មុនបោះជំហានចូលទៅឆ្នាំថ្មី គួរត្រៀមរបស់ ៥យ៉ាងជាប់ខ្លួន ដើម្បីសុភមង្គលនៃជីវិត

2019-12-16 10:00:00
ចំនួនមតិ 0 | ចំនួនចែករំលែក 0

ធ្មេចបើកៗនៅមិនយូរប៉ុន្មានទៀតទេ ឆ្នាំចាស់នឹងកន្លងផុតទៅ ផ្លាស់ចូលដល់ឆ្នាំថ្មីវិញម្តង។ មុនទទួលស្វាគមន៍ឆ្នាំ ២០២០ បើកទំព័រថ្មីនៃជីវិត គួរត្រៀមរបស់ ៥យ៉ាង ដើម្បីស្វែងរកសុភមង្គលឲ្យខ្លួនឯង។

១. បំភ្លេចរឿងអាក្រក់ៗចេញឲ្យអស់ ហើយត្រៀមចាំទទួលតែរឿងថ្មីល្អៗ

បញ្ហាតូចធំ រួមទាំងរឿងរ៉ាវមិនល្អនានា គ្មាននរណាម្នាក់ចង់ឲ្យវាកើតឡើង ឬទុកជាប់នឹងខ្លួនយូរពេកទេ។ យ៉ាងណាក៏ដោយ ក្នុងជីវិតរស់នៅប្រចាំថ្ងៃ រឿងល្អនិងអាក្រក់តែងតែដើរទន្ទឹមគ្នា មិនអាចបញ្ជាតាមចិត្តចង់បានឡើយ។ អ្វីដែលសំខាន់បំផុត តើអ្នកគួរជ្រើសរើសមួយណា ហើយគួរបោះចោលមួយណា? បើខួរក្បាលផ្ទុកតែបញ្ហា អ្នកនឹងទទួលបានអពមង្គល បើចងចាំតែរឿងល្អៗ អ្នកនឹងទទួលបានសុភមង្គលជាក់ជាមិនខាន។

២. អភ័យទោសនិងស្រលាញ់ខ្លួនឯងឲ្យបានច្រើន

ចេះអត់អោនអភ័យទោសឲ្យខ្លួនឯង មិនថាក្នុងកាលៈទេសៈបែបណាក៏ដោយ។ ការធ្វើបែបនេះ អាចជួយឲ្យអ្នកមានឱកាសច្រើន ដើម្បីខិតខំព្យាយាមបន្ត និងអាចស្វែងរកតម្រូវការពិតប្រាកដ ដោយមិនអង្គុយចាំតែស្តីបន្ទោសខ្លួនឯង ឬអោបក្រសោបវិប្បដិសារីជារៀងរហូត។ ស្រលាញ់ខ្លួនឯងឲ្យច្រើន ៗ ទើបមានកម្លាំងចិត្តទ្វេដង ក្នុងការសម្រេចក្តីស្រមៃដែលបានគ្រោងទុក។

៣. ឈប់និយាយឬនឹកគិតដល់រឿងអវិជ្ជមាន

ច្បាប់ជីវិតដ៏សំខាន់បំផុត គឺការបញ្ឈប់នូវគំនិតអវិជ្ជមាន ដែលអាចជះឥទ្ធិពលអាក្រក់ដល់អារម្មណ៍របស់អ្នក។ ជីវិតពិតជាខ្លីខ្លាំងណាស់ បើរវល់តែខ្ជះខ្ជាយពេលវេលាកើតទុក្ខស្មុគស្មាញលើសកម្រិត។ ជាពិសេស អ្នកគ្មានពេលគ្រប់គ្រាន់ ក្នុងការទទួលយករឿងវិជ្ជមានចូលមកក្នុងជីវិតនោះទេ។

៤. រក្សាជំហានឆ្ពោះទៅមុខជានិច្ច ដាច់ខាតកុំដើរបកក្រោយឲ្យសោះ មិនថាផ្លូវដែលអ្នកបានជ្រើសរើស មានឧបសគ្គលំបាកខ្លាំងយ៉ាងណាក៏ដោយ។ ត្រូវតែប្រើភាពវៃឆ្លាត រកដំណោះស្រាយសមគួរ ដើម្បីជម្នះនូវបញ្ហាទាំងនោះ។ មិនត្រូវបណ្តោយឲ្យអ្នកដទៃឬមជ្ឈដ្ឋានខាងក្រៅណាមួយ មកអូសទាញ រារាំងអ្នកមិនឲ្យរីកចម្រើនលូតលាស់ទៅមុខនោះទេ។ ពេលវេលាដើរចេះតែដើរទៅមុខ អ្នកក៏ត្រូវតែដើរឬរត់ឲ្យទាន់វាជានិច្ច។

៥. បរាជ័យខ្លះក៏មិនអីដែរ

គ្មាននរណាម្នាក់កើតមកមានតែចំណុចល្អឥតខ្ចោះឡើយ។ ជួនកាលគួរសាកល្បងឲ្យជីវិតស្គាល់រសជាតិបរាជ័យខ្លះក៏ល្អដែរ។ ពេលនោះហើយ អ្នកនឹងអាចអភិវឌ្ឍខ្លួនឯង កាន់តែប្រសើរ និងអាចស្វែងរកនូវអ្វី ដែលគួរយកមកប្រើប្រាស់ឲ្យមានប្រសិទ្ធភាពជាងមុន។ បើគ្មានកំហុសសោះ ធ្វើម៉េចទើបអាចរកបទពិសោធន៍ឲ្យខ្លួនឯងនិងរកវិធីទប់ស្កាត់ការពារនាពេលអនាគតទៅ?

មុននឹងបោះជំហាន ឈានចូលទៅឆ្នាំថ្មីឆាប់ៗនេះ សង្ឃឹមថាអ្នកទាំងអស់គ្នា បានត្រៀមខ្លួនរួចរាល់ ក្នុងការបង្កើតសុភមង្គលសម្រាប់ខ្លួនឯង៕