៧ យ៉ាងមិនគួរធ្វើ មុនពេលឡើងយន្តហោះ

2020-01-13 07:35:00
ចំនួនមតិ 0 | ចំនួនចែករំលែក 0

ការធ្វើដំណើរនៅលើយន្តហោះ អាចជារឿងរំភើបសប្បាយ សម្រាប់អ្នកដែលជិះលើកដំបូង ប៉ុន្តែវាក៏ជារឿងគួរឲ្យធុញ សម្រាប់អ្នកដែលជិះញឹកញាប់។ អ្វីដែលនាំឲ្យអ្នកកាន់តែស្មុគស្មាញខ្លាំងជាងនេះ គឺការអង្គុយរង់ចាំ និងបញ្ហាមួយចំនួនដែលអាចនឹងកើតឡើង ដោយមិនបានព្រាងទុក។ ដើម្បីបញ្ចៀសពីភាពរអាក់រអួល មុនពេលឡើងយន្តហោះ មិនគួរមើលរំលងពីកំហុសតិចតួចដាច់ខាត។

១. ដាក់ឯកសារនៅក្នុងកាបូបតូច

អ្នកខ្លះចូលចិត្តដាក់ឯកសារសំខាន់ៗក៏ដូចជាលិខិតឆ្លងដែន នៅក្នុងកាបូបតូចៗ។ យ៉ាងណាត្រូវចាំថា កាបូបតូច អ្នកអាចនឹងឧស្សាហ៍ដកចុះឡើង ពេលទិញកាហ្វេនៅប្រលានឬហូតលុយឲ្យតាក់ស៊ីជាដើម ដូច្នេះមានតែការដាក់ក្នុងកាបូបធំប៉ុណ្ណោះទើបងាយស្រួល មានសុវត្ថិភាពនិងមិនវង្វេងដៃផ្ដេសផ្ដាស។ ម្យ៉ាងវិញទៀត គួរបែងចែកដាក់លុយកាក់ ទាំងក្នុងកាបូបតូចនិងកាបូបធំ ដើម្បីទុកសាគួរ។

២. ទៅកៀកម៉ោងខ្លាំងពេក

មធ្យោបាយធ្វើដំណើរទៅកាន់ប្រលានមានច្រើនប្រភេទខ្លាំងណាស់ ប៉ុន្តែដោយសារតែចរាចរណ៍មិនសូវអំណោយផល ខ្លាចស្ទះកាន់តែយូរខ្លាំងខកជើងហោះហើរ ដូច្នេះគួរចេះលៃលក ឲ្យសល់ពេលយ៉ាងហោចណាស់ ២-៣ ម៉ោង មុនយន្តហោះចេញ។

៣. បង់លុយសម្រាប់វ៉ាលីលើសគីឡូ

យល់ល្អត្រូវដឹងឲ្យច្បាស់ពីគីឡូនៅក្នុងវ៉ាលីរបស់អ្នក ដាច់ខាតកុំដាក់ឥវ៉ាន់លើសពីចំនួនដែលគេកំណត់ឲ្យសោះ ពុំដូច្នោះទេ អ្នកនឹងត្រូវខាតបង់ទាំងលុយកាក់និងពេលវេលាទៀតផង។

៤. រុំវ៉ាលី

បន្ទាប់ពីបុគ្គលិករុំវ៉ាលីរបស់អ្នកជិតអស់ហើយ ពេលខ្លះអ្នកអាចភ្លេចរបស់សំខាន់អ្វីមួយនៅក្នុងនោះ ជាហេតុបណ្តាលឲ្យ ត្រូវកាត់រើសារជាថ្មីម្តងទៀត។ វិធីល្អបំផុតដើម្បីចំណេញពេលនិងមានសុវត្ថិភាព គួរទិញវ៉ាលីដែលមានសោរចាក់ត្រឹមត្រូវ។

៥. ឈររង់ចាំនៅជួរដែលមានមនុស្សច្រើនកកកុញ

ជាទូទៅ ច្រកឆែកឆេរទី១និងទី២ តែងមានសភាពកកកុញ មានមនុស្សច្រើនជាងច្រកដទៃទៀត។ ហេតុនេះគួររកមើលជួរណាដែលខ្លីនិងមានមនុស្សតិច។ ជាពិសេសរបររបរតូចៗដែលអ្នកត្រូវដោះចេញ ដាក់នៅក្នុងថាសជ័រពេលត្រួតពិនិត្យ គួរមានការប្រុងប្រយ័ត្នឲ្យបានល្អ ជៀសវាងការភ្លេចយកចេញមកវិញ។

៦. ភ្លេចពីច្បាប់ហាមឃាត់នៅក្នុងវ៉ាលីយូរដៃ

ជាក់ស្តែងនៅក្នុងវ៉ាលីយូរដៃ មិនអនុញ្ញាតឲ្យដាក់របស់របរផ្ទុកសារធាតុរាវលើសពី ១០០មីលីលីត្រឡើយ។ ប្រសិនបើអ្នកមិនបានដឹងពីច្បាប់ហាមប្រាមជាមុន មិនមែនត្រឹមបង្កបញ្ហាដល់ខ្លួនឯងប៉ុណ្ណោះទេ សូម្បីអ្នកដទៃដែលតម្រង់ជួរជាមួយ ក៏ត្រូវរង់ចាំយូរការដោយសារតែអ្នកម្នាក់។

៧. ញ៉ាំអាហារដែលមិនសមគួរ

នៅពេលបានទៅលេងនៅឯក្រៅប្រទេស អ្នកប្រាកដជាចង់ភ្លក់សាករសជាតិម្ហូបអាហារប្លែកៗប្រចាំតំបន់របស់គេ។ យ៉ាងណាមិញ កុំភ្លេចថាក្រពះរបស់អ្នក អាចមានប្រតិកម្មជាមួយនឹងអាហារចម្លែក ឬអាហារដែលមានសារធាតុពុលក្នុងប្រការណាមួយ វានឹងបំផ្លាញដំណើរកម្សាន្ត និងសុខភាពរបស់អ្នកតែម្តង។