ស្រីៗ ប្រយ័ត្នប្រុសៗប្រើតិចនិកនេះ បោកស្នេហ៍តាមអនឡាញ

2017-07-07 01:51:34
ចំនួនមតិ 0 | ចំនួនចែករំលែក 0

មនុស្សសម័យថ្មីអាចទាញប្រយោជន៍បានច្រើនពីអនឡាញ ដោយក្នុងនោះមានទាំងការបង្កើតទំនាក់ទំនងស្នេហាទាំងស្មោះ ទាំងបោកប្រាស់ទៀតផង។ ថ្ងៃនេះ កញ្ញា សូមបង្ហាញជូននូវតិចនិកមួយចំនួន ដែលមនុស្សប្រុសអាចប្រើប្រាស់បណ្តាញសង្គម ធ្វើឲ្យមនុស្សស្រីបាក់ចិត្តស្រឹបបាន។

១. រូបថត Hot Hot

ដាក់រូបថតសិចស៊ីធ្វើឲ្យស្រីៗឃើញហើយ ចង់ក្តៅខ្លួន។ ជួនកាល រូបនោះអាចជារូបពិត ប៉ុន្តែពេលខ្លះ រូបនោះគ្រាន់តែ Edit ដែលខុសពីការពិត។

២. លេងសម្តីផ្អែម និងផ្ញើរូបថតក្នុង Chat

ផ្ញើសារមក ហៅសុទ្ធតែអូនឡើងផ្អែមរលួយ ហើយដាក់ Sticker សុទ្ធតែរូបបេះដូង ធ្វើឲ្យស្រីៗមើលហើយលួចញញឹម។ ក្រៅពីនោះ គេចូលចិត្តផ្ញើរូបសកម្មភាពរបស់គេ ពេលកំពុងធ្វើអ្វីមួយ ដើម្បីឲ្យអ្នកមានអារម្មណ៍ថា គេចង់ឲ្យអ្នកដឹងពីគេគ្រប់ពេល។ ហើយបើដឹងថាអ្នកចូលចិត្តមើលអី្វមួយ គេដឹងតែ Copy រូប ឬ វីដេអូហ្នឹង ផ្ញើមកស្ទើររាល់ថ្ងៃ ធ្វើដូចស្រលាញ់អ្នកខ្លាំងណាស់។

៣. ធ្វើដូចយកចិត្តទុកដាក់ណាស់

Chat ឬ Comment លើរូបថតរបស់អ្នកឥតល្ហែ។ កុំឲ្យតែឃើញអ្នកផុសអី ដឹងតែចូលទៅសួរនាំរហូត។ ហើយបើក្នុង Chat វិញ ងើបព្រឹកឡើងដឹងតែសួរហើយ ថាបាយទឹកហើយនៅ? យប់មិញ គេងលក់ស្រួលអត់? មានគេងយប់សប្តិឃើញគេអត់?

៤. បញ្ចោរ ឬសរសើរ

មិនថាអ្នកផុសរូបអីទេ គឺចូលទៅ Like ហើយ Comment សរសើររហូត។ ហើយរាល់ថ្ងៃ តែងតែសរសើរពីរូបសម្រស់របស់អ្នក។ ធម្មតា ប្រុសព្រានគេដឹងណាស់ថា ស្រីៗចូលចិត្តពាក្យសរសើរ ដូច្នេះគ្រាន់តែឮពាក្យបែបនេះ អ្នកនឹងមិនគិតច្រើន ហើយគិតថាគេប្រហែលជាពេញចិត្តអ្នកមែនទែនហើយ។

៥. ចូលចិត្តអួត

អួតពីការងារ ឬការរកស៊ី ហើយអួតគ្រប់រឿង ដើម្បីបង្ហាញអ្នកថា គេជាបុរសដ៏ល្អឥតខ្ចោះម្នាក់។

៦. ធ្វើដូចអ្នកជាសង្សាររបស់គេហើយអ៊ីចឹង

ប្រច័ណ្ឌហួងហែង ធ្វើដូចបានប្រកាសស្នេហ៍ជាមួយគ្នាហើយអ៊ីចឹង។ ហើយបើផុសអី គឺចូលចិត្ត Tag ឲ្យអ្នកគ្រប់ពេល។ ពិសេស គឺចូលចិត្តនិយាយថា ខ្លួនគេឯកាណាស់ ត្រូវការអ្នកកំដរ ខ្លួនគេតាំងពីដើមមកមិនដែលមានស្នេហាទេ ឬក៏ធ្លាប់មានស្នេហាដែរ តែមិនដែលជួបនារីណាម្នាក់ដែលយល់ចិត្តគេដូចអ្នកឡើយ។

៧. អូសក្រឡាចង់ Video Call ជាមួយអ្នក

ចង់ឲ្យអ្នកនិយាយគ្នា មើលមុខគេផ្ទាល់ ហើយតាំងសួរនាំរឿងស៊ីជម្រៅ ឬខ្លួនគេធ្វើសកម្មភាពមិនសូវសម ដូចជាដោះអាវនិយាយជាមួយអ្នក ឬក៏និយាយជាមួយអ្នកពីក្នុងបន្ទប់ទឹកជាដើម។

៨. ណាត់ទៅជួបនៅកន្លែងស្ងាត់

មានគំនិតចង់តែទៅកន្លែងស្ងាត់ ថាស្រួលនិយាយគ្នា ព្រោះទើបតែជួបមុខគ្នាថ្មីថ្មោងបែបហ្នឹង ខ្លាចខ្មាសគេ។ មិនត្រឹមតែប៉ុណ្ណោះ សំណូមពរឲ្យអ្នកស្លៀកពាក់សិចស៊ី ដោយយកលេសថា រាងរបស់អ្នកបើស្លៀកបែបនេះទើបសម។

បើអ្នកជួបបុរសដែលទាក់ទងអ្នកតាមអនឡាញប្រភេទនេះ អ្នកគួរតែស៊ើបមើលឲ្យបានម៉ត់ចត់ជាមុនសិន មុននឹងដាក់ចិត្តជឿជាក់ ហើយប្រគល់ក្តីស្រលាញ់១០០ភាគរយដល់គេ។ ជាពិសេស គឺកុំទាន់អាលសន្យាអ្វីជាមួយគេឲ្យសោះ។ ប្រសិនបើគេណាត់ជួប គួរតែស្នើរឲ្យទៅកន្លែងគួរសម មិនមែនកន្លែងដែលអ្នកមិនស្គាល់ មិនមែនពេលយប់ ហើយក៏មិនមែនជាកន្លែងស្ងប់ស្ងាត់នោះដែរ៕

ចុចអាន៖ ស្រលាញ់អ្នកណាក៏បាន ឲ្យតែមិនមែនជាបុរសមានគ្រួសារហើយ

អត្ថបទ៖ ផល សុខភារី