ឈប់ផឹកតែទឹកដោះគោ៤ខែ ក្មេងស្រីម្នាក់សន្សំលុយទិញបានសំបុត្រយន្តហោះ ផ្អើលបណ្តាញសង្គម

2019-10-10 07:45:00
ចំនួនមតិ 0 | ចំនួនចែករំលែក 0

ក្មេងស្រីជនជាតិម៉ាឡេស៊ីម្នាក់ចូលចិត្តដំណើរកម្សាន្តណាស់ ប៉ុន្តែអ្វីដែលពិបាកបំផុតនោះគឺនាងគ្មានលុយគ្រាប់គ្រាន់នោះទេ។ ម្ល៉ោះហើយ នាងក៏សម្រេចចិត្តបោះបង់ទម្លាប់ផឹកតែទឹកដោះគោហើយយកលុយនោះមកសន្សំ រហូតអាចទិញសំបុត្រយន្តហោះទៅលេងក្រៅប្រទេសបានយ៉ាងភ្ញាក់ផ្អើល។

ក្មេងស្រីរូបនេះ ពីដើមឡើយនាងជាមនុស្សញៀននឹងផឹកតែទឹកដោះគោណាស់។ យ៉ាងហោចមួយថ្ងៃ ក៏ផឹកអស់ ២ - ៣ កែវដែរ។ រហូតដល់ នាងត្រូវមិត្តភក្កិដាក់រហស្សនាមថា អ្នកឯកទេសតែគុជទឹកដោះគោ។ នាមជាអ្នកញៀននិងចូលចិត្តស្ទើរស្លាប់ដល់ថ្នាក់នេះ នាងមិនអាចអត់ផឹកតែទឹកដោះគោបានទេ សូម្បីមួយថ្ងៃ។ គាប់ជួនកាលពីខែឧសភា មិត្តរបស់នាងម្នាក់បាននិយាយថា ៖ "បើមើលតាមរូបភាពដែលឯងបង្ហោះក្នុងបណ្ដាញសង្គម ខ្ញុំអាចរាប់ចំនួនកែវដែលឯងផឹកបាន។ បើគិតជាលុយវិញ គឺល្មមនឹងទិញបានសំបុត្រយន្តហោះទៅដើរលេងនៅថៃបាន។ តើឯងចង់ទៅលេងប្រទេសថៃឬអត់?”

ភ្លាមៗនោះ បន្ទាប់ពីជជែកជាមួយមិត្តភក្កិហើយ ក្មេងស្រីឯកទេសតែគុជទឹកដោះគោចាប់ផ្ដើមគិតម្ដងទៀតអំពីចំនួនលុយដែលនាងចំណាយ។ នាងថែមទាំងសរសេរជាបញ្ជីនិងគណនាយ៉ាងល្អិតល្អន់ពីទឹកប្រាក់ទាំងនោះ។ ពេលនោះ ពិតជាដូចសំដីរបស់មិត្តនាងនិយាយមែន លុយដែលនាងបានចាយលើតែគុជ ពិតជាច្រើនពេកហើយ។ ក្រោយមក នាងសុខចិត្តអត់ទ្រាំមិនទិញវា រយៈពេល៤ខែ ក៏សន្សំបានសំបុត្រយន្តហោះទៅលេងក្រៅប្រទេសមែន។

ក្រោយពេលក្មេងស្រីម៉ាឡេស៊ីរូបនេះបានផុសចែករំលែករឿងរ៉ាវផ្ទាល់ខ្លួនលើបណ្ដាញសង្គម ទទួលបានការ Like , Comment និង Share រាប់ពាន់។ ក្នុងនោះក៏មានអ្នកខ្លះ Comment ថា៖

-ខ្ញុំក៏ជាអ្នកញៀនតែទឹកដោះគោដែរ ខ្ញុំសាកល្បងអត់ផឹកតែទឹកដោះគោមួយកែវមួយថ្ងៃ ឥលូវមានអីខ្ញុំមានលុយគ្រប់គ្រាន់អាចទៅដើរលេងនៅអឺរ៉ុបម្តងទៀតហើយ។

-អូយ! បន្ទាប់ពីអានរឿងនេះហើយ ខ្ញុំធានាថាឈប់ផឹកតែទឹកដោះគោទៀតហើយ ដល់ពេលសន្សំលុយដើរលេងវិញល្អជាង។

-ខ្ញុំដឹងថាញៀន តែនៅមិនអាចកាត់ផ្តាច់បាន។

-ពេលខ្លះ ខ្ញុំពិតជាស្ដាយលុយណាស់។ តែទឹកដោះគោមិនថោកទេ ប៉ុន្តែបើខ្ញុំមិនផឹក ខ្ញុំទ្រាំមិនបាន។ វាឆ្ងាញ់ពេកហើយ តើមានមនុស្សប៉ុន្មាននាក់ទៅដែលកំពុងញៀនវា?