៥ វិធីជួយអ្នកឲ្យញុំាតិច តែពុំសូវឃ្លានខ្លាំង

  • 2020-03-27 01:40:00
  • ចំនួនមតិ 0 | ចំនួនចែករំលែក 15

សត្រូវដែលធ្វើឲ្យមិត្តនារីជាច្រើនសម្រកទម្ងន់មិនបានសម្រេចនោះគឺការឃ្លានឥតឈប់ឈរ។ នៅ​ពេល​អ្នក​កំ​ពុង​តែមានការតមអាហារ តែក្រពះរបស់អ្នកបែរជាឃ្លានមិនចេះឆ្អែតសោះ នោះជាមូល​ហេតុ​ចម្បង​ធ្វើ​ឲ្យ​អ្នក​ធាត់​គ្មានថ្ងៃស្គមឡើយ។ តើមិត្ត​នារីចង់បំបាត់ការឃ្លានតែនៅ​តែបន្ត​ការញុំា​ឆ្អែត​ៗដ​ដែរ​ឬទេ? បើចង់ សូម​អាន​នូវ ៥ ចំណុចខាងក្រោមរួមមាន៖

១. បែងចែកឲ្យច្បាស់រវាង ការឃ្លាន និង ចំណង់

រូបតំណាង

មានពេលជាច្រើនអ្នកតែងច្រឡំចំពោះពាក្យពីរនេះ។ ពិសេសកើតឡើងចំពោះមិត្តនារីតែម្តង នៅពេលខ្លួន​មើល​រឿង​ភាគត្រង់ឈុតគេញុំាចំណីអាហារ អ្នកក៏ឃ្លានតាមហើយក៏បើកទូរទឹកកកឬចុចកម្ម៉ង់​ម្ហូបជាដើម។ ត្រង់​ចំណុចនេះ អ្នកគប្បីគិតពិចារណាថាមុននេះបន្តិចអ្នកបានញុំាអី? ពេលណា? ញុំាអស់ប៉ុន្មាន? ការសួរ​ដូច្នោះ​នឹងនាំឲ្យអ្នកកាត់បន្ថយការឃ្លានហួសហេតុ។

២. ផ្តោតសំខាន់លើអាហារសម្បូរប្រូតេអ៊ីននិងជាតិសរសៃ

រូបតំណាង

អាហារដែលសម្បូរទៅដោយប្រតេអ៊ីនគឺចំណាយពេលរំលាយយូរជាងអាហារធម្មតាដោយវាចំណាយពេលពី ៤ ទៅ ៦ ម៉ោង។ ខណៈពេលដែលកាបូអ៊ីដ្រាតឬម្សៅនិងស្កររំលាយលឿនជាងប្រហែល ៤ ម៉ោង​ឬឆាប់​ជាង​នេះ។ ​ដូច្នេះ ដើម្បីឱ្យឆ្អែតក្នុងរយៈពេលយូរ កុំឃ្លាន​នៅពាក់​កណ្តាល​អធ្រាត្រកុំ​ភ្លេច​បរិភោគ​ប្រូតេ​អ៊ីន​ច្រើនរួម​មាន​សាច់ ទឹកដោះគោ តៅហ៊ូ សណ្តែកក៏ដូចជាអាហារដែលមាន​ជាតិ​សរសៃ​ខ្ពស់​ដូចជាបន្លែផ្លែឈើ​និង​គ្រាប់​ធញ្ញ​ជាតិ។

៣. បែងចែកម៉ោងទទួលទានអាហារ

សម្រាប់ការបែងចែងអាហារនេះអ្នកត្រូវតែចែកអាហារពី៣ ពេលទៅ ជាង ៦ ពេល។ ក្រៅពី​ការទទួល​ទាន​អាហារ​សំខាន់ៗ ៣ ពេលហើយអ្នកអាចញុំាចំណីបន្ថែមនៅពេលថ្ងៃអំឡុងពេលធ្វើការ​ឬ​សិក្សា​បាន។ ស្រប​ពេល​នោះដែរ អ្នកមិនគួរបរិភោគហួសប្រមាណឡើយ ត្រូវទទួលទានល្មមតែប៉ុណ្ណោះ។

៤. កាត់បន្ថយការទទួលម្សៅនិងស្ករ

ដូចដែលបានបញ្ជាក់នៅខាងលើ អាហារជាតិម្សៅនិងស្កររំលាយលឿនជាងប្រូតេអ៊ីន។ ជំនួសឲ្យការ​ទទួល​ទាន​ម្សៅនិងស្ករ អ្នកអាចទទួលទានបាយពណ៌ត្នោត ស្រូវសាលី នំបុ័ង ព្រោះវា​នឹងជួយ​ឲ្យរាងកាយ​របស់អ្នក​ឆ្អែត​បានយូរ។

៥. កុំរំលងអាហារពេលយប់

រូបតំណាង

ចូរអ្នកកុំភ្លេចទទួលទានអាហារពេលយប់ដោយជំនួសពីបាយមកជាផ្លែឈើវិញ ពិសេសអ្នកដែលធ្វើការឬ​សិក្សា​ដល់យប់​ជ្រៅ។ ម្យ៉ាងកុំទម្លាប់រំលងអាហារពេលល្ងាចឲ្យសោះ ព្រោះក្រពះរបស់អ្នកនឹងធ្វើទុក៕

រូបភាព៖

ចុចអានបន្ត៖

៨ វិធីជួយបង្កើនប្រព័ន្ធសុំាឲ្យរឹងមាំប្រឆាំងនឹង COVID-19

ប្រភព៖ Sanook ប្រែ​សម្រួល៖ សុវណ្ណ ស្រីពីន