ក្បាច់ការពារខ្លួន ៥ ស្រីៗគួរចេះសម្រាប់តតាំងជាមួយជនខិលខូច

2019-10-03 10:20:00
ចំនួនមតិ 0 | ចំនួនចែករំលែក 0

សព្វថ្ងៃនេះ មិនថាទៅដល់ទីណា គ្រោះថ្នាក់អាចកើតឡើងចំពោះអ្នកគ្រប់ពេលវេលា។ មនុស្សប្រុសអាងកម្លាំងដើម្បីការពារខ្លួន ប៉ុន្តែស្រីៗក៏គួរតែចេះក្បាច់សំខាន់ៗ ទុកសម្រាប់តទល់ជាមួយជនខិលខូចណាមួយ ដែលមានបំណងមិនល្អមកលើអ្នក។ យ៉ាងហោចណាស់ អ្នកអាចគេចផុតពីហានិភ័យបានមួយគ្រា ប្រសើរជាងការភ័យស្លន់ស្លោ មិនដឹងថាត្រូវធ្វើបែបណាដែរ។

១. នៅពេលមានគេមកចាប់កដៃរបស់អ្នក

ក្នុងករណីនេះ អ្វីដែលត្រូវធ្វើគឺ យកដៃទាំងសងខាងកាន់ផ្អោបគ្នាឲ្យណែន ហើយព្យាយាមប្រើកម្លាំងគ្រលាស់កែងដៃចុះក្រោមឲ្យរហ័សបំផុតតាមដែលអាចធ្វើទៅបាន។ ធ្វើបែបនេះ ជនខិលខូចនឹងមិនអាចចាប់ដៃរបស់អ្នកជាប់ទៀតទេ។

២. នៅពេលមានគេចាប់ឱបពីក្រោយ

ត្រូវទប់អារម្មណ៍កុំភ័យស្លន់ស្លោ បន្ទាប់មកព្យាយាមទាញខ្លួនជនខិលខូចឲ្យកៀកនឹងអ្នក ដើម្បីឲ្យដៃរបស់គេ រលុងជាងមុនបន្តិច ទើបអាចប្រើកែងដៃវាយបកត្រលប់ទៅវិញ ហើយកុំភ្លេចប្រើជង្គង់ទាត់ឲ្យចំកន្លែងពិសេស។

៣. នៅពេលមានគេចាប់ឱបលើកឡើងពីក្រោយ

នៅពេលដឹងថាមានមនុស្សចាប់លើកអ្នកពីក្រោយបែបនេះ ត្រូវលើកជើងទាំងពីរឡើងហើយធាក់ឲ្យញាប់។ តិចនិកនេះ អាចធ្វើឲ្យជនខិលខូច របូតដៃប្រលែងអ្នកមកវិញ។

៤. នៅពេលមានគេច្របាច់ក

ក្នុងស្ថានភាពបែបនេះ ត្រូវលើកដៃម្ខាងឡើងលើឲ្យខ្ពស់ បន្ទាប់មកត្រូវខំប្រឹងប្រើកម្លាំងដៃនិងទម្លាក់ដងខ្លួនមកផ្នែកម្ខាងទៀត ដើម្បីឲ្យដៃជនខិលខូចរបូតពីករបស់អ្នក។ ពេលងើបមកវិញ ត្រូវប្រើកែងដៃវាយឲ្យចំមុខគេតែម្តង។

៥. នៅពេលមានគេចាប់ទាញសក់ពីក្រោយ

វាជាការវាយប្រហារដែលកើតឡើងញឹកញាប់ជាងគេ ប្រសិនបើអ្នកជួបករណីបែបនេះ មិនចាំបាច់ខំប្រឹងប្រលេះសក់ចេញនោះទេ ប៉ុន្តែត្រូវព្យាយាម ប្រើដៃទាំងពីរ ដើម្បីចាប់ដៃជនខិលខូចឲ្យជាប់ ហើយកុំភ្លេចដាក់កែងដៃទាំងសងខាងដើម្បីការពារមុខ បន្ទាប់មកទាញដៃគេបកត្រលប់មកក្រោយ ដើម្បីរួចផុតពីគ្រោះថ្នាក់៕

ចុចអានបន្ត៖ គុណប្រយោជន៍ធំៗ ៦ នៃការក្រោកពីព្រលឹមជាប្រចាំ អ្នកដេកស្ពឹកគ្មានថ្ងៃទទួលបានឡើយ

ប្រភព៖ bestie ប្រែសម្រួល៖ ដេត ឈុនអ៉ី