បើស្រលាញ់ខុសមនុស្ស សូមបែកគ្នា កុំបង្ខំចិត្តចូលរោងការហើយឈឺចាប់មួយជីវិត
- 2020-03-19 04:00:00
- ចំនួនមតិ 0 | ចំនួនចែករំលែក 0
បើស្រលាញ់ខុសមនុស្ស សូមបែកគ្នា កុំបង្ខំចិត្តចូលរោងការហើយឈឺចាប់មួយជីវិត
ក្នុងរឿងមនោសញ្ចេតនា មនុស្សស្រីគឺរឹងរូសខ្លាំងណាស់ តែងតែគិតថាឲ្យតែប្រើបេះដូងស្មោះស្រលាញ់នរណាម្នាក់ គេនឹងអាចផ្លាស់ប្ដូរបាន។ តែងគិតថា ឲ្យតែឈានដល់មង្គលការ មនុស្សប្រុសនឹងប្រែទៅជាមានទំនួលខុសត្រូវនឹងប្រពន្ធ កូន គ្រួសារ តែគិតបែបនេះគឺខុសទាំងស្រុង ដ្បិតក្រយៅមនុស្សមិនអាចផ្លាស់ប្ដូរបានឡើយ។
មនុស្សស្រីនៅពេលស្រលាញ់ម្នាក់អស់ពីចិត្ត អស់ពីថ្លើម គឺមើលគេដោយពណ៌ស៊ីជម្ពូ។ ទោះបីជាមនុស្សប្រុសមានទម្លាប់អាក្រក់ដូចជាខ្ជិលច្រអូស អត់ចិត្ត អាត្មានិយម មនុស្សស្រីនៅតែអាចបើកចិត្តទទួលយកគេ ហើយយកលេសថា តើមានអ្នកណាដែលគ្មានទម្លាប់អាក្រក់នោះ។ ប៉ុន្តែ បើជ្រុលស្រលាញ់ប៉ះចំមនុស្សដែលធ្វើឲ្យខ្លួនមានតែការឈឺចាប់ហើយ សូមដោះដៃចេញទៅ ។
ខ្ញុំមានមិត្តជិតស្និទ្ធិម្នាក់ តាំងពីស្រលាញ់គ្នាដំបូង សង្សាររបស់នាងគឺជាអ្នកញៀនល្បែងម្នាក់។ គ្រប់ៗគ្នា ប្រាប់នាងឲ្យបែកគ្នា ដ្បិតនាងគ្មានថ្ងៃរកបានសុភមង្គលឡើយ។ តែមិត្តខ្ញុំប្រាប់ថា បេះដូងនាងបានដាក់ចិត្តលើគេរួចទៅហើយ។ នាងគិតថា ពេលការនឹងគ្នា មានប្រពន្ធ មានកូន គេនឹងផ្លាស់ប្ដូរ នាងថា ស្នេហាដ៏ធំធេងរបស់នាងនឹងអាចផ្លាស់ប្ដូររូបគេ ឲ្យចេះមើលថៃទាំគ្រួសារឡើងវិញ។
ចុងបញ្ចប់ នាងក៏រៀបការ សុភមង្គលមិនទាន់ឃើញ ឃើញតែទឹកភ្នែកជូតក្បាលជង្គង់ ឈឺចាប់ដោយសារប្ដីមិនគិតការងារ ដើរតែលេងល្បែង។ កាន់តែចាញ់ កាន់តែងប់ របស់របរក្នុងផ្ទះ ចាប់ផ្ដើមឃើញនៅកុងស៊ី។ លុយអត់មាន ប្ដីចាញ់ល្បែងមួម៉ៅរករឿង កូនក្នុងផ្ទៃជិតកើត មិត្តភ័ក្ដិខ្ញុំស្ត្រេសស្ទើរតែក្លាយជាមនុស្សឆ្កួត។ ស្ដាយក្រោយដល់កំពូល នាងបន់ឲ្យពេលវេលាត្រលប់ក្រោយ ដើម្បីមិនបាច់ការនឹងប្ដីអត់បានការរបស់ខ្លួន។
ឆ្លងទន្លេមិនបានប៉ុន្មាន នាងក៏ដាក់ពាក្យលែងលះ ដ្បិតទ្រាំនឹងការគ្មានលុយមួយកាក់ក្នុងខ្លួនលែងបាន។ ប្ដីនាងក៏មិនរវល់ ចង់លែងក៏លែង ព្រោះក៏គ្មានមនោសញ្ចេតនាអ្វីច្រើន តែមិត្តខ្ញុំបែរជាជាប់ឈ្មោះជានារីមេម៉ាយ។
ពេលនេះទើបនាងដឹងថា គ្មានមនោសញ្ចេតនាមហិមាណាដែលអាចផ្លាស់ប្ដូរចិត្តមនុស្សបានឡើយ ដូចនេះបើដឹងថា ស្រលាញ់ខុសមនុស្សហើយ សូមដោះដៃទាន់ពេល កុំឲ្យអ្វីៗហួសអស់ហើយ ទើបនឹកស្ដាយក្រោយ៕
អានបន្ត៖ គ្មានឡើយពាក្យថា មិត្តភាព ក្រោយស្នេហាមួយដែលបាត់បង់