តើធ្វើយ៉ាងណា ដើម្បីដឹងថាគេម្នាក់នោះពិតជាស្រលាញ់យើងពិតប្រាកដមែន?

2019-11-27 09:50:00
ចំនួនមតិ 16 | ចំនួនចែករំលែក 81

ក្តីស្រឡាញ់របស់មនុស្សម្នាក់អាចមានចំពោះក្រុមគ្រួសារ មិត្តភក្តិនិងសង្សាររបស់ខ្លួន។ សម្រាប់មិត្តនារីវិញ នៅពេលចង់ដឹងថា នរណាម្នាក់ស្រឡាញ់យើងយ៉ាងពិតប្រាកដនោះ តើមានចំណុចណាខ្លះអាចជួយបង្ហាញប្រាប់បាន? ៦ ចំណុចខាងក្រោមជួយប្រាប់មិត្តនារីឲ្យដឹងបានថាគេម្នាក់នោះពិតជាស្រឡាញ់យើងពិតប្រាកដមែនឬក៏អត់បាន រួមមាន៖

១. តែងតែដោះស្រាយបញ្ហាឲ្យអ្នក

អ្នកទាំងឡាយណាដែលស្រឡាញ់គ្នាពិតប្រាកដមែននោះ ពុំដែលបោះបង់គ្នានៅពេលមានបញ្ហាឡើយ។ ឧទាហរណ៍ នៅពេលអ្នកជួបរឿងអ្វីមួយ គេម្នាក់នោះនឹងតែងតែមកជួបអ្នកដើម្បីជួយដោះស្រាយបញ្ហាដោយមិនខ្វល់ថាគេនៅកន្លែងណាឡើយ។ នេះបញ្ជាក់ឲ្យឃើញថា គេពិតជាហួងហែងបារម្ភពីអ្នកដោយស្មោះមែន។

រូបតំណាង

២. ហ៊ាននិយាយរិះគន់ត្រង់ៗ

មានគូរស្នេហ៍មួយចំនួនឬគូរស្នេហ៍ទើបតែចាប់ផ្តើមគ្នា ប្រហែលជាមិនហ៊ាននិយាយត្រង់ៗពីចំណុចខ្វះខាតប្រាប់ទៅកាន់អ្នកឡើយ។ ផ្ទុយទៅវិញ ប្រសិនបើគេស្រឡាញ់យើងពិតប្រាកដ គេនឹងព្យាយាមនិយាយកែតម្រូវប្រាប់ពីចំណុចរិះគន់ដើម្បីឲ្យអ្នកមានភាពល្អប្រសើរឡើងវិញជាក់ជាមិនខាន។

រូបតំណាង

៣. មិនបណ្តោយឲ្យធ្វើរឿងផ្តេសផ្តាសតាមអំពើចិត្ត

មនុស្សស្រីមានទម្លាប់ខុសៗគ្នាមិនថាការសិក្សា ការរស់នៅ និងការហូបចុក។ យ៉ាងណាមិញ សម្រាប់អ្នកដែលស្រឡាញ់អ្នកពិតប្រាកដគេនិឹងមិនបណ្តោយឲ្យអ្នកធ្វើអ្វីតាមតែអំពើចិត្តនោះឡើយដូចជា រៀនច្រើនពេក ញុំាច្រើនពេក និងប្រើប្រាស់ទូរស័ព្ទលើសលប់។ នេះបង្ហាញថាគេតាមដានអ្នកដោយក្តីបារម្ភអស់ពីចិត្ត។

រូបតំណាង

៤. តែងផ្តល់ឲ្យនូវអ្វីដែលយើងចង់បាន

មនុស្សដែលស្រឡាញ់យើងគេនឹងចាប់អារម្មណ៍ពីរឿងតូចតាចពីយើងដូចជា នៅពេលអ្នកឃ្លាន ងងុយគេង អា រម្មណ៍របស់អ្នកជាដើម។ ដូច្នេះនៅពេលអ្នកត្រូវការជំនួយឬក៏ជួបស្ថានការណ៍ណាមួយ គេម្នាក់នោះតែងធ្វើរឿងដែលអ្នកចង់បានជានិច្ច។

រូបតំណាង

៥. ខ្វាយខ្វល់ពីអារម្មណ៍របស់អ្នក

អ្នកទាំងឡាយណាដែលបារម្ភពីអ្នកគេតែងតែយកអ្នកដាក់ក្នុងចិត្តជានិច្ច ហេតុដូចនេះតែងតែយកចិត្តទុកដាក់ពីអ្នក យល់ពីអារម្មណ៍របស់អ្នក។ ប្រសិនបើអ្នកសង្កេតឃើញថា គេតែងតែខ្វាយខ្វល់ពីអារម្មណ៍របស់អ្នកនោះមានន័យថាគេពិតជាស្មោះចំពោះអ្នកមែន។

រូបតំណាង

៦. ឈប់ធ្វើអ្វីដែលអ្នកមិនចូលចិត្ត

នៅពេលអ្នកមិនចង់ឲ្យគេធ្វើអ្វីមួយដូចជា ជក់បារី ញុំាស្រា ដើរលេងយប់ គេម្នាក់នោះនឹងព្យាយាមឈប់ធ្វើរឿងអស់ទាំងនោះដើម្បីអ្នក ពីព្រោះថាគេស្រឡាញ់អ្នក ដូច្នេះមានអ្វីដែលគេធ្វើមិនបាននោះទេ។