ស្ទើរស្រលាញ់ស្ទើរស្អប់ រសជាតិល្វីងបំផុតដែលអ្នកឲ្យ ចុងក្រោយខ្ញុំយំម្នាក់ឯង

2019-10-08 09:15:00
ចំនួនមតិ 0 | ចំនួនចែករំលែក 0

និយាយដល់ថ្ងៃនេះ ខ្ញុំទទួលស្គាល់ថានៅគិតពីអ្នក តែនោះមកពីកំហុសខ្ញុំ បើខ្ញុំឈប់ចូលមើល Profile អ្នកទៀត មិនមើលអនុស្សាវរីយ៍ចាស់ៗ ធ្វើចិត្តឲ្យដាច់ជាងនេះ ប្រហែលពេលនេះខ្ញុំមិនឈឺចាប់ដល់ម្លឹងទេ។ ពេលខ្ញុំខូចចិត្តដោយសារអ្នក សុខភាពខ្ញុំតែងចុះខ្សោយ សក់ជ្រុះ ឆាប់ខឹង ហើយមានអារម្មណ៍មិនល្អ។ ដើម្បីមនុស្សក្បត់ម្នាក់ ខ្ញុំលះបង់ច្រើនដល់ថ្នាក់នេះទាំងដឹងថាគ្មានបានអ្វីតបស្នង បានត្រឹមតែខូចចិត្តម្នាក់ឯង។

ថ្ងៃនេះខ្ញុំខូចចិត្តម្ដងទៀតនៅពេលដឹងថា អ្នកអត់ទ្រខ្ញុំសូម្បីបន្តិចសោះ អ្នកគ្មានសូម្បីរវល់នឹងខ្ញុំបន្តិច អ្នកចាត់ទុកខ្ញុំជារបៀបមានក៏បាន អត់ក៏បាន អត់សំខាន់។ ពីដើមមក ខ្ញុំគិតម្នាក់ឯងថាអ្នកឲ្យតម្លៃខ្ញុំ ថាអ្នកខ្វល់ពីខ្ញុំ តែការពិតអត់ទេ គឺអ្នកអត់ខ្វល់ ។ សូម្បីតែខ្ញុំខឹង សូម្បីតែអ្នកខុសក៏អ្នកធ្វើឬកឡូយអត់លួងខ្ញុំដែរ។

នេះមកពីខ្ញុំគ្មានសូម្បីនៅក្នុងខួរក្បាលរបស់អ្នក ខ្ញុំប្រៀបដូចជាក្រដាសមួយដែលគ្រាន់តែត្រូវខ្យល់ប៉ើងកាត់មុខអ្នកប៉ុណ្ណោះ។ អ្នកបារម្ភតែមនុស្សស្រីដែលជាសង្សារថ្មីរបស់អ្នក អ្នកខ្លាចគេ អ្នកសុំទោសគេពេលអ្នកនិយាយស្ដីមិនសមរម្យ អ្នកខ្វល់ពីគេណាស់ ឲ្យតម្លៃគេគ្រប់យ៉ាង។ ចំណែកខ្ញុំមានអីទៅប្រៀបនឹងគេបាន ដូច្នេះគួរតែដកខ្លួនតាមរបៀបស្ងប់ស្ងាត់បែបនេះក៏ល្អដែរ។ ខ្ញុំប្រហែលជាហត់ហើយ គឺហត់នឹងវិលរកអតីតកាលដែលគ្មានថ្ងៃត្រលប់ជាថ្មី អតីតកាលដែលអ្នកបានផ្លាស់ប្ដូរហើយ។ ពេលនេះ ខ្ញុំគួរតែកាត់ចិត្តបានហើយ។

ពេលមនុស្សម្នាក់គេអត់ស្រលាញ់យើង គេនឹងមិនខ្វល់ថាតើយើងខឹងគេឬអត់? គេមិននឹកយើង គេមិនប្រើពាក្យពីរោះ គេក៏មិនបារម្ភថាយើងឈឺចាប់ឬអត់ រឹតតែមិនបកស្រាយអ្វីទាំងអស់។ បើយើងនឹកគេ យើងទៅរកគេ គេកាន់តែបានចិត្ត ហើយមិនឲ្យតម្លៃយើង។ មិនមែនគេអាណិត គេមកខ្វល់ពីយើងទេ។ គេនឹងបន្ថែមឲ្យយើងឈឺចាប់ទៀត ដោយការបញ្ឈឺព្រោះគេចង់ឲ្យយើងចាកចេញ តែយើងនៅមុខក្រាស់។ បើយើងនៅតោងទាម គេកាន់តែគ្មានយើងក្នុងភ្នែកព្រោះគេគិតថាយើងអត់គេមិនបាន។ គេមិនមែនសុខចិត្តធ្វើឲ្យយើងសប្បាយចិត្តទេ តែគេនឹងផ្ដល់ឲ្យនូវជម្រើសមិនអាចទៅរួចមួយ។

រសជាតិស្ទើរស្រលាញ់ស្ទើរស្អប់ដែលអ្នកផ្ដល់ឲ្យខ្ញុំ គឺខ្ញុំស្ទើរក្លាយជាមនុស្សឆ្កួត វិលវល់ទៅជាឈឺក៏មាន។ ជីវិតខ្ញុំដុនដាប មួម៉ៅពេលដឹងថាអ្នកនិងសង្សារស្រលាញ់គ្នាបេះមិនចេញ។ ខ្ញុំថ្ងៃនេះ ទទួលបានគ្រប់រសជាតិទាំងអស់ពីអ្នក គឺរសជាតិចុងក្រោយដែលល្វីងបំផុតរហូតខ្ញុំឆ្អែតលែងហាមាត់រួច សុំឲ្យគ្រប់យ៉ាងត្រលប់វិញ។

ថ្ងៃនេះ ខ្ញុំដឹងថាវាចប់ហើយ ទោះអ្នកនឹងគេបែកគ្នា ក៏ខ្ញុំមិនមែនជាជម្រើសដែលអ្នកត្រូវការ រឹតតែគ្មានផ្លូវដែលអ្នកនិងគេបែកគ្នា រឹតតែគ្មានផ្លូវដែលខ្ញុំលើកលែងទោសឲ្យអ្នក។ ដូច្នេះ សរុបទៅយើងគ្មានថ្ងៃជួបគ្នា យើងគ្មានថ្ងៃល្អនឹងគ្នាទេ។ បើដឹងលទ្ធផលរួចទៅហើយ ទោះខ្ញុំនឹកអ្នក ខ្វល់ពីអ្នក ស្អប់អ្នក ខូចចិត្តទៀតក៏អត់បានអីមកវិញដែរ។ មានតែឲ្យពេលវេលាបញ្ចប់ចំណងនេះ ហើយខ្ញុំជូនពរខ្លួនឯងឲ្យឆាប់ជួបបុរសជាគូព្រេងរបស់ខ្ញុំ៕

ចុចអាន៖ ងាកមើលអតីតកាលខ្ញុំឈឺចាប់ តែពេលនេះខ្ញុំប្រសើរជាងមុនក្រោយដឹងការពិតពីអ្នកច្បាស់

អត្ថបទ៖ លឹម សុនា