គូស្នេហ៍មួយគូចូលចិត្តដំណើរកម្សាន្តបែបផ្សងព្រេង និងប្រាប់គន្លឹះចំណាយតិច

2017-02-07 09:09:34
ចំនួនមតិ 0 | ចំនួនចែករំលែក 0

សម្រាប់អ្នកចូលចិត្តដើរផ្សងព្រេង ដំណើរកម្សាន្តអាចជាថ្នាំមួយប្រភេទជួយឲ្យអ្នកមានអារម្មណ៍ល្អប្រសើរ និងទទួលបានបទពិសោធន៍ថ្មីៗ ប្លែកៗ ប្រចាំជីវិត ព្រមទាំងអាចជួយឲ្យ អ្នកចាកឆ្ងាយពីភាពស្រេ្តស ហត់នឿយ លើបញ្ហាការងារ ការសិក្សា វិបត្តិស្នេហា និងបញ្ហាក្នុងគ្រួសារផងដែរ។

ឈរលើទស្សនៈនេះ អ្នកនាង គឹម សុធាថងឌី ហៅ អេមមី និងស្វាមី បានចាប់ដៃរួមចិត្តគ្នាតាំងពីឆ្នាំ ២០១១មកម្ល៉េះ ផ្តើមធ្វើដំណើរកម្សាន្តបែបផ្សងព្រេងដោយខ្លួនឯង ដោយមិនពឹងពាក់មគ្គទេសក៍ទេសចរ (Tour Guide) ទេ។ ពួកគេចាត់ទុកដំណើរទេសចរណ៍ថា ជាការស្រាវជ្រាវពីតំបន់ណាមួយដែលពួកគេចង់ដឹង ដោយពួកគេឲ្យតម្លៃទៅលើសេរីភាពជាជាងការកំណត់ទិសដៅ និងពេលវេលាដែលមគ្គទេសក៍តែងតែធ្វើ។

ចំពោះថវិកាក្នុងការធ្វើដំណើរ ផលិតករភាពយន្តនៅស្ថានីយទូរទស្សន៍ PNN រូបនេះបញ្ជាក់ថា ពួកគេត្រូវពឹងលើ Trip on Budget មានន័យថា ពួកគេតែងគិតទុកជាមុនមួយឆ្នាំលើគម្រោងថវិកាសម្រាប់ដើរកម្សាន្ត។ ពួកគេត្រូវសន្សំប្រាក់នៅដើមឆ្នាំ ទើបអាចយកទៅចាយក្នុងដំណើរកម្សាន្តចុងឆ្នាំ តួយ៉ាងសម្រាប់ប្រទេសជិតខាងដូចជា វៀតណាម ថៃ អេមមីត្រូវមានថវិកាក្នុងដៃ ចន្លោះពី ៥០០ ទៅ ១០០០ដុល្លារ និងប្រទេសរាងឆ្ងាយបន្តិច គឺ ចន្លោះពី ១០០០ ទៅ ៣០០០ដុល្លារ តែការចំណាយធំបំផុត គឺសំបុត្រយន្តហោះ ក្រៅពីហ្នឹង ជាការចំណាយបន្ទាប់បន្សំប៉ុណ្ណោះ។

ជម្រើសដ៍ល្អមួយទៀតរបស់ពួកគេក្នុងការកាត់បន្ថយការចំណាយ គឺជ្រើសរើសការធ្វើដំណើរកម្សាន្តរដូវកាលមិនសូវសម្បូរភ្ញៀវ (Low season) ព្រោះរដូវនេះតម្លៃទំនិញ រួមទាំងថ្លៃស្នាក់នៅ ការធ្វើដំណើរ សំបុត្រចូលកន្លែងកម្សាន្តមានតម្លៃសមរម្យ ឬធូរថ្លៃជាងធម្មតា ដូច្នេះពួកគេអាចសន្សំសំចៃថវិកាបានមួយចំនួនទៀត។

