ម្តាយក្មេកល្អមិនដែលធ្វើរឿងទាំងនេះដាក់កូនប្រសាដាច់ខាត

2019-10-03 08:00:00
ចំនួនមតិ 0 | ចំនួនចែករំលែក 0

ចាប់តាំងពីតូចក្រូចឆ្មា មានតែម្តាយនេះហើយ ដែលធ្លាប់បានឆ្លងកាត់រឿងរ៉ាវជាច្រើនជាមួយកូន។ ពេលដែលកូនទើបតែដុះធ្មេញដំបូង ចេះនិយាយពាក្យដំបូង ចូលរៀនថ្ងៃដំបូង ទទួលបានពានរង្វាន់លើកដំបូង រហូតដល់ថ្ងៃបញ្ចប់ការសិក្សា រួមទាំងសកម្មភាពជាច្រើនរាប់មិនអស់ អ្នកម្តាយតែងមានចិត្តរំភើបត្រេកអរជំនួសកូន។

រូបតំណាង

ឈានចូលដល់ថ្ងៃដែលកូនរៀបការ សុភមង្គលអាចកើតឡើងទៅបាន លុះត្រាតែមានការចូលរួមចំណែកពីគ្រួសារទាំងសងខាង។ ដរាបណាមានវត្តមានកូនប្រសាស្រីចូលក្នុងសមាជិកគ្រួសារម្នាក់ទៀត មានរឿងមួយចំនួនដែលម្តាយក្មេកមិនគួរធ្វើដាក់នាង។

រិះគន់តិះដៀលកូនប្រសាឬក្រុមគ្រួសាររបស់នាង

រូបតំណាង

ពាក្យសម្តីជាអ្វីដែលត្រូវប្រុងប្រយ័ត្នបំផុត មិនគួរតិះដៀលស្តីបន្ទោសខ្លាំងៗ ដៀមដាមវែងឆ្ងាយ ដោយសារតែកំហុសបន្តិចបន្តួច ដោយអចេតនានោះទេ។ ចំណាយពេលស្តាប់ពីហេតុផល សួរតាមសម្រួល និងមិនព្យាយាមបន្ថែមភ្លើងពេលឃើញកូនទាំងពីរឈ្លោះគ្នា។

មិនឲ្យយោបល់លក្ខណៈជាការបង្គាប់បញ្ជា

ប្រសិនបើមិនយល់ស្រប ជាមួយនឹងទង្វើរបស់កូនទេ អាចផ្តល់ជាយោបល់ល្អៗ ដើម្បីចង្អុលបង្ហាញ ដោយមិនលំអៀង និងមិនមែនក្នុងន័យបង្គាប់បញ្ជា ត្រូវតែធ្វើតាមដាច់អហង្ការឡើយ។ កូននឹងគោរពឲ្យតម្លៃដំបូន្មាន លុះត្រាតែអ្នកមានគោលបំណងល្អអាចទុកចិត្តបាន។

ស្រលាញ់ចៅមិនស្មើគ្នា

រូបតំណាង

ក្តីស្រលាញ់ពិតជាមិនអាចចែករំលែកឲ្យស្មើគ្នាពិតមែន ប៉ុន្តែយ៉ាងហោចណាស់ ម្តាយក្មេកមិនគួរបញ្ចេញទំនោរទៅតែម្ខាងៗនោះទេ។ អារម្មណ៍មួយនេះ អាចធ្វើឲ្យចៅៗ អាក់អន់ស្រពន់ចិត្ត ខ្វះភាពកក់ក្តៅពីលោកយាយ។

ចង់ឲ្យកូនប្រសាយល់ចិត្តគ្រប់រឿង

រូបតំណាង

សូម្បីកូនបង្កើតពេលខ្លះមិនអាចយល់ចិត្តម្តាយបានទាំងស្រុងផង ចុះទម្រាំកូនប្រសាទៀត? កុំព្យាយាមចង់ដាក់សម្ពាធលើនរណាម្នាក់ ព្រោះតែចង់បានការផ្គាប់ផ្គុនចិត្តគ្រប់រឿង។ ប្រសិនបើម្តាយចេះតែទាមទារទំនួលខុសត្រូវពីកូនប្រសាហួសប្រមាណ ចុងក្រោយមានតែភាពមិនពេញចិត្តសៅម៉ងទាំងអស់គ្នា។

ចែករំលែកបញ្ហាឬអាថ៌កំបាំងកូនប្រសាទៅអ្នកដទៃ

បញ្ហាដែលបានកើតឡើងក្នុងគ្រួសារ យូរឬឆាប់គង់តែមានដំណោះស្រាយ ប៉ុន្តែបើម្តាយក្មេងចេះតែដើរនិយាយប្រាប់គេប្រាប់ឯងឥតឈប់ឈរ រឿងរ៉ាវអាចនឹងច្របូកច្របល់កាន់តែខ្លាំង។ ការឲ្យជាមតិយោបល់អ្នកដទៃមិនមែនសុទ្ធតែល្អគ្រប់គ្នាឡើយ។ មានតែការជួយរក្សាអាថ៌កំបាំងនិងការពិភាក្សាគ្នាក្នុងគ្រួសារប៉ុណ្ណោះ ទើបអាចជួយឲ្យគ្រប់យ៉ាងប្រសើរឡើង៕