មនុស្សស្រីមាន ៨ ចំណុចនេះ ទោះអាយុច្រើនប៉ុណ្ណា ក៏កុំខ្លាចថាគ្មានបុរសមកស្រលាញ់

2020-02-03 11:00:00
ចំនួនមតិ 0 | ចំនួនចែករំលែក 0

បើមនុស្សស្រីមានចំណុចទាំងនេះ ទោះជាអាយុច្រើនហើយក៏ដោយ ក៏កុំព្រួយថាគ្មានអ្នកចង់បាន។ ព្រោះគ្មានបុរសណាបដិសេធ មិនប្រាថ្នានារីដែលមាន ៨ ចំណុចនេះណាស់។ តើចំណុចទាំងនោះសំខាន់ និងអស្ចារ្យប៉ុណ្ណាទៅបានជាប្រុសៗចង់បានម្ល៉េះ? កញ្ញា សូមបង្ហាញជូនដូចខាងក្រោម៖

១.ជីវិតមិនស្មុគស្មាញ

សម្រាប់បុរសភាគច្រើន មិនចូលចិត្តមនុស្សស្រីដែលមានបញ្ហាស្មុគស្មាញមិនចេះអស់នោះឡើយ ព្រោះពួកគេក៏ហត់នឹងជួយដោះស្រាយដែរ។ ប្រុសៗស្រលាញ់នារីដែលមានភាពកំប្លែង ហើយជីវិតសាមញ្ញ ងាយយល់ ងាយចុះសម្រុង។

២. រូបសម្រស់សមរម្យ

រូបសម្បត្តិក៏ជារឿងសំខាន់ដែរ តែបុរសៗមិនប្រាថ្នាចង់បានមនុស្សស្រីដែលស្អាតពេកដែរ គឺត្រឹមសមរម្យ និងចូលចំណោមនឹងគេចុះ។ មួយវិញទៀតត្រូវចេះតុបតែងខ្លួនតាមកាលៈទេសៈ ព្រោះបើធ្វើខ្លួនឆើតឆាយគ្រប់ពេល ក៏មនុស្សមិនចង់បានដែរ។

រូបតំណាង

**៣.មានភាពពិសេស**

នេះជាចំណុចអាទិភាពរបស់មនុស្សស្រី។ ព្រោះទោះបីជារូបសម្ផស្សមិនស្អាត ក៏អ្នកនៅតែទទួលបានការចាប់អារម្មណ៍ពីមនុស្សប្រុសដែរ ហើយសូម្បីតែស្រីៗដូចគ្នាក៏ច្រណែននឹងអ្នកដែរដូចជា ចេះលេងតន្ត្រី លេងកីឡា ឬចំណុចផ្សេងដែលមនុស្សស្រីដទៃមិនអាចធ្វើបាន។

៤.ភាពប៉ិនប្រសប់

បុរសតែងចង់បាននារីដែលចេះរៀបចំរបស់គ្មានតម្លៃ ឲ្យទៅមានតម្លៃ ដើម្បីធ្វើឲ្យជីវិតកាន់តែងាយស្រួល។ ចំណែកប្រភេទមនុស្សស្រីមានភាពប៉ិនប្រសប់ក្នុងការតុបតែង ឬកែច្នៃអ្វីដែលនៅជុំវិញខ្លួនទៅជាមានប្រយោជន៍ ខណៈដែលអ្នកដទៃនឹកមិនឃើញ គឺស្ថិតក្នុងបញ្ជីចង់បានរបស់មនុស្សប្រុស។

៥.មានរបៀប

ជីវិតដ៏មានរបៀបរៀបរយនារី ធ្វើឲ្យមនុស្សប្រុសជាច្រើនចាប់អារម្មណ៍ ព្រោះគាត់ប្រាកដជាគិតទៅដល់អនាគត។ កាលណាបើបុរសបានរៀបការជាមួយមនុស្សស្រីមានវិន័យ និងរបៀបរបបត្រឹមត្រូវ នោះកូនរបស់គាត់ ពិតជាអាចក្លាយជាពលរដ្ឋល្អក្នុងសង្គម។

៦.រួសរាយ

មនុស្សប្រុសពិតជាបានសម្លឹងវែងឆ្ងាយ នៅពេលគេចាប់អារម្មណ៍លើស្ត្រីណាម្នាក់។ គាត់ពិតជាចង់បានមនុស្សស្រីដែលចេះគួរសមជាមួយមិត្តភ័ក្ដិ និងក្រុមគ្រួសារសាច់ញាតិគាត់។

៧.ភាពចាស់ទុំ

ភាពចាស់ទុំមិនមានអ្វីធ្វើឲ្យបុរសពិចារណាវែងឆ្ងាយចំពោះនារីឡើយ បើទោះជាអ្នកនៅក្មេងខ្ចីក៏ដោយ។ ភាពចាស់ទុំខាងផ្លូវចិត្ត និងអារម្មណ៍ គឺជាគុណសម្បត្តិមួយដែលបុរសទាំងអស់កំពុងតែស្វែងរក ព្រោះគ្មាននរណាម្នាក់មានពេលណាត់ក្មេងស្រីមិនដឹងអី។

រូបតំណាង

៨.សុទិដ្ឋិនិយម

លក្ខណៈសម្បត្តិដែលមនុស្សស្រីត្រូវតែមាន នោះគឺការយល់ឃើញអ្វីៗសុទ្ធតែល្អ និងមានសង្ឃឹម។ ព្រោះនារីបែបនេះ នឹងជួយឲ្យជីវិតគេកាន់តែប្រសើរ និងមានការជម្នះភាពលំបាក ដើម្បីសម្រេចគោលដៅជីវិត៕

ចុចអាន៖ហេតុផល៥យ៉ាង បញ្ជាក់ថាអ្នកមិនមែនជាស្នេហ៍ពិតរបស់គាត់ទេ

អត្ថបទ៖ ទ្រី រ៉ាវី