មានផ្ទៃពោះក៏នៅតែស្អាតផូរផង់គ្រប់ពេល ឲ្យតែចេះពីគន្លឹះថែរក្សាសម្រស់សំខាន់ៗ
- 2019-11-21 04:30:00
- ចំនួនមតិ 0 | ចំនួនចែករំលែក 0
មានផ្ទៃពោះក៏នៅតែស្អាតផូរផង់គ្រប់ពេល ឲ្យតែចេះពីគន្លឹះថែរក្សាសម្រស់សំខាន់ៗ
ក្នុងអំឡុងពេលមានផ្ទៃពោះ ស្រ្តីតែងជួបប្រទះនូវបញ្ហាស្បែក និងផ្លាស់ប្តូររូបរាងជាដើម។ ស្បែកប្រែជាឆាប់ប្រតិកម្មនិង មានសភាពស្តើង ដោយសារតែរងឥទ្ធិពលពីក្រពេញអ័រម៉ូនម្យ៉ាងឈ្មោះថា អង់ដូគ្រីន (endocrine)។ ហេតុនេះហើយ ដើម្បីការពារស្បែកឲ្យជៀសផុតពីបញ្ហាផ្សេងៗដូចជា មេឡាម៉ូម (ស្នាមអុចពណ៌ត្នោត) ស្នាមអុចខ្មៅ ឡើងមុន ស្បែកខ្មៅស្រអាប់...ឬបញ្ហារូបរាងកាយដូចជា ឡើងទម្ងន់ ឡើងជាតិខ្លាញ់តាមកន្លែងជាដើម ត្រូវដឹងពីគន្លឹះសំខាន់ៗ ក្នុងការថែរក្សាសម្រស់ ឲ្យស្រស់ស្អាតផូរផង់គ្រប់ពេល និងមិនបង្កគ្រោះថា្នក់ដល់សុខភាព។
**សម្រាប់បញ្ហាមុន**
អ័រម៉ូនមានការប្រែប្រួល ធ្វើឲ្យស្បែកងាយនឹងកើតមុនខ្លាំងណាស់ ដូច្នេះត្រូវតែយកចិត្តទុកដាក់ទើបបាន។ ដំបូងអ្នកត្រូវលាងសម្អាតស្បែកមុខឲ្យបាន២ដងក្នុងមួយថ្ងៃ ជាមួយនឹងសេរ៉ូមប្រៃដែលអាចរកបាននៅតាមឱសថស្ថាននានា។ គួរលាងដៃឲ្យបានស្អាត រួចយកសំឡីមកជូតជាតិកខ្វក់ឬគ្រឿងសម្អាងដែលនៅសល់ និងលាងជម្រះចេញឲ្យសព្វពេញផ្ទៃមុខជាការស្រេច។
បញ្ឈប់ទម្លាប់អាក្រក់ដោយការញេចមុន ឬស្ទាបអង្អែលលើមុខ ព្រោះបើដៃមិនស្អាត បាក់តេរីនឹងកាន់តែធ្វើឲ្យមុនយ៉ាប់លើសដើម។
វិធីធម្មជាតិដើម្បីកម្ចាត់មុន
ក្រូចឆ្មារ
ងាយៗដោយយកក្រូចឆ្មារមួយចំហៀងច្របាច់យកតែទឹក បន្ទាប់មកយកសំឡីទៅជ្រលក់ហើយយកមកតប់ថ្នមៗនៅលើមុន រួចទុកឲ្យស្ងួត និងធ្វើបែបនេះដដែលឲ្យបាន ៤-៥ដង។
*ចំណាំ៖ ក្រូចឆ្មារអាចធ្វើឲ្យមុខមានបញ្ហាប្រសិនបើអ្នកប៉ះជាមួយកម្ដៅថ្ងៃ ដូច្នេះគួរធ្វើនៅពេលល្ងាច និងត្រូវប្រយ័ត្នមិនគួរបណ្តោយឲ្យស្បែក ប៉ះនឹងពន្លឺព្រះអាទិត្យផ្ទាល់ឬយូរដាច់ខាត។
ដំឡូងបារាំងនិងទឹកដោះគោស្រស់
ជ្រើសរើសដំឡូងបារាំងដែលស្រស់និងមានគុណភាពល្អ បន្ទាប់មកចិតសំបកលាងទឹកឲ្យស្អាតហើយឈូសឬកិនឲ្យម៉ដ្ឋ។ បន្ទាប់មកទៀត ត្រូវយកវាមកលាយឲ្យសព្វជាមួយនឹងទឹកដោះគោស្រស់គ្មានជាតិស្ករ រួចលាបលើមុខ ទុកចោល ១៥-២០នាទី សឹមលាងទឹកចេញ។ ធ្វើឲ្យបានទៀងទាត់ វិធីនេះអាចជួយឲ្យស្បែកភ្លឺរលោងបែបស៊ីជម្ពូនិងមានសុខភាព។
