ហេតុអ្វីពេលស្រលាញ់គ្នា មនុស្សចាំបាច់ត្រូវការភាពស្ងៀមស្ងាត់?

2019-09-16 10:00:00
ចំនួនមតិ 0 | ចំនួនចែករំលែក 0

កាលពីមុន មានក្មេងប្រុសចិត្តល្អម្នាក់ឈ្មោះ ហុង ជាមនុស្សគរ ចំណែកក្មេងស្រីស្រស់ស្អាតម្នាក់ឈ្មោះ សូភា រស់ក្នុងគ្រួសារអ្នកមានទ្រព្យ។ ពួកគេទាំងពីររៀននៅសាលាជាមួយគ្នា លេងជាមួយគ្នា ហើយតែងជួយគ្នាទៅវិញទៅមក យ៉ាងស្និទ្ធស្នាលជាទីបំផុត។ រវាងពួកគេ បានកសាងអនុស្សាវរីយ៍ជាច្រើនរាប់មិនអស់ រហូតមានចិត្តលើគ្នាទៅវិញទៅមក។

ប៉ុន្តែហុងមិនហ៊ានសារភាពស្នេហ៍ទេ ព្រោះខ្លាចសូភាមិនយល់ព្រម។ រហូតដល់ថ្ងៃមួយ សូភាមានអាការៈមិនស្រួល ក៏ទៅមន្ទីរពេទ្យទើបដឹងថា នាងកើតជំងឺមហារីក។ គ្រូពេទ្យប្រាប់ថា ជំងឺរបស់នាងអាចរួចផុតពីគ្រោះថ្នាក់ដល់ជីវិត តែបើជាក៏មិនអាចនិយាយវិញបានដែរ។ ថ្ងៃដែលសូភានៅក្នុងមន្ទីរពេទ្យ ហុងតែងតែទៅមើលថែទាំនាងរាល់ថ្ងៃ។ នៅពេលនាងត្រូវចូលបន្ទប់វះកាត់ សូភានិយាយខ្សាយៗជាមួយពាក្យមួយឃ្លាថា៖ " ខ្ញុំចង់រៀបការជាមួយបង មិនមែនដោយសារតែអាណិតទេ តែមកពីអូនស្រលាញ់បង"។

ក្រោយពីការវះកាត់ សូភាបានរួចផុតពីគ្រោះដល់អាយុជីវិត ប៉ុន្តែនាងមិនអាចនិយាយបានតទៅទៀតទេ។ ពួកគេទាំងពីរបានរៀបការជាមួយគ្នា រស់ក្រោមដំបូលផ្ទះតែមួយយ៉ាងស្ងៀមស្ងាត់ ពេញដោយក្តីស្រលាញ់។

មិត្តភក្កិហុងបានទម្លាយរឿងពិតរបស់ហុង គឺហុងលែងជាមនុស្សគរ យូរណាស់មកហើយ។ មុនពេលសូភាឈឺ តាមពិតហុងធ្លាប់ព្យាបាលរហូតអាចនិយាយបានធម្មតា។ ប៉ុន្តែដោយសារ ហុងខ្លាចការបដិសេធស្នេហ៍របស់សូភា ទើបហុងបន្តធ្វើពុតជាមនុស្សគរ រហូតមក។

រឿងរ៉ាវនេះ ធ្វើឲ្យមនុស្សជាច្រើននិយាយថា នៅពេលអ្នកខឹង សូមកុំស្ងៀមស្ងាត់ ត្រូវនិយាយចេញមក ។ កុំនៅខាំមាត់ស៊ូទ្រាំ ព្រោះវាមានតែធ្វើឲ្យអ្នកទាំងពីរកាន់តែឃ្លាតឆ្ងាយពីគ្នាលើសមុន។ បើនៅនិយាយរកគ្នាមានន័យថា នៅស្រលាញ់ បើនៅស្តីបន្ទោសឲ្យគ្នា មានន័យថា អ្នកនៅត្រូវការស្នេហានេះនៅឡើយ។

ប៉ុន្តែមនុស្សជាច្រើនមិនដឹងទេថា ការនិយាយចេញមកដោយមិនបានគ្រប់គ្រងអារម្មណ៍ខ្លួនឯង គ្រាន់តែជាពាក្យព្យាបាទ ជាន់ឈ្លីសេចក្ដីថ្លៃថ្នូររបស់ដៃគូប៉ុណ្ណោះ។ ការស្ងប់ស្ងាត់រក្សាគម្លាត ប៉ុន្តែការនិយាយមិនត្រូវពេល ក៏ធ្វើឲ្យស្នេហាងាយប្រេះស្រ៊ាំដែរ។

បើឈ្លោះគ្នាមិនបានផលទេ សុខចិត្តស្ងៀមស្ងាត់វិញល្អជាង យ៉ាងហោចក៏មានពេលអាចរម្ងាប់ចិត្តឲ្យត្រជាក់បានដែរ។ នៅពេលអ្នកយល់និងចេះអត់ធ្មត់គ្រប់គ្រាន់ សឹមនិយាយចេញមក។ ក្តីស្រលាញ់ត្រូវការពាក្យផ្អែមល្ហែម មិនមែនពាក្យស្តាប់ហើយឆ្អែតបាយ៣ថ្ងៃទេ។ ស្នេហាត្រូវការមនុស្សពីរនាក់ចេះយល់ពីគ្នាទៅវិញទៅមក នោះគឺគ្រប់គ្រាន់ហើយ៕

ចុចអាន៖ ខ្ញុំរៀបការជាមួយបុរសដែលខ្ញុំស្រលាញ់ តែចុងក្រោយខ្ញុំត្រូវរស់នៅជាមួយប្រុសម្នាក់ផ្សេង

ប្រភព៖ Phunutoday ប្រែសម្រួល៖ លឹម សុនា