៨យ៉ាងគួរដឹង កុំឱ្យមានបញ្ហា ពេលលេងបណ្ដាញសង្គម

2017-07-03 07:11:05
ចំនួនមតិ 0 | ចំនួនចែករំលែក 0

បណ្ដាញសង្គមបានក្លាយជាវិធីទាក់ទងគ្នារបស់មនុស្សសម័យថ្មី។ មិនថាអ្នកនៅទីណា ពេលណាវានឹងជួយឱ្យការប្រាស្រ័យជាមួយមិត្តភ័ក្ដិ ឬក្រុមគ្រួសារមានភាពប្រសើរ និងរហ័សជាងមុន។ ប៉ុន្តែទន្ទឹមនឹងនេះ ទំនាក់ទំនងមួយនេះក៏អាចជាគ្រោះថ្នាក់សម្រាប់ចំណងមិត្តភាពរបស់អ្នកផងដែរ បើអ្នកមិនបានយកចិត្តទុកដាក់លើចំណុចតូចៗមួយចំនួន។

១. ប្រយ័ត្នប្រយែងក្នុងការផ្ញើសារ ឬ Chat

ការសរសេរសារ ឬឆាត វាពិតជាលឿនមែន គ្រាន់តែចុះ Send វាក៏ទៅតែម្តង។ ដូច្នេះ យើងគួរតែប្រុងប្រយ័ត្ន ក្នុងការប្រើសម្តីក្នុងឆាតទាំងនោះ ឬយើងអាចពិនិត្យមើលឡើងវិញ មុនពេលចុចផ្ញើ ព្រោះថាសារដែលចេញទៅហើយ យើងមិនអាចលុបចេញវិញនោះទេ។

២. មើលឱ្យច្បាស់ មុន Reply

ការផ្ញើសារ ជួនកាលវាមិនច្បាស់ដូចការនិយាយផ្ទាល់នោះទេ ដូច្នេះបើគេផ្ញើមកមានបាត់ ឬលើស ពាក្យណាមួយ វាអាចធ្វើឲ្យឃ្លានោះ មើលទៅក្លាយជាឈ្លើយ។ យើងមិនគួរឆ្លើយតបទាំងខឹងនោះទេ សួរគេបញ្ជាក់សិនទៅ ក្រែងលោគេមិនមានន័យបែបហ្នឹង។

៣. កុំតាមតែគេពេក

អ្នកខ្លះប្រើបណ្ដាញសង្គមដើម្បីលេងសើច ឬចំអកចំអន់ទៅកាន់នរណាម្នាក់។ អ៊ីចឹងហើយ មុនសម្រេចចិត្ត Share ឬ Comment គួរតែពិចារណាពីសាច់រឿងនោះសិន ហើយបើគិតមិនចេញទេ ក៏មិនបាច់បញ្ចេញសកម្មភាពអ្វីតែម្តងទៅ។ បើយើងចេះតែតាមគេពេក អ្នកដទៃ ឬមិត្តភ័ក្តិរបស់យើងអាចវាយតម្លៃថា យើងមិនសូវចេះគិតបានច្រើន។

៤. ចេះលាក់ការសម្ងាត់ផ្ទាល់ខ្លួន

ត្រូវចេះពីរបៀបលាក់បាំងការសម្ងាត់ផ្ទាល់ខ្លួន (Privacy and Security Controls) ដើម្បីជាប្រយោជន៍ កុំឲ្យអ្នកដទៃយកប្រវត្តិរូបរបស់យើងទៅប្រើប្រាស់លើរឿងមិនល្អអ្វីមួយ។

៥. ហ៊ានបញ្ចេញមតិតបតវិញ

បើនរណាម្នាក់ផ្ញើសារមកអ្នកមិនសមរម្យ អ្នកអាចស្នើឲ្យគេឈប់។ ប៉ុន្តែបើគេនៅតែមិនបញ្ឈប់ អ្នកអាចជ្រើសយកវិធីណាមួយក្នុងបណ្តាញសង្គម ដូចជា Unfriend, Unfollow ឬ Block គេចោលបាន។ គួរចៀសឱ្យបាន ការតបតគ្នាដោយប្រើពាក្យសម្ដីមិនសមរម្យ ឬជេរប្រទេចគ្នា តាមបណ្ដាញសង្គម ព្រោះវានឹងធ្វើឱ្យប៉ះពាល់មិត្តភាពផង និងបាត់បង់តម្លៃរបស់ខ្លួនយើងផង។

៦. ប្រយ័ត្នចំពោះរូបភាពទាក់ទាញតាមបណ្ដាញសង្គម

តាមការស្ទង់មតិមួយបានរកឃើញថា មនុស្សស្រី៧៤ភាគរយចូលចិត្តប្រើរូបភាពទាក់ទាញបង្ហោះលើបណ្តាញសង្គម ជាជាងការប្រើប្រាស់រូបភាពពិត។ បើដូច្នេះ អ្នកប្រហែលជាពិបាករកមិត្តភក្តិ ឬ ដៃគូស្នេហាឲ្យស្មោះត្រង់ណាស់ ព្រោះពួកគេទំនងជាលង់ស្នេហ៍តែលើភាពស្រស់ស្អាតរបស់អ្នកច្រើនជាង។

៧. កុំដាក់រូបសិចស៊ីជ្រុលពេក

ការដាក់ ឬបង្ហោះរូបភាពសិចស៊ីជ្រុលពេក អាចចំណេញដល់ជនខិលខូចមួយចំនួន ដែលអាចយករូបរបស់អ្នកទៅធ្វើអ្វីផ្សេង ហើយធ្វើឲ្យអ្នកបាត់បង់កិត្តិយស និងសេចក្តីថ្លៃថ្នូរ។

៨. ទុកពេលសម្រាកសម្រាប់ខ្លួនឯង

កុំអន់ចិត្តពេលឃើញរូបខ្លួនឯងមិនទទួលបាន Likes, Comment ឬ Share ច្រើន ហើយចេះតែផុស ឬអង្គុយចាំ Notification នោះ។ ធ្វើបែបនេះ អ្នកមិនត្រឹមតែរវល់ គ្មានពេលសម្រាកទេ តែថែមទាំងធ្វើឲ្យអ្នកគិតខ្វល់ខ្វាយ អារម្មណ៍មិនស្ងប់ទៀត។ ដូចនេះ សូមកុំយកចិត្តទុកដាក់លើវាថាសំខាន់ពេក!

ប្រភព៖ girlshealth

ប្រែសម្រួល៖ ភារី