៥ វិធី ជួយឲ្យជីវិតស្រស់ថ្លា ធ្វើការដោយក្តីរីករាយរាល់ថ្ងៃ
- 2019-12-03 08:35:00
- ចំនួនមតិ 0 | ចំនួនចែករំលែក 0
៥ វិធី ជួយឲ្យជីវិតស្រស់ថ្លា ធ្វើការដោយក្តីរីករាយរាល់ថ្ងៃ
រៀងរាល់ព្រឹកពេកភ្ញាក់ឡើង អ្នកអាចនឹងមានអារម្មណ៍នឿយហត់អស់កម្លាំងទាំងមិនទាន់បានធ្វើអ្វីសោះ។ ដោយសារគិតដល់ការងារផង ភាពមមាញឹកសព្វគ្រប់ផង ទើបបណ្តាលឲ្យអ្នកធុញថប់ ខ្វះក្តីសុខ គ្មានថាមពលគ្រប់គ្រាន់ មុនចេញទៅបំពេញកិច្ចការផ្សេងៗទាំងក្នុងនិងក្រៅផ្ទះ។ ដើម្បីជួយឲ្យជីវិតស្រស់ថ្លា ធ្វើការប្រកបដោយប្រសិទ្ធភាព អ្នកគួរប្រើវិធីសាស្រ្តល្អៗ សម្រាប់លើកទឹកចិត្តខ្លួនឯងជារៀងរាល់ថ្ងៃ។
បង្កើនកម្លាំងថាមពលដោយបន្តគំនិតវិជ្ជមានជានិច្ច
ខ្វះមិនបានទេក្នុងជីវិតរស់នៅប្រចាំថ្ងៃ ប្រសិនបើអ្នកបើកភ្នែកឡើង គិតរឿងល្អៗ នោះថ្ងៃថ្មីរបស់អ្នកនឹងសម្បូរទៅដោយរឿងស្រស់បំព្រង អារម្មណ៍ក៏ល្អ និងមិនដើរជះកំហឹងដាក់មនុស្សជុំវិញខ្លួន ទាំងគេមិនបានធ្វើអីប៉ះពាល់អ្នកសូម្បីបន្តិច។ បន្ទាប់ពីភ្ញាក់ដឹងខ្លួន គួរផឹកទឹកមួយកែវ ស្តាប់ចម្រៀងដែលអ្នកចូលចិត្ត ដើម្បីអាចចេញដំណើរមកធ្វើការ ដោយមិនកាន់យកភាពស្រ្តេសមកជាមួយ។
ឆ្លៀតពេលបន្តិចដើម្បីឲ្យខ្លួនអ្នកបានសម្រាក
ក្នុងអំឡុងពេលធ្វើការងារ អ្នកត្រូវបន្តភាពសប្បាយរីករាយ ដោយការធ្វើអ្វីដែលខ្លួនចូលចិត្ត ដូចជាការញ៉ាំអាហារថ្ងៃត្រង់ឆ្ងាញ់ៗជាដើម។ មួយវិញទៀត អ្នកអាចចែករំលែករឿងរ៉ាវពីនេះពីនោះ ជាមួយមិត្តរួមការងារ ដើម្បីបង្កើនទំនាក់ទំនងល្អ និងបង្កបរិយាកាសស្រស់ស្រាយ មិនគួរឲ្យធុញ។ ជាពិសេស នៅថ្ងៃបន្ទាប់ធានាថា អ្នកនឹងឧស្សាហ៍ចង់តែក្រោកមកធ្វើការមិនខានទេ។
មានគម្រោងសប្បាយៗបន្ទាប់ពីបញ្ចប់ការងាររួច
បន្ទាប់ពីបញ្ចប់ការងារពិបាកៗរួច ប្រៀបបានដូចជារសាយទម្ងន់ស្រាលខ្លួនជាងមុន ដូច្នេះហើយអ្នកប្រាកដជាមិនចង់ស្ពាយបញ្ហាស្មុគស្មាញជាប់ខ្លួនរហូតដែរ។ យ៉ាងហោចណាស់ គួរមានកាដូសម្រាប់ខ្លួនឯង ចេះបង្កើតគម្រោងសប្បាយៗជុំគ្នាខ្លះ ទើបអាចបន្តកម្លាំងចិត្តទៅមុខបានវែងឆ្ងាយតទៀត។
ស្លៀកសម្លៀកបំពាក់ដែលអាចបង្កើនទំនុកចិត្ត
សូម្បីតែការស្លៀកពាក់ ក៏អាចនាំអ្នកឆ្ពោះទៅកាន់ភាពជោគជ័យបានដែរ ព្រោះអ្នកអាចបង្កើនទំនុកចិត្តដល់ខ្លួនឯង សប្បាយរីករាយជាមួយនឹងស្ទីលផ្ទាល់ខ្លួន ចែងចាំងតាមសម្លៀកបំពាក់។ នៅពេលអ្នកស្លៀកពាក់ស្អាតបាត អ្នកក៏អាចទទួលបានពាក្យសរសើរពីមិត្តរួមការងារ បង្កើនស្នាមញញឹម និងការជឿជាក់ទៅវិញទៅមក។
ធ្វើផែនការសម្រាប់រយៈពេល១សប្តាហ៍
មនុស្សរាល់គ្នា គួរចេះធ្វើផែនការដោយខ្លួនឯង ដើម្បីដឹងច្បាស់ថា ក្នុងមួយសប្ដាហ៍ តើគួរធ្វើអ្វីទុកអ្វី ដើម្បីអាចបែងចែក រវាងការងារ និងទុកពេលវេលាខ្លះ សម្រាប់សម្រាកលំហែបន្ធូរអារម្មណ៍តានតឹង ព្រមទាំង អាចចំណាយពេលនៅជាមួយក្រុមគ្រួសារ និងមនុស្សដែលខ្លួនស្រលាញ់។
បើអ្នកអាចអនុវត្តបាន អ្នកនឹងសង្កេតឃើញថា ជារៀងរាល់ថ្ងៃ ការងារមិនគួរឲ្យធុញទ្រាំដូចអ្វីដែលធ្លាប់បានគិតទេ ហើយអ្នកក៏អាចធ្វើកិច្ចការនានាដោយជោគជ័យមានក្តីសុខជានិច្ច៕
ចុចអានបន្ត៖ ទម្លាប់អាក្រក់ ៦យ៉ាងអាចបំផ្លាញភាពស្រស់បំព្រងនៃជីវិត