គ្មាននរណាម្នាក់ចង់បែកបាក់ពីមនុស្សដែលខ្លួនស្រឡាញ់ទេ លុះត្រាតែអស់ទ្រាំ
- 2019-12-17 05:00:00
- ចំនួនមតិ 0 | ចំនួនចែករំលែក 0
គ្មាននរណាម្នាក់ចង់បែកបាក់ពីមនុស្សដែលខ្លួនស្រឡាញ់ទេ លុះត្រាតែអស់ទ្រាំ
សួរថាតើមាននរណាម្នាក់ចង់ចាកចេញពីអ្វីដែលខ្លួនស្រឡាញ់និងមានតម្លៃបំផុតសម្រាប់គេនោះ? ចម្លើយគឺគ្មាននោះទេ។ នារីម្នាក់ៗសុទ្ធតែប្រាថ្នារស់នៅជាមួយមនុស្សដែលខ្លួនស្រឡាញ់ មិនថាត្រឹមជាសង្សា ឬ ប្តីប្រពន្ធ តែកាលៈទេសៈខ្លះ ធ្វើឱ្យនាងទ្រាំទៀតលែងបាន ហើយត្រូវជ្រើសរើសការចាកចេញពីបុរសដែលខ្លួនស្រឡាញ់ទៅវិញ។
មនុស្សស្រី គឺជាមនុស្សដែលពូកែទ្រាំខ្លាំងមែនទែន នាងតែងអត់ឱន និង ព្យាយាមយល់ពីភាគីដែលខ្លួនស្រឡាញ់ ព្រោះនាងតែងគិតដល់កិត្តិយសខ្លួនឯង និង គ្រួសារ។ អ្នកខ្លះចូលចិត្តវាយតម្លៃនាងនៅពេលដែលនាងជ្រើសរើសចាកចេញពីភាព ឈឺចាប់នោះទៅវិញ។ ជាក់ស្តែង ការបែកបាក់គ្នាជាមួយគូសង្សា ឬ ការលែងលះគ្នាជាមួយប្តីជាដើម សុទ្ធសឹងជារឿងមួយដែលពិបាកនឹងធ្វើ ព្រោះនារីមួយចំនួនធំសុខចិត្តទ្រាំ និង មានការអត់ឱនជារឿយៗ។ យ៉ាងណាមិញ នារីមិនមែនជាដុំថ្មនោះទេ ការស៊ូទ្រាំក៏មានកំណត់។ ដើម្បីចៀសវាងការវាយតម្លៃពីខាងក្រៅ និង ពេលខ្លះដើម្បីកូន នារីខ្លះសុខចិត្តបៀមឱបទុក្ខនៃការដែលប្តីក្បត់ វាយដំ និង ការជេរប្រមាថផ្សេងៗ។ នាងខ្លាចនឹងសម្តីដែលគេថា នាងជាស្រីមេម៉ាយ ឬ កូនរបស់នាងគ្មានឪពុកជាដើម។ ពេលខ្លះ អ្នកមិនដឹងខ្លួនទេថា ការវាយតម្លៃ ឬ ការដឺដង របស់អ្នកធ្វើឱ្យមនុស្សស្រីប៉ុន្មាននាក់ត្រូវរស់នៅជាមួយភាពឈឺចាប់អស់មួយជីវិត។
គួរបញ្ចាក់ថា វាមិនមែនមានន័យថាឱ្យតែមានបញ្ហាក្នុងសេចក្តីស្នេហា ឬ គ្រួសារគឺត្រូវតែបោះបង់នោះទេ គឺធ្វើយ៉ាងណាព្យាយាមដោះស្រាយឱ្យអស់លទ្ធភាព ហើយ បើការខិតខំនោះមានតែម្ខាងក៏មិនអាចទៅមុខបានដែរ នោះនឹងធ្វើឱ្យអ្នកហត់ និង ទទួលការឈឺចាប់តែឯង។
អ្នកត្រូវចាំថា មុននឹងនារីម្នាក់សម្រេចចិត្តបែកគ្នា ឬ លែងលះគ្នា គឺមានន័យថានាងបានទ្រាំហួសកម្រិត ហើយ ដូច្នេះនាងគឺជាមនុស្សស្រីដែលក្លាហានម្នាក់ដែល ចេះចាកចេញពីស្ថានភាពដែលផ្តល់តែភាពខ្លោចផ្សា និង ចាកចេញពីមនុស្សម្នាក់ដែលមិនផ្តល់តម្លៃឱ្យនាងទាល់តែសោះ៕
អានបន្ត៖ ធ្លាប់ទេ? រកឃើញមនុស្សដែលស័ក្ដិសមហើយ តែពេលវេលាបែរជាមិនសមទៅវិញ!