អាយុ២៨ឆ្នាំ មានលុយសន្សំតែ៥០០ដុល្លារ និងភាពរសាត់អណ្ដែតរបស់យុវវ័យបច្ចុប្បន្ន

2019-07-26 05:00:00
ចំនួនមតិ 0 | ចំនួនចែករំលែក 0

អ្នកអាចនឹងប្រឈមជាមួយឧបសគ្គ អ្នកអាចនឹងមិនមើលឃើញផ្លូវ អ្នកក៏អាចបាក់ទឹកចិត្តនៅពេលណាមួយ។ តែឲ្យតែអ្នករក្សាចិត្តឲ្យមុតមាំ អ្នកនឹងមិនបរាជ័យឡើយ។

ម្សិលមិញ ខ្ញុំនិងមិត្តភ័ក្ដិអង្គុយនិយាយគ្នា។ នាងប្រាប់ខ្ញុំថា ចេញពីសាលាធ្វើការបាន៧ឆ្នាំ អាយុ២៨ឆ្នាំ តែគណនីសន្សំរបស់នាងមានត្រឹមប្រហែល៥០០ដុល្លារប៉ុណ្ណោះ។

៥០០ដុល្លារគឺជាចំនួនទ្រព្យសម្បត្តិទាំងស្រុងដែលមាននៅក្នុងដៃរបស់នាង។ ចំនួនទឹកប្រាក់នេះធ្វើឲ្យនាងស្លន់ស្លោរ។ នាងអស់សង្ឃឹមនឹងខ្លួនឯង ហើយគិតថា២៨ឆ្នាំមកនេះ តើនាងគ្មានបានការដល់ថ្នាក់នេះឬ? ឪពុកម្ដាយវាចិញ្ចឹមវារៀនសាកល លុយសាលាមួយឆ្នាំៗ ៥០០ដុល្លារនេះ គឺមិនគ្រប់អ្វីទាំងអស់ បែបមិនគ្រប់សម្រាប់មួយឆមាសផង។ នាងប្រាប់ខ្ញុំថា មួយជីវិតនាង នាងជួបមនុស្សពូកែជាច្រើន។ ឃើញគេហើយ មើលខ្លួនឯងវិញ មានតែភាពអស់សង្ឃឹម។

ពេលខ្លះ ខំស្រែកប្រាប់ខ្លួនឯងថា ត្រូវតែស៊ូឡើង តែពេលខ្លះ វាគ្រាន់តែដឹងថា វាអស់កម្លាំងហើយ។ កាលពីមុន វាធ្វើការគ្រប់ការងារ តាំងពីរត់តុ ធ្វើអ្នកទទួលភ្ញៀវ លក់ស៊ីមទូរសព្ទ លក់ធានារ៉ាប់រង មើលកូនឲ្យគេ។ វាបានឆ្លងកាត់អស់ហើយ តែវានៅតែមិនអាចសល់លុយបាន។ វាមិនបានទាមទារអ្វីច្រើនឡើយ គឺសុំត្រឹមតែចិញ្ចឹមខ្លួនរស់ និងជួយរំលែកអម្រែកគ្រួសារបន្តិចប៉ុណ្ណោះ។

តែសួរថា នេះគឺជាកំហុសរបស់វាដែរទេ ដែលវាកើតមកក្រ ហើយមិនសល់លុយនោះ? សួរថាវាបានចាយលុយដែលវារកបានទាំងអស់ទេ? គឺមិនបានសូម្បីតែពាក់កណ្ដាលផង។ តាំងពីប្អូន តាំងពីបងវា គឺវាជាអ្នកទំនុកបម្រុងទាំងអស់។

ប្រសិនបើវាមិនសន្សំសំចៃ ប្រហែលជាសូម្បីតែ៥០០ដុល្លារ នៅពេលនេះ ក៏ប្រហែលជាមិនសល់ផង។ ក្នុងចំណោមមិត្តទាំងអស់ដែលខ្ញុំស្គាល់ គឺមានតែវានេះហើយ ដែលជាអ្នកតស៊ូបំផុត។ តែចំពោះមនុស្សមួយចំនួន ភាពតស៊ូ មិនដើរទន្ទឹមនឹងជោគជ័យនោះឡើយ។ តែគ្រាន់តែចងចាំថា ដរាបដែលអ្នកមិនបាត់បង់ការតស៊ូទេ អ្នកមិនបរាជ័យឡើយ។ ទោះមានលុយសន្សំតែ៥០០ដុល្លារ ក៏មិនមែនជាបញ្ហាចោទដែរ៕

ចុចអាន៖ ទម្លាប់គិតវិជ្ជមានឲ្យបានច្រើន ដូចកំពុងបង្កើតកំណប់ទ្រព្យសម្រាប់ជីវិតខ្លួនឯង

ប្រភព៖ Guu ប្រែសម្រួល៖ Caramel