គ្រាន់តែឱបគ្នាសោះ អ្នកនឹងទទួលបានអត្ថប្រយោជន៍ ៥ យ៉ាងនេះ

2019-07-15 06:40:00
ចំនួនមតិ 0 | ចំនួនចែករំលែក 0

ប្រសិនបើអ្នកជាមនុស្សចូលចិត្តការឱប អត្ថបទមួយនេះគឺជាដំណឹងដ៏រីករាយសម្រាប់អ្នក។ តាមការសិក្សាស្រាវជ្រាវ បានបង្ហាញថា ការឱបគ្នាជាប្រចាំ ក៏អាចផ្តល់អត្ថប្រយោជន៍ច្រើនយ៉ាងសម្រាប់សុខភាពដែរ។ ៥ ចំណុចខាងក្រោមនេះ ជាអ្វីដែលអ្នកនឹងទទួលបានពីការឱបគ្នា។

១. កាត់បន្ថយក្តីបារម្ភនិងភាពភ័យខ្លាច

បើអ្នកកំពុងតែមានភាពភ័យខ្លាច ព្រួយបារម្ភច្រើន ការឱបអាចជាផ្នែកមួយនៃដំណោះស្រាយ។ នៅពេលឱប អ្នកបានបង្កើនភាពស្និទ្ធស្នាលនិងប៉ះពាល់រូបរាងកាយ ដែលអាចធ្វើអ័រម៉ូន អុកស៊ីតូស៊ីន (oxytocin) កើនឡើង។ ឬអាចហៅម្យ៉ាងទៀតថា "អ័រម៉ូននៃក្តីស្រលាញ់" ដែលដើរតួនាទី ជាថ្នាំព្យាបាលជំងឺធ្លាក់ទឹកចិត្តផ្សេងៗរួមមាន ការបារម្ភភ័យខ្លាច កណ្តោចកណ្តែង ឯកោ។

យោងតាមការអះអាងរបស់ បណ្ឌិត Mercola ជាអ្នកនិពន្ធដ៏ល្បីប្រចាំ New York Times បានបញ្ជាក់ថាការឱបក៏អាចជួយជំរុញ ដូប៉ាមីន (dopamine) នៅក្នុងខួរក្បាលផងដែរ។ វាជាប្រភេទអ័រម៉ូន ដែលជួយឲ្យអារម្មណ៍រីករាយស្រស់ថ្លា មានក្តីសុខ។

២. ធ្វើឲ្យទំនាក់ទំនងកាន់តែប្រសើរឡើង

អ័រម៉ូន អុកតូស៊ីន មិនមែនសំដៅទៅលើក្តីស្រលាញ់តែមួយមុខឡើយ វាក៏ជាម៉ូលេគុលម្យ៉ាងដែលធ្វើឲ្យទំនាក់ទំនងកាន់តែរឹងមាំ។ អុកតូស៊ីន មានតួនាទីយ៉ាងសំខាន់ ក្នុងការផ្សារភ្ជាប់អ្នកទៅកាន់មនុស្សដទៃទៀត និងបង្កើនទំនុកចិត្តទៅវិញទៅមក។ មិនថាជាមិត្តភាព អាជីពការងារ ឬស្នេហានោះទេ ការឱបតែងតែធ្វើឲ្យការប្រាស្រ័យទាក់ទងប្រសើរឡើង។

៣. កាត់បន្ថយស្រ្តេសនិងហានិភ័យនៃការឆ្លងមេរោគ

នៅពេលជួបរឿងមិនល្អក្នុងជីវិត កើតទុក្ខច្រើន អ្នកនឹងស្រ្តេសគិតអីលែងចេញ។ ខណៈពេលដែលតានតឹងខ្លាំង សម្រាកមិនបានគ្រប់គ្រាន់ អ្នកងាយនឹងផ្ដាសាយបំផុត។ ដោយសារតែស្រ្តេស បង្កផលប៉ះពាល់ដល់ប្រព័ន្ធភាពស៊ាំនៃរាងកាយ ដូច្នេះហើយទើបអាចចម្លងមេរោគផ្សេងៗចូលក្នុងរាងកាយ។ តាមការសិក្សាស្រាវជ្រាវផ្នែកចិត្តវិទ្យាបានបង្ហាញថា ការឱបជាវិធីដ៏មានប្រសិទ្ធភាព