ដុតទៀនរាងបេះដូងសារភាពស្នេហ៍ស្មានតែបានរ៉ូមេនទិក ពូសន្តិសុខពន្លត់ខ្ទេច អ្នកអត់គូពេញចិត្តស្ដូក

2019-10-21 03:40:00
ចំនួនមតិ 0 | ចំនួនចែករំលែក 0

ស្មានតែដុតទៀនសុំស្នេហ៍ហើយនឹងបានគេសរសើរថាពូកែរ៉ូមេនទិក តែបុរសម្នាក់បានត្រឹមស្រងាកចិត្តនៅពេលពូសន្តិសុខបានពន្លត់ភ្លើងទៀនខ្ទេចខ្ទី មិនបានសារភាពស្នេហ៍អ្វីទាំងអស់។

សារភាពស្នេហ៍នៅទីសាធារណៈគឺជាវិធីបង្ហាញមនោសញ្ចេនតនាដែលចង់ឲ្យមនុស្សច្រើនបានដឹងពីជម្រៅចិត្តរបស់ខ្លួន។ ពីមួយថ្ងៃទៅមួយថ្ងៃ វិធីសារភាពស្នេហ៍ជាសាធារណៈបែបនេះក៏ចាប់ផ្ដើមពេញនិយមផងដែរ ដោយមានអ្នកធ្វើតាមជាច្រើន។

យ៉ាងណាក្ដី ផលលំបាកនៃការសារភាពស្នេហ៍បែបនេះគឺ ត្រូវចំណាយពេលវេលា ក៏ដូចជាថវិកាច្រើនដើម្បីត្រៀម។ រឹតតែពិបាកទទួលយកជាងគេទៀតនោះគឺ ត្រូវបានគេបដិសេធនៅកណ្ដាលហ្វូងមនុស្សជាច្រើន។ តែក្រៅពីចំណុចអវិជ្ជមានខាងលើ នៅពេលនេះទើបតែលេចចំណុចពិបាកមួយទៀតនៅពេលសារភាពស្នេហ៍នៅទីសាធារណៈ។ ជាក់ស្ដែង មុននេះបន្តិច បុរសជានិស្សិតសកលវិទ្យាល័យមកពីប្រទេសចិន បានពឹងមិត្តភ័ក្ដិខ្លួនច្រើននាក់ដើម្បីរៀបចំទៀនជារាងបេះដូងដើម្បីសារភាពស្នេហ៍ចំពោះមនុស្សដែលខ្លួនលួចស្រលាញ់ជាយូរមកហើយ។

ខណៈភាគច្រើនគេត្រូវស្រងាកចិត្តដោយសារតែភាគីម្ខាងទៀត បដិសេធមិនព្រមទទួលយកក្ដីស្រលាញ់នោះ។ បុរសខាងលើបែរជាត្រូវខកចិត្តដោយសារពូសន្តិសុខសាលាទៅវិញ។

តាមនោះដែរ ខណៈលោកត្រៀមសារភាពស្នេហ៍ចំពោះមុខមនុស្សរាប់រយនាក់នោះ ស្រាប់តែពូសន្តិសុខ២នាក់កាន់បំពង់ពន្លត់អគ្គិភ័យមកបាញ់ពន្លត់ទៀនអស់ ធ្វើឲ្យគេលែងបានសារភាពអ្វីទាំងអស់។ ខណៈអ្នកខ្លះអាណិតបុរសខាងលើព្រោះខំត្រៀមដើម្បីសុំស្នេហ៍គេតែមិនបានសម្រេចនោះ តែអ្នកអត់គូហាក់ពេញចិត្តនឹងសកម្មភាពរបស់ពូសន្តិសុខខ្លាំងណាស់ ព្រោះនឹងធ្វើឲ្យបុរសរូបនេះសារភាពមិនបានសម្រេច ហើយអត់គូដូចពួកគេដែរ៕

ចុចអាន៖ ស្រីស្អាតម្នាក់ ធ្វើឲ្យគេស្រឡាំងកាំងដោយសារផ្ទះមិនខុសពីគំនរសំរាម

ប្រភព៖ Kenh14 ប្រែសម្រួល៖ Caramel