៨ សញ្ញាបញ្ជាក់ថាអ្នកអស់អារម្មណ៍ចង់ធ្វើការរៀនសូត្រ
- 2019-07-30 03:40:00
- ចំនួនមតិ 0 | ចំនួនចែករំលែក 0
៨ សញ្ញាបញ្ជាក់ថាអ្នកអស់អារម្មណ៍ចង់ធ្វើការរៀនសូត្រ
អាចជារឿងធម្មតាទៅហើយដែលពេលខ្លះចេះតែចង់គេចទៅនេះទៅនោះ ចង់សម្រាក ចង់នៅម្នាក់ឯង អស់អារម្មណ៍ប្រកួតប្រជែង។ ជារឿងខាងក្នុងចិត្ត តែអាចមានផលដល់ការធ្វើការរៀនសូត្រប្រចាំថ្ងៃ ជាពិសេសអ្នកនៅជុំវិញខ្លួនអ្នកទៀតផង។
១. ចង់គេចទៅដើរលេងគ្រប់ពេល
អារម្មណ៍ចង់ទៅដើរលេងលំហែកាយ ជារឿងធម្មតានោះទេ តែបើសិនលោកអ្នកចេះតែនឹកចង់ទៅគ្រប់ពេលមិនថាថ្ងៃធ្វើការធម្មតាឬថ្ងៃឈប់សម្រាក នោះអាចជាសញ្ញាមិនសូវល្អប៉ុន្មានទេ។ ព្រោះអ្នកអាចកំពុងធុញទ្រាន់នឹងការងារដែលកំពុងធ្វើរាល់ថ្ងៃក៏ថាបាន។
២. មិនសូវគិតវែងឆ្ងាយ ចង់តែគេងឲ្យផុតមួយថ្ងៃៗ
ភ្ញាក់ឡើងមិនក្រោកពីគ្រែ ក្រោកហើយក៏មិនចង់ចេញទៅណា ពេលធ្វើការឬរៀនក៏មិនសូវចង់ធ្វើ មិនគិតថាខ្លួនឯងកំពុងដើរដល់ចំណុចណា អនាគតចង់ធ្វើអីឲ្យប្រាកដ។ មួយថ្ងៃៗគ្រាន់តែមួយរស់ ប្រញាប់បញ្ចប់ការងារ រង់ចាំតែពេលទៅផ្ទះ នឹកតែគ្រែគេងមួយមុខជាដើម។
៣. ព្យាយាមយ៉ាងណាក៏មិនបានដូចចិត្ត
ធ្លាប់មានកម្លាំងចិត្តធ្វើការរាល់ថ្ងៃ ហើយគិតថាថ្ងៃណាមួយគង់បានសម្រេច តែពេលកន្លងទៅនៅតែមិនទាន់បានដូចចិត្ត នៅតែជួបការងារដែលមិនពេញចិត្ត រហូតចាប់ផ្ដើមជឿថាខ្លួនឯងជាមនុស្សបរាជ័យ។
៤.ចាប់ផ្ដើមចេះច្រណែនអ្នកជុំវិញខ្លួន
ពីមុនមិនចេះខ្វាយខ្វល់ច្រើនទេ តែពេលយូរៗទៅឃើញគេកាន់តែរីកចម្រើន ឃើញគេឧស្សាហ៍បានទៅដើរលេងក្រៅប្រទេស ក៏ចាប់ផ្ដើមមានអារម្មណ៍ច្រណែន គិតថាជីវិតខ្លួនឯងមិនសូវរលូនល្អជាដើម។
៥. យល់ថាអ្វីដែលកំពុងធ្វើមិនមានប្រយោជន៍
ការងារក៏ល្អ តំណែងក៏ល្អ តែមិនថាធ្វើការអ្វី ធ្វើការច្រើនប៉ុណ្ណាហើយក្ដី ក៏នៅតែមានអារម្មណ៍ថាមិនមែនជាខ្លួនយើងដដែល។ ពេលខ្លះអាចចេះតែមានអារម្មណ៍ថា អ្វីដែលកំពុងធ្វើមិនបានផ្ដល់ផលប្រយោជន៍អ្វី ខ្លួនឯងមិនរីកចម្រើន មិនអភិវឌ្ឍន៍ជាដើម។
៦. ធុញទ្រាន់គ្រប់ពេល
ធ្វើការក៏ធុញ នៅផ្ទះក៏ធុញ អ្វីដែលធ្លាប់ចូលចិត្តបែរជាធុញទ្រាន់នឹងធ្វើ ធ្វើអ្វីក៏មិនរីករាយគ្រប់យ៉ាង។ បើលោកអ្នកចេះតែមានអារម្មណ៍បែបនេះ អាចមកពីមានបញ្ហាក្នុងចិត្ត អាចនៅជាប់ជំពាក់រឿងណាមួយដែលមិនទាន់ដោះស្រាយចេញទើបធ្វើឲ្យការធ្វើការងារថ្មីៗមិនសូវរីករាយ។
៧. សុខចិត្តនៅតែក្នុងផ្ទះជាជាងចេញទៅក្រៅជាមួយមិត្តភក្តិ
មិនមែនអត់មានពួកម៉ាកទេ តែគ្រាន់តែក្រោកពីគេងមកក៏ហត់អស់កម្លាំងបាត់ទៅហើយ ទើបមិនចង់ចេញទៅណា ទៅណាតិចតួចរកតែមកផ្ទះវិញ ចង់តែគេងស្ងៀមមួយកន្លែង។
៨. ចូលចិត្តប្រើលេសថា គ្មានពេល
ចង់ធ្វើនេះ ធ្វើនោះ ចង់អភិវឌ្ឍខ្លួន ចង់ធ្វើអ្វីឲ្យមានប្រយោជន៍ តែចុងក្រោយអត់បានធ្វើអ្វីទាំងអស់ព្រោះតែពាក្យថាគ្មានពេល។ តាមពិតអាចមិនមែនមកពីគ្មានពេលទេ តែមកពីមិនចង់ប្រើពេលលើការងារទាំងនោះច្រើនជាង។
សម្រាប់លោកអ្នកដែលមានសញ្ញាទាំងប៉ុន្មានខាងលើនេះ អាចមិនមែនជាបញ្ហារយៈពេលវែងអ្វីនោះទេ គ្រាន់តែលោកអ្នកព្យាយាមចេញពីវដ្ដការរស់នៅបែបដដែលៗ ហើយសាកល្បងចេញទៅក្រៅធ្វើអ្វីមួយដោយមិនចាំបាច់គ្រោងទុក បើកចិត្តឲ្យទូលាយ បំភេ្លចគោលដៅ ការងារទម្លាក់អម្រែកលើស្មាមួយភ្លែតសិន។ ព្រោះផ្លូវដើរថ្មីៗ ស្ថានការថ្មីៗ ទោះបីអាចដើរផ្លូវកាត់ឬផ្លូវវាងក៏ដោយ អាចឲ្យយើងបានឃើញទេសភាពប្លែកភ្នែក បានស្រូបក្លិនផ្កាក្រអូបប្លែក និងមានអារម្មណ៍ស្រឡះល្អឡើងវិញបាន៕
ចុចអាន៖ ៧ វិធីបញ្ឃប់ខ្លួនឯងកុំឲ្យគិតច្រើន យ៉ាងមានប្រសិទ្ធភាពលែងខ្វល់ខ្វាយច្រើន