៤ អត្ថប្រយោជន៍នៃសំណាញ់ខ្ចប់ផ្លែឈើដែលអ្នកនឹកស្មានមិនដល់
- 2019-07-31 02:30:00
- ចំនួនមតិ 0 | ចំនួនចែករំលែក 0
៤ អត្ថប្រយោជន៍នៃសំណាញ់ខ្ចប់ផ្លែឈើដែលអ្នកនឹកស្មានមិនដល់
តាមការពិត សំណាញ់ខ្ចប់ផ្លែឈើមិនមែនឥតប្រយោជន៍ ហើយគ្រាន់តែជាសំរាមនោះឡើយ ដោយវាអាចប្រើបាននៅក្នុងកាលៈទេសៈជាច្រើន។
ជឿជាក់ថា អ្នកណាក៏ធ្លាប់ទិញផ្លែឈើ ដោយត្រូវបានខ្ចប់នៅក្នុងសំណាញ់ស្នោរដែរ ដោយផ្លែឈើទាំងនោះ មានដូចជាប៉ោម សារីជាដើម។ យ៉ាងណាក្ដី មនុស្សមួយចំនួនតែងគិតថា សំណាញ់នេះគ្មានប្រយោជន៍ ទុកនាំចង្អៀត ដូចនេះគេតែងបោះចោលជានិច្ច។ តាមការពិត សំណាញ់នេះមានប្រយោណ៍មិនតិចដែរ។
១. ការពាររបស់ងាយបែក
សំណាញ់នេះត្រូវបានប្រើដើម្បីការពារផ្លែឈើកុំឲ្យជាំ ដូចនេះគុណប្រយោជន៍ដ៏ធំបំផុតរបស់វា គឺការពាររបស់ទាំងឡាយដែលងាយបែក ដូចជាកែវ ឬចានជាដើម។ សម្រាប់របស់ដែលងាយបែក ហើយកម្រប្រើ អ្នកគ្រាន់តែខ្ចប់មួយជាន់ ហើយទុកជាស្រេច លែងបារម្ភរឿងធ្លាបក់បែកទៀតហើយ។
២. ខ្ចប់ស៊ុត
ស៊ុតគឺជាអាហារដែលងាយរងការប៉ះទង្គិចខ្លាំងបំផុត។ សម្រាប់រាល់ពេលទុកក្នុងទូទឹកកក ឬនៅទីណាមួយ បើគ្រាន់តែប្រយ័ត្នបន្តិច ស៊ុតនឹងបែកភ្លាម។ ដូចនេះ អ្នកអាចប្រើសំណាញ់នេះមកខ្ចប់ស៊ុតបាន។ បន្ថែមពីនេះ រាល់ពេលធ្វើដំណើរទៅណាមកណាដោយមានដឹកស៊ុត អ្នកក៏អាចប្រើសំណាញ់នេះមកខ្ចប់បានដូចគ្នា។
៣. ធ្វើរបស់កល់
រាល់ពេលជើងតុ ឬជើងកៅអីដែលមិនស្មើគ្នា គឺធ្វើឲ្យយើងមានអារម្មណ៍ពិបាកនៅបំផុត។ ហើយប្រសិនបើគ្រាន់តែយកក្រដាសកាសែតមកកល់នោះ គឺនៅមិនស្ងៀមឡើយ ដោយវានៅតែប៉ាក់ប៉ឺត។ យ៉ាងណាក្ដី អ្នកអាចដោះស្រាយបញ្ហានេះបានយ៉ាងងាយ ដោយយកសំណាញ់នេះមកកល់។
៤. ធ្វើប៉ុងលាងចាន
ប្រសិនបើប៉ុងលាងចានអ្នកអស់ ឬខូចហើយ មិនទាន់បានទិញថ្មីនោះ សំណាញ់នេះក៏ជាជម្រើសជំនួសដ៏ប្រសើរដោយអាចលាងសំអាតចានក្បាន ស្អាតមិនចាញ់ប៉ុងលាងចានធម្មតាឡើយ៕
ចុចអាន៖ ពាក្យទាំង២២ ធ្វើឲ្យអ្នកក្រញាញ់ខួរ ជួនកាលច្រឡំម្តងៗ