ដំណើរកម្សាន្តរបស់អេមមី និងស្វាមីទៅប្រទេសម៉ាឡេស៊ី

វ័យទើបតែ៣០ឆ្នាំ អេមមី និងស្វាមីបានធ្វើដំណើរកម្សាន្តរួមគ្នាជាច្រើនប្រទេសនៅអាស៊ី មាន ប្រទេសវៀតណាម ថៃ ម៉ាឡេស៊ី សិង្ហបុរី ហុងកុង ចិន (ប៉េកាំង សៀងហៃ) ជាដើម។ ដំណើរផ្សងព្រេង តែងប្រឈមនឹងឧបសគ្គ តួយ៉ាង អំឡុងពេលពួកគេ ទៅលេងនៅលើ ភ្នំមួយនៃប្រទេសម៉ាឡេស៊ី ពួកគេ ជក់ចិត្តនឹងទេសភាពពេក ក៏ភ្លេចមើលម៉ោង។ ពួកគេនៅលេង រហូតម៉ោង ៧យប់ គឺ ចំពេលឡានក្រុងបិទចរាចរណ័ឲ៍ល្មម ទើបគ្មានឡានណាមួយ បើកកាត់ឡើយ ព្រោះវាឆ្ងាយពីក្រុងពេក។ ពួកគេត្រូវចំណាយលុយដល់ទៅ ១០០ដុល្លារ លើសោហ៊ុយធ្វើដំណើរ ដើម្បីស្នើឲ្យ អ្នកតាក់ស៊ីម្នាក់ ព្រមដឹកពួកគេមកដល់ក្រុងវិញ។ សម្រាប់ អេមមី ត្រឹមចំណាយលុយលើស មិនមែនជារឿងគួរឲ្យភ័យខ្លាចទេ តែពួកគេបារម្ភពីសុវត្ថិភាពក្នុងការធ្វើដំណើរពេលយប់ ជាមួយនឹងជនប្លែកមុខ។

គូស្នេហ៍ដែលនិយមទៅកម្សាន្តក្រៅប្រទេស មួយគូនេះ នៅតែបន្តបេសកម្មលើគម្រោងដើរកំសាន្តក្នុងឆ្នាំ ២០១៧ទៀត គឺចង់ទៅលេងប្រទេសជប៉ុន ឬ កូរ៉េខាងត្បូង ដែលជា ប្រទេសក្នុងក្តីស្រមៃ។ ដំណើរកម្សាន្តលើកនេះ វាអាចមិនងាយស្រួល ដូចមុនៗទេ ព្រោះប្រទេសទាំង២នេះតម្រូវឲ្យភ្ញៀវទេសចរបំពេញលក្ខខណ្ឌច្រើនយ៉ាង មុនពេលទទួលបានទិដ្ឋាការ។

បើនិយាយពីបទពិសោធន៍ល្អ ដែលគួរចងចាំវិញ គូស្នេហ៍មួយគូនេះអាចឃើញនឹងភ្នែកនូវពិភពលោកខាងក្រៅ ថាវាបានដើរដល់ណាហើយ វាជាក្តីសង្ឃឹមមានតម្លៃបំផុត មុនយើងចាស់ទៅ ហើយការចំណាយរបស់យើងបានតបស្នងមកវិញ លើកទឹកចិត្ត ខំប្រឹងធ្វើការ ឲ្យខំប្រឹងសន្សំលុយ ។ហើយការដើរកម្សាន្តគឺពិតជាបង្ហាញពីភាពក្លាហាន និងចំណេះដឹងបន្ថែម រីកចំរើនដោយមិនដឹងខ្លួន។

ជារួម ការកំសាន្តបែបជាលក្ខណៈគូស្នេហ៍ ឬមនុស្សសំខាន់បំផុតក្នុងជីវិត ជាបទពិសោធន៍មួយមិនអាចកាត់ថ្លៃបាន ជាអនុស្សាវរិយ៍ដែលអាចចងចាំពេញមួយជីវិតតែម្តង និងមិនមានអារម្មណ៍ថាស្តាយក្រោយឡើយ៕