ប្រពៃណីប្លែកៗទាក់ទងនឹងកូនក្រមុំនៅតាមប្រទេសមួយចំនួនដែលអ្នកមិនដឹង

2017-06-28 06:25:23
ចំនួនមតិ 0 | ចំនួនចែករំលែក 0

ថ្ងៃរៀបការគឺជាពេលដ៏សប្បាយរីករាយក្នុងជីវិតស្ត្រីទាំងឡាយ។ វាជាពេលដែលគេត្រូវប្ដូរឈ្មោះទៅជាភរិយា និងត្រូវមានគ្រួសារមួយដោយខ្លួនឯង។ ពិធីរៀបការតែងខុសគ្នាទៅតាមប្រទេសនីមួយៗដោយក្នុងនោះក៏មានពិធីប្លែកៗមួយចំនួនដែលអ្នកមិនធ្លាប់ដឹងផងដែរ៖

១. ជប៉ុន៖ ជាប្រពៃណី កូនក្រមុំមិនមែនត្រឹមតែត្រូវស្លៀកពាក់ kimono (ឈុតប្រពៃណីសម្រាប់ស្ត្រី) ប៉ុណ្ណោះទេ តែពេលខ្លះត្រូវលាបខ្លួនពណ៌សពីក្បាលដល់ចុងជើងទៀតផងដើម្បីបង្ហាញពីភាពបរិសុទ្ធរបស់ខ្លួន។ ជួនកាលគេក៏ពាក់ក្បាំងពណ៌សពីលើក្បាលដែរ។

២. ឥណ្ឌា៖ ការប្រារព្ធពិធីអាចមានការប្រែប្រួលទៅតាមតំបន់ និងសាសនានីមួយៗ តែអ្វីដែលគួរឲ្យកត់សម្គាល់នោះគឺការគូសជាក្បូរក្បាច់នៅលើដៃ បាតដៃ ជើង និងបាតជើងកូនក្រមុំដោយថ្នាំពណ៌ម្យ៉ាង (Henna) ដើម្បីជាការលម្អ។ មិនត្រឹមតែកូនក្រមុំនោះទេ មិត្តភ័ក្ដិ ឬសាច់ញាតិស្រីៗក៏ចូលរួមគូសលម្អបែបនេះដែរ។

៣. ចិន៖ កូនក្រមុំប្រទេសនេះត្រូវស្លៀកពណ៌ក្រហមព្រោះវាតំណាងឲ្យសំណាងល្អ និងការបណ្ដេញភាពចង្រៃចេញពីជីវិតគូស្នេហ៍ថ្មីថ្មោង។ កូនក្រមុំនៅចិនច្រើនរៀបការនៅអាយុក្មេងៗព្រោះបើដល់អាយុ ៣០ ហើយមិនទាន់រៀបការទៀត គេនឹងចាត់ទុកថានៅក្រមុំចាស់ហើយ។

៤. អាល្លឺម៉ង់៖ តាមទំនៀមទម្លាប់ គេត្រូវបំបែកចាននៅថ្ងៃរៀបការដើម្បីនាំសំណាងល្អ។ ម្យ៉ាងទៀតគេក៏មានលេងល្បែងម្យ៉ាងដែលឈ្មោះថា Brautentführung ដែលមិត្តរបស់កូនក្រមុំចាប់ជំរិតយកនាងទៅញ៉ាំស្រាជាមួយគ្នាហើយឲ្យកូនកំលោះរកពួកគេឲ្យឃើញ។

៥. អាហ្វហ្គានីស្ថាន៖ រៀបការជាពិធីធំក្នុងប្រទេសនេះដោយវាប្រព្រឹត្តទៅបីថ្ងៃឯណោះ។ ពណ៌សម្រាប់រៀបការគឺបៃតងដែលតំណាងឲ្យសាសនាឥស្លាម។ កូនក្រមុំអាហ្វហ្គានីស្ថានត្រូវបានគេតុបតែងដៃនិងជើងដោយការគូសនូវក្បាច់លម្អម្យ៉ាងយ៉ាងស្អាតហៅថា Henna (ដូចកូនក្រមុំនៅឥណ្ឌាដែរ) មុនពេលចាប់ផ្ដើមពិធីរៀបការ។ សាច់ញាតិរបស់កូនក្រមុំ ឬស្រីៗនៅលីវផ្សេងទៀតក៏គូសលម្អរបៀបនេះលើដៃកូនដែរព្រោះគេមានជំនឿថាវានឹងជួយឲ្យគេឆាប់មានប្ដី។

៦. ប្រទេសមិកស៊ិក៖ កូនក្រមុំក្នុងប្រទេសអាចប្រើពណ៌ច្រើនសម្រាប់លម្អពីលើឈុតពណ៌សរបស់គេដូចជាពណ៌លឿង ខៀវ ឬប្រើបូក្រហមជាដើម។ គេជឿថាពណ៌ទាំងនេះអាចនាំលុយ អាហារ និងភាពជោគជ័យចូលក្នុងជីវិតគេបាន។

៧. អ៊ីតាលី៖ នៅប្រទេសនេះ កូនក្រមុំប្រើរ៉ូបពណ៌សសុទ្ធយ៉ាងស្រស់ស្អាត។ ក្នុងពិធីរៀបការ កូនកំលោះកូនក្រមុំត្រូវឲ្យផ្លែ Almonds ទៅភ្ញៀវដែលចូលរួម ហើយភ្ញៀវមិនត្រូវបំបែកផ្លែនេះជាពីរទេព្រោះផ្លែនេះតំណាងឲ្យគូស្វាមីដែលត្រូវរស់នៅជាមួយគ្នាមិនអាចបំបែកបាន៕