បើទុកនាងត្រឹមតែជាមិត្ត ឬ ប្អូនស្រី បុរសគួរឈប់ធ្វើរឿងទាំងនេះ ចៀសវាងការយល់ច្រឡំ
- 2019-11-28 04:25:00
- ចំនួនមតិ 0 | ចំនួនចែករំលែក 0
បើទុកនាងត្រឹមតែជាមិត្ត ឬ ប្អូនស្រី បុរសគួរឈប់ធ្វើរឿងទាំងនេះ ចៀសវាងការយល់ច្រឡំ
បុរសមួយចំនួននិយាយថា នារីៗពិបាកនឹងយកចិត្តខ្លាំងណាស់។ តើវាជាការពិត ឬ ក៏យ៉ាងណា? ចម្លើយគឺ មិនពិបាកនោះទេ នារីចូលចិត្តអំពើល្អ ចេញពីចិត្តរបស់អ្នក បើនាងសង្កេតឃើញថាអ្នកជាមនុស្សមានសុជីវធម៌ ចេះគោរពចាស់ទុំ មានចិត្តទូលាយ ជួយយកអាសារ និង ផ្តល់តម្លៃឱ្យនាង ម្លោះអ្នកបានយកឈ្នះចិត្តរបស់នាងបានមួយផ្នែកបាត់ទៅហើយ។ យ៉ាងណាមិញ បើអំពើល្អរបស់អ្នក មិនមានអត្ថន័យអ្វីលើសពីការរាប់អានធម្មតា អ្នកគួរមានការប្រុងប្រយ័ត្ននូវការយល់ច្រឡំផ្សេងៗ។ កាយវិការខាងក្រោមនេះជាអ្វីដែលបុរសគួរប្រយ័ត្ន មុនសម្តែងទៅកាន់នារីដែលខ្លួនចាត់ទុកត្រឹមមិត្ត ឬ ប្អូនស្រី៖
១. កុំហួងហែងនាងខ្លាំងពេក
បើអ្នកគ្មានគិតអ្វីលើសពីមិត្តភាព អ្នកមិនចាំបាច់ធ្វើដូចយកចិត្តទុកដាក់ ខ្វល់ខ្វាយ និង បារម្ភពីនាងខ្លាំងពេកទេ។ អ្នកដឹងទេថា ពេលដែលអ្នកធ្វើបែបនេះគឺធ្វើឱ្យនាងមានអារម្មណ៍កក់ក្តៅ និង ឆាប់ចិត្តទន់ទៀតផង។ តែមិនមែនមានន័យថា បុរសមិនគួរខ្វល់សោះនោះទេ គឺធ្វើយ៉ាងណាកុំឱ្យវាញឹកញាប់ខ្លាំងពេក ដែលអាចឱ្យនារីមានការយល់ច្រឡំ។
២. កុំនិយាយសម្តីដូចមានចិត្តលើនាង
ពាក្យសម្តីខ្លះ វាគ្រាន់តែជាការលេងសើចសម្រាប់អ្នកប៉ុន្តែវាអាចបង្កការភាន់ច្រឡំសម្រាប់នារី។ ពេលខ្លះទៀត សម្តីល្អៗ និង ការសរសើររបស់អ្នកក៏ធ្វើឱ្យនាងរំជួលចិត្ត និង ងាយក្នុងការមានចិត្តទៅកាន់អ្នកផងដែរ។ ពេលខ្លះ អ្នកមិនដឹងទេថាសម្តីល្អទាំងនោះ វាមានអត្ថន័យយ៉ាងណាសម្រាប់នាង ដូច្នេះបើមិនសូវចាំបាច់ទេ គួរទុកពាក្យទាំងនោះនិយាយទៅកាន់នារីដែលអ្នកស្រលាញ់វិញទៅ ល្អជាង។
៣. កុំបញ្ចេញកាយវិការដូចប្រចណ្ឌ
បុរសមួយចំនួនមិនមានចិត្តលើគេទេ ប៉ុន្តែបែរជាពេលខ្លះលេចចេញនូវកាយវិការ ឬ សម្តីដូចមានចិត្តប្រចណ្ឌទៅវិញ។ ជាពិសេស ការសួរនាំ ដេញដោលអំពីទំនាក់ទំនងរបស់នាង និង បុរសផ្សេងជាដើម សុទ្ធតែជាទង្វើមិនគួរធ្វើឡើយ ព្រោះវាបង្ហាញថាអ្នកខ្វល់ខ្វាយពីនាង និង ហាក់បីដូចជាខ្លាចបាត់បង់នាងអញ្ចឹង ទោះជាការពិត អ្នកគ្រាន់សួរក្នុងន័យធម្មតាក៏ដោយ។
៤. កុំធ្វើល្អពេក
បើអ្នកមិនអាចផ្តល់ក្តីស្រលាញ់ឱ្យនាងទេ អ្នកក៏មិនបាច់មកធ្វើល្អអ្វីពេកនោះដែរ ព្រោះដូចដែលបានដឹងស្រាប់ហើយ នរណាដែលមិនចូលចិត្តអំពើល្អនោះ? ការសួរសុខទុក្ខ យកអាសារ និង កំដរនាងគ្រប់ពេល មិនថាពេលនាងសប្បាយចិត្ត ឬ អារម្មណ៍មិនល្អជាដើម សុទ្ធសឹងជាកាយវិការដែលធ្វើឱ្យនាងងាយយល់ច្រឡំ និង ឆាប់មានចិត្តលើអ្នក។ បើអ្នកគង់តែដើរចេញពីនាង សូមកុំបន្សល់ទុកនូវអនុសាវរីយល្អៗដល់នាងច្រើនពេកអី ព្រោះពេលអ្នកចេញទៅ អនុសាវរីយទាំងនោះមិនបានទៅជាមួយអ្នកនោះទេ៕
ចុចអានបន្ត៖ តើធ្វើយ៉ាងណា ដើម្បីដឹងថាគេម្នាក់នោះពិតជាស្រលាញ់យើងពិតប្រាកដមែន?