ស្រីៗចូលវ័យ៣០ គួរប្រើផលិតផលអ្វីខ្លះដើម្បីឲ្យស្បែកនៅតឹងណែន?

2020-04-14 07:00:00
ចំនួនមតិ 0 | ចំនួនចែករំលែក 0

ជាធម្មតា ស្បែករបស់យើងម្នាក់ៗតែងប្រែប្រួលទៅតាមអាយុកាលរបស់វា។ ដោយឡែកសម្រាប់មនុស្សស្រី ស្បែករបស់អ្នកនឹងចាប់ផ្ដើមមានបម្រែបម្រួលខ្លាំងនៅពេលឈានចូលវ័យ៣០ ព្រោះជាពេលដែលកម្រិតអរម៉ូននៅក្នុងខ្លួនមានការផ្លាស់ប្ដូរ ជាហេតុធ្វើឲ្យមានការថយចុះនូវជាតិខូឡាជែនក្នុងរាងកាយ និង ធ្វើឲ្យស្រទាប់ការពារភាពតឹងណែននៃស្បែកប្រែជាស្ដើង។ ដោយសារបម្រែបម្រួលទាំងនេះ អ្នកអាចនឹងសង្កេតឃើញនូវស្នាមជ្រីវជ្រួញដែលលេចចេញនៅលើស្បែក ជាពិសេសបរិវេណផ្ទៃមុខ។ ដូចនេះ អ្នកអាចធ្វើការប្រើប្រាស់នូវផលិតផលថែទាំមុខទាំងនេះ កុំបីខាន៖

រូបតំណាង

**១. សាប៊ូលាងមុខ**

អ្នកត្រូវរក្សាការលាងសម្អាតផ្ទៃមុខឲ្យបានខ្ជាប់ខ្ជួនជាប្រចាំដូចកាលខ្ទង់២០ ដែរ។ យ៉ាងណាមិញ ក្នុងវ័យ៣០ ស្បែករបស់អ្នកអាចនឹងស្ងួតជាងមុន ដូច្នេះអ្នកគួរជ្រើសរើសសាប៊ូដែលគ្មានជាតិកាត់ខ្លាំង និង កម្រិត pH ទាប។

២. ទឹកជូតសម្អាតផ្ទៃមុខ (Toner)

អ្នកគួរទម្លាប់ប្រើប្រាស់ទឹកជូតជាប្រចាំ ជាពិសេសជ្រើសរើសប្រភេទទឹកជូតដែលផ្ដល់សំណើមខ្ពស់ដល់ស្បែក និង មានកម្រិត pH ប្រមាណ ៥.៥ ព្រោះជាកម្រិតមួយសមស្របសម្រាប់សុខភាពស្បែក។

៣. សេរ៉ូមមុខ

សេរ៉ូមក៏ជាផលិតផលដែលមួយមានតួនាទីសំខាន់សម្រាប់ស្បែក ជាពិសេសគឺប្រភេទសេរ៉ូមវីតាមីន C ដែលផ្ទុកសារធាតុប្រឆាំងអុកស៊ីតកម្ម មានតួនាទីកាត់បន្ថយស្នាមអុជខ្មៅ ធ្វើឲ្យស្បែកមុខភ្លឺ ជួយបន្តឹងស្បែក និង ជំនួយដល់ការផលិតជាតិខូឡាជែននៃស្បែកផងដែរ។

រូបតំណាង

៤. រ៉េទីណុល (Vitamin A)

ផលិតផលមានជាតិរ៉េទីណុលជួយពន្យារភាពជ្រីវជ្រួញនៃស្បែក ជួយកម្ចាត់មុនលើមុខ ព្រមទាំងជំនួយដល់ស្រទាប់ខូឡាជែន និង ធ្វើឲ្យស្បែកតឹងណែនទៀតផង។

៥. គ្រីមលាបភ្នែក

ភ្នែក មានសភាពស្ដើងជាងបរិវេណផ្សេងទៀតនៅលើផ្ទៃមុខរហូតដល់ ៤០% ដូចនេះស្នាមជ្រីវជ្រួញក៏ងាយកើតឡើងនៅបរិវេណនេះដែរ។ ដូច្នេះ អ្នកគួរចាប់ផ្ដើមប្រើប្រាស់គ្រីមលាបភ្នែកជាប្រចាំ តាំងពីមុនចូលអាយុ៣០ទៅទៀត ដើម្បីទប់ស្កាត់វាជាមុន។

៦. ឡេផ្ដល់សំណើម

ក្នុងវ័យ ៣០ ឡេផ្ដល់សំណើមមុខគឺជារឿងចាំបាច់បំផុត។ ស្បែករបស់អ្នកត្រូវការជាតិសំណើមដើម្បីទប់ស្កាត់សភាពស្ងួតនៃស្បែក ដែលធ្វើឲ្យខូឡាជែនចុះខ្សោយ ងាយកកើតជាកន្ទួលរមាស់ និង ស្នាមជ្រីវជ្រួញនៅលើស្បែក។

រូបតំណាង

៧. ឡេការពារកម្ដៅថ្ងៃ

ជាធម្មតាអ្នកត្រូវលាបឡេកម្ដៅថ្ងៃតាំងពីទើបចូល២០ឆ្នាំឯណោះ ព្រោះការបណ្ដោយឲ្យស្បែកប៉ះត្រូវកម្ដៅថ្ងៃដោយផ្ទាល់ ឬ គ្មានផលិតផលការពារនោះងាយបង្កជាបញ្ហាដល់ស្បែកជាខ្លាំង ដែលក្នុងនោះរួមមាន ស្បែកស្ងួត ឡើងអាចម៍រុយ ពណ៌សម្បុរមិនស្មើគ្នា ឡើងស្នាមជ្រីវជ្រួញ ព្រមទាំងធ្វើឲ្យខូឡាជែន និងស្រទាប់ការពារស្បែកចុះអន់ខ្សោយ។

៨. ជម្រុះកោសិកាចាស់ (Exfoliation)

ការជ្រុះកោសិកាចាស់២ ដង ក្នុង១ សប្ដាហ៍ធ្វើឲ្យស្បែកក្មេងជាងមុន កាត់បន្ថយស្នាមក្រហមលើស្បែក ជួយឲ្យស្បែកភ្លឺថ្លា និង កាត់បន្ថយស្នាមជ្រីវជ្រួញមុនកំណត់។

រូបតំណាង

៩. ម៉ាសបិទមុខ

ផលិតផលចុងក្រោយដែលមិនអាចរំលងបាននោះគឺ ម៉ាសបិទមុខ។ អ្នកអាចប្រើជាម៉ាសសន្លឹក ម៉ាសភក់ ឬ ម៉ាសដែលអ្នកលាយខ្លួនឯងតាមរូបមន្តធម្មជាតិក៏បាន អ្នកនឹងឃើញពីប្រសិទ្ធភាពដ៏អស្ចារ្យរបស់វា។ ការប្រើប្រាស់ម៉ាសជាប្រចាំ ២ទៅ៣ ដងក្នុង ១សប្ដាហ៍ នឹងជួយឲ្យស្បែកមានសំណើម ភ្លឺ ទន់ និង មានអារម្មណ៍ស្រស់ស្រាយទៀតផង៕