ងរង៉ក់ច្រើន ចង់ឲ្យគេខ្វល់ខ្វាយច្រើន ជាសញ្ញានៃមនុស្សស្រីដែលមិនទាន់រឹងមាំ និងចាស់ទុំ
- 2020-02-18 01:00:00
- ចំនួនមតិ 0 | ចំនួនចែករំលែក 0
ងរង៉ក់ច្រើន ចង់ឲ្យគេខ្វល់ខ្វាយច្រើន ជាសញ្ញានៃមនុស្សស្រីដែលមិនទាន់រឹងមាំ និងចាស់ទុំ
ធម្មជាតិនៃក្មេងស្រីគឺចង់ឲ្យគេស្រឡាញ់ ចង់ឲ្យគេថ្នាក់ថ្នមទុកដូចជាព្រះនាងអីចឹង ដូច្នេះហើយនៅពេលដែលនាងអន់ចិត្តអីបន្តិចនាងក៏ចាប់ផ្ដើមងរង៉ក់ចង់ឲ្យគេលួង ចង់ឲ្យគេចាប់អារម្មណ៍ភ្លាម។
មនុស្សស្រីអាយុ ១៨ឆ្នាំក្ដី ២០ឆ្នាំក្ដី ឬក៏ឈានដល់ ២២ ដល់ ២៥ឆ្នាំក្ដី ឲ្យតែមានចរិតងរង៉ក់ច្រើន ឬក៏អន់ចិត្តគ្រាន់តែគេមិនបានខ្វល់ខ្វាយនោះ គឺមិនខុសអីពីក្មេងស្រីនោះទេ។ នេះមិនមែនមានន័យថាមនុស្សស្រីដែលចាស់ទុំមិនអាចអន់ចិត្តបាន អ្នកមិនត្រូវការឲ្យគេខ្វល់ខ្វាយនោះទេ តែគេមានហេតុផល និងរឿងដែលត្រូវឲ្យរឿងងរង៉ក់នោះកើតឡើង។
គ្រាន់តែមិនលើកទូរស័ព្ទអ្នក គ្រាន់តែតបសារអ្នកយឺត គ្រាន់តែមិនបាននិយាយផ្អែមល្ហែមជាមួយអ្នក ហើយអ្នកក៏ខឹង ក៏ងរនោះអ្នកពិតជាមនុស្សស្រីទន់ជ្រាយ និងក្មេងខ្ចីពេកហើយ។ មនុស្សស្រីដែលមានគំនិតចាស់ទុំ និងរឹងមាំគេមិនដែលយកចិត្តទុកដាក់ និងចំណាយពេលមិនសប្បាយចិត្ត ខឹងអត់ប្រយោជន៍បែបនេះនោះទេ ព្រោះគេមានរឿងរ៉ាវច្រើនទៀតដែលត្រូវគិត និងធ្វើឲ្យខ្លួនគេរីករាយ។
អ្នកមិនមែនជាក្មេងស្រីទៀតនោះទេ ហេតុអីអ្នកមិនអាចមើលថែខ្លួនឯងបាន ចាំបាច់អីឲ្យតែដៃគូអ្នកគិតពីអ្នកគ្រប់ជំហាននោះ។ ហេតុអីមិនគិតថានោះដូចជាផ្ដល់សម្ពាធឲ្យគាត់ពេកទេដឹង? ពេលខ្លះការងារគាត់រវល់សឹងគ្មានពេលគេង ពេលខ្លះការងារសាលាដាក់សម្ពាធឲ្យគេពេកទៅហើយ តែអ្នកបែរជាមិនជួយផ្ដល់កម្លាំងចិត្ត ក៏បែរជាបន្ថែមរឿងស្មុគស្មាញឲ្យគាត់មួយជាន់ទៀត ធ្វើឲ្យគាត់ស្មុគស្មាញរឿងការងារផង រៀនផង ហើយមកត្រូវអង្គុយលួងអ្នក និយាយជាមួយអ្នកទៀត។ ហេតុអីក៏អ្នកបណ្ដោយខ្លួនឲ្យក្លាយជាមនុស្សស្រីបែបនេះ?
ចំណាយពេលធ្វើឲ្យជីវិតស្នេហាអ្នកចាស់ទុំជាងនេះទៅ កុំមួយថ្ងៃៗគិតតែរឿងគេទុកអ្នកចោល គេមិនស្រឡាញ់អ្នក ទាំងការពិតគាត់មានសម្ពាធខ្លាំងទាំងដែលសង្សារខ្លួនឯងមិនដែលយល់។
ចាំណា! មនុស្សស្រឡាញ់គ្នាមិនបាច់ទាមទារពីគ្នាពេកនោះទេ គេនឹងផ្ដល់ឲ្យអ្នកនូវក្ដីស្រឡាញ់ដ៏សមល្មមមួយដែលរឹងមាំ ច្បាស់លាស់ មិនមែនអង្គុយមើលមុខគ្នា ក៏ឆ្អែតមិនបាច់ត្រូវការលុយទិញបាយញ៉ាំនោះទេ។
រកមនុស្សដែលរវល់ដើម្បីអនាគតទាំងអស់គ្នា ហើយឆ្លៀតពេកតិចតួចដែលសល់ប៉ុន្មានដើម្បីអ្នក ជាជាងចង់បានមនុស្សដែលចំណាយពេលជាមួយអ្នកទាំងគ្មានការងារផ្សេងត្រូវធ្វើនោះ៕
ចុចអាន៖ទទួលយកស្នេហាបែបណាទើបមិនសូវឈឺចាប់? អ្វីដែលមនុស្សស្រីគួរដឹង និងស្វែងយល់