វិធីការពារសង្វារ
ជៀសមិនផុតឡើយ ស្រ្តីពោះធំតែងជួបប្រទះបញ្ហាបែកសង្វារ ដោយសារតែការឡើងទម្ងន់។ វិធីការពារ គឺត្រូវលាបគ្រីមឬប្រេងការពារបែកសង្វារ ចាប់តាំងពីខែដំបូងដែលអ្នកពរពោះ។ អ្នកត្រូវតែឆ្លៀតលាបឲ្យបាន១-២ដងក្នុងមួយថ្ងៃកុំខានឲ្យសោះ ដើម្បីមិនឲ្យសង្វារបែកព្រោងព្រាត។ ជាពិសេស នៅត្រង់ផ្នែកពោះ មិនត្រូវលាបដោយម៉ាស្សាជារង្វង់ៗនោះទេ ព្រោះវាអាចបង្កគ្រោះថ្នាក់ដល់គភ៌។ គួរលាបដោយធ្វើការម៉ាស្សាថ្នមៗពីក្រោមឡើងលើទើបល្អ។
*បញ្ហាបែកសង្វារបានកើតឡើងចំពោះស្រ្តីពោះធំ ដល់ទៅជាង ៨០% ឯណោះ ហើយអ្នកខ្លះទៀតក៏បានជួបបញ្ហារមាស់ គ្មានផាសុកភាពក៏មាន។ ហេតុនេះមានកត្តាសំខាន់ៗមួយចំនួន ដែលអ្នកមិនគួរមើលរំលងដូចជា៖
ញ៉ាំអាហារដែលជីវជាតិល្អៗឲ្យបានគ្រប់គ្រាន់ ព្យាយាមការពារកុំឲ្យឡើងគីឡូលឿនខ្លាំងពេក។
ជៀសវាងប្រើប្រាស់ផលិតផលដែលគ្មានប្រភពច្បាស់លាស់ ឭតាមគេតាមឯង ជាពិសេសមិនត្រូវលាបផលិតផលប៉ះពាល់សុខភាព ដែលមានសារធាតុដូចជា parabens petroleum propylene or butylene glycol និង sodium lauryl sulfate ដាច់ខាត។
វិធីបំបាត់ស្នាមមុន
ទឹកល្មៀត៖ ដាក់ម្សៅល្មៀត២ស្លាបព្រាកាហ្វេ ចូលទៅក្នុងទឹកក្តៅឧណ្ណៗចំណុះ ២០០មល កូរឲ្យសព្វ រួចអាចផឹកបានហើយ។ ដើម្បីបង្កើនរសជាតិ អ្នកអាចបន្ថែមទឹកសណ្តែក ឬទឹកដោះគោស្រស់ដែលគ្មានជាតិស្ករចូលក៏បាន។ បើរាងកាយមិនក្តៅក្នុង អ្នកក៏អាចលាយទឹកល្មៀតជាមួយទឹកឃ្មុំបានដែរ។ វិធីនេះមិនត្រឹមតែជួយបំបាត់ស្នាមមុនប៉ុណ្ណោះទេ ថែមទាំងល្អសម្រាប់ប្រព័ន្ធរំលាយអាហារ និងកាត់បន្ថយអាការៈទល់លាមក។
ម៉ាស់ល្មៀត៖ យកម្សៅល្មៀត២ស្លាបព្រាកាហ្វេ លាយគ្នាជាមួយយ៉ាអួគ្មានជាតិស្ករកន្លះប្រអប់ បន្ទាប់មកលាបនៅមុខ ទុកចោល ១៥-២០នាទី សឹមលាងទឹកចេញ និងជូតជាមួយកន្សែងស្អាត។
ក្រៅពីមានសុភមង្គលក្នុងការទន្ទឹងរង់ចាំកូនជាទីស្រលាញ់ អ្នកម្តាយគ្រប់រូប ក៏មិនត្រូវភ្លេចពីការថែរក្សាសម្រស់ដែរ៕
ចុចអានបន្ត៖ មុនពេលចូលគេង បើអ្នកនៅតែមានទម្លាប់បែបនេះទៀត ប្រយ័ត្នស៊យធំ