៤ សំណួរជួយឲ្យអ្នកស្គាល់ខ្លួនឯងកាន់តែច្បាស់ លែងរសាត់អណ្តែតតទៅទៀត
- 2019-09-02 06:30:00
- ចំនួនមតិ 0 | ចំនួនចែករំលែក 0
៤ សំណួរជួយឲ្យអ្នកស្គាល់ខ្លួនឯងកាន់តែច្បាស់ លែងរសាត់អណ្តែតតទៅទៀត
តើអ្នកធ្លាប់មានក្តីសុបិនធំដែរទេ? បើមានមែន តើអ្នកបានធ្វើអ្វីខ្លះហើយ ដើម្បីសម្រេចវាឱ្យបាន? ពេលខ្លះខំព្យាយាមណាស់ដែរ ប៉ុន្តែនៅមិនអាចទៅរួច ដោយសារតែអ្នកហាក់ដូចនៅវិលវល់ មិនដឹងថាគួរផ្តោតលើអ្វីមុន និងត្រូវចាប់ផ្តើមពីចំណុចណា។
អារម្មណ៍រសាត់អណ្តែតអាចបណ្តាលមកពីហេតុផលមួយចំនួនដូចជា ភាពមមាញឹកខ្លាំងពេក ការធុញថប់ គ្មានភាពច្បាស់លាស់ក្នុងជីវិត ឬសូម្បីពេលធម្មតាក៏មានអារម្មណ៍ហត់នឿយដែរ។ អារម្មណ៍បែបនេះ ពិតជាគ្រោះថ្នាក់ខ្លាំងណាស់ ថែមទាំងអាចរារាំងមិនឲ្យអ្នកឈានទៅដល់គោលដៅទៀតផង។
ចង់សម្រេចក្តីសុបិន លុះត្រាតែអ្នកចេះតម្រង់ទិសឲ្យបានជាក់លាក់ ហើយកុំភ្លេចសួរ ៤ សំណួរនេះ ដើម្បីស្គាល់ពីខ្លួនឯងកាន់តែច្បាស់។
សំណួរទី១៖ តើខ្ញុំជានរណា?
វាអាចបញ្ជាក់ពីភាពវៃឆ្លាត នៅពេលដែលអ្នកស្គាល់ច្បាស់ថាខ្លួនឯងជានរណាពិតប្រាកដ។ បើសូម្បីតែខ្លួនឯង អ្នកមិនដឹងផង ធ្វើម៉េចអាចវែកផ្លូវត្រូវបាន បើភពផែនដីធំធេងម្ល៉ឹងៗ? មាន ៣ ចំណុចធំៗ ដែលអាចជួយឲ្យអ្នកស្វែងរកការពិតពីខ្លួនឯង ក្នុងនោះរួមមាន បុគ្គលិកលក្ខណៈ ជំនាញ និងទេពកោសល្យរបស់អ្នក។ កាលណាអ្នកដឹងពីចំណុចខ្លាំងរបស់ខ្លួន វានឹងបង្កភាពងាយស្រួលក្នុងការធ្វើអ្វីមួយដែលខ្លួនឯងពេញចិត្ត មិនបង្ខិតបង្ខំធ្វើតាមគេ។ ពេលដែលអ្នកចេះប្រើជំនាញនិងទេពកោសល្យឲ្យបានត្រឹមត្រូវ កិច្ចការអ្វីក៏រីកចម្រើនរលូនទៅមុខដែរ។
សំណួរទី២៖ ហេតុអ្វីខ្ញុំដើរមកដល់ត្រង់ចំណុចនេះ?
នេះជាសំណួរដើម្បីក្រើនរំឭកនូវគោលបំណងដែលអ្នកមាន។ ជ្រុលតែបោះជំហានមកដល់ចំណុចនេះហើយ គ្មានផ្លូវត្រូវដើរបកក្រោយវិញដាច់ខាតទោះបីត្រូវជួបឧបសគ្គធំយ៉ាងណាក៏ដោយ ព្រោះមុនពេលធ្វើការសម្រេចចិត្ត មនុស្សម្នាក់ៗសុទ្ធតែមានហេតុផលនិងគោលដៅរៀងៗខ្លួន។
សំណួរទី៣៖ តើខ្ញុំធ្វើវាដើម្បីអ្នកណា?
ប្រសិនបើជាអ្នករកស៊ី សំណួរមួយនេះពិតជាសំខាន់ណាស់ ដើម្បីនាំអ្នកឆ្ពោះទៅកាន់ភាពជោគជ័យ។ គ្មាននរណាអាចផ្គាប់ចិត្តមនុស្សគ្រប់គ្នាបានឡើយ សំខាន់អ្នកអាចតម្រូវចិត្ត មនុស្សដែលឲ្យតម្លៃនិងផលចំណេញដល់អ្នក។
សំណួរទី៤៖ តើខ្ញុំគួរធ្វើអ្វីបន្តទៀត?
ទោះបីជាអ្នកទទួលបានលទ្ធផលល្អ និងអាចឈានទៅដល់គោលដៅរបស់ខ្លួនក៏ដោយ មិនត្រូវបណ្តែតបណ្តោយបានឡើយ។ ពុំដូច្នោះទេអ្នកអាចនឹងបាត់បង់ឱកាស ខាតបង់ពេលវេលា និងខ្វះការតាំងចិត្តជាក់ជាមិនខាន។ អ្នកត្រូវថ្លឹងថ្លែង ថាតើគួរធ្វើអ្វីបន្តទៀត ដើម្បីរក្សាលំនឹងឲ្យបានគង់វង្សបានយូរ។
អ្នកអាចម្រេចក្តីសុបិនបាន កាលណាអ្នកឈប់គិតរវើរវាយខ្លាំងពេក ហើយងាកមកផ្តោតលើទង្វើឲ្យបានច្រើនទើបប្រសើរ៕
ចុចអានបន្ត៖ មានរឿង ១២យ៉ាង ដែលអ្នកត្រូវត្រៀមចិត្ត ពេលទើបចូលធ្វើការដំបូងៗ