេ ដូចនេះតម្រូវឲ្យយើងត្រូវរៀនមានទំនួលខុសត្រូវច្បាស់លាស់ ចាំរៀបការក៏មិនយឺតពេលដែរ៕

ចុចអាន៖២០មេរៀនចាំបាច់ក្នុងជីវិតធ្វើការដែលគ្មានសាលាណាបង្រៀនអ្នក

ប្រភព៖ thoughtcatalog ប្រែសម្រួល៖ ទ្រី រ៉ាវី