អ្នកចូលចិត្តហាត់ប្រាណ គួរដឹងពីវិធីថែសម្រស់តាម ៤ ចំណុចនេះ

2019-10-28 09:05:00
ចំនួនមតិ 0 | ចំនួនចែករំលែក 0

ប្រសិនបើអ្នកជាមនុស្សដែលចូលចិត្តលេងកីឡាឬការធ្វើលំហាត់ប្រាណអ្នកគួរតែស្វែងយល់អំពីគន្លឹះខ្លះៗខាងក្រោមនេះដើម្បីជៀសវាងការមានបញ្ហាចំពោះស្បែកមុខរបស់អ្នក។

រូបតំណាង

**១. លាងសម្អាតផ្ទៃមុខឱ្យបានស្អាតជាមុនសិន**

មុននឹងចេញទៅហាត់ប្រាណឬលេងកីឡាអ្នកគួរតែធ្វើការលាងសម្អាតផ្ទៃមុខឱ្យបានជម្រះរាល់កម្ទេចធូលីឬ Make Up ដែលមាននៅលើផ្ទៃមុខដើម្បីជៀសវាងការជ្រៀបចូលនៃជាតិកខ្វក់ទាំងអស់នោះចូលទៅក្នុងស្បែកមុខជាដើម។ ការជ្រៀបចូលនេះផងដែរក៏អាចបណ្តាលឱ្យមានបញ្ហាដូចជាការកើតមុនសាច់ឬឡើងជាកន្ទួលរមាស់ផ្សេងៗ។

រូបតំណាង

២. លាបឡេការពារកម្តៅថ្ងៃ

សម្រាប់អ្នកដែលត្រូវចេញទៅហាត់ប្រាណនៅខាងក្រៅ គួរតែមានឡេការពារកម្តៅដើម្បីជួយទប់ស្កាត់នូវកម្តៅថ្ងៃដែលអាចជះមកចំផ្ទៃមុខ ដែលអាចបណ្តាលឱ្យមានស្នាមជ្រីវជ្រួញឬស្នាមជាំនៅលើមុខ។

រូបតំណាង

៣. ហាមយកដៃមកប៉ះផ្ទៃមុខកំឡុងពេលកំពុងហាត់ប្រាណ ឬ លេងកីឡា

នៅពេលអ្នកហាត់ប្រាណអ្នកនឹងមានការប៉ះពាល់ជាមួយដីឬមេរោគផ្សេងៗ ជាពិសេសគឺតាមរយៈឧបករណ៍ហាត់ប្រាណជាដើម ដូច្នេះអ្នកមិនត្រូវយកដៃដែលបានប៉ះជាមួយនឹងឧបករណ៍ឬសម្ភារៈទាំងនោះរួចមកប៉ះផ្ទៃមុខឡើយ។ ការយកដៃមកប៉ះស្បែកមុខនេះផងដែរ ក៏អាចបណ្តាលឱ្យឡើងជាកន្ទួលរមាស់ មុនឬអាចបណ្តាលឱ្យមានបញ្ហាស្បែកមុខផ្សេងៗទៀតសម្រាប់អ្នកស្បែកមានប្រតិកម្ម។

រូបតំណាង

៤. លាងមុខឱ្យបានស្អាតម្តងទៀតពេលហាត់រួច

ដូចគ្នាជាមួយពេលមុនទៅហាត់ប្រាណនោះផងដែរ គឺយើងគួរតែលាងសម្អាតផ្ទៃមុខក្រោយពេលហាត់ប្រាណឬលេងកីឡានានាដើម្បីជៀសវាងនូវការកើតមុនឬប្រតិកម្មផេ្សងៗនៅលើផ្ទៃមុខ។ ដូចនេះ ពេលហាត់រួចរាល់ អ្នកគ្រាន់តែយកក្រណាត់ស្អាតមួយយកមកផ្តិតលើមុខថ្នមៗដើម្បីជូតញើសដែលកខ្វក់នោះចេញ រួចហើយលាងសម្អាតជាមួយហ្វូមលាងមុខដែលមិនសូវមានជាតិកាត់ដល់ស្បែកមុខនោះជាការស្រេច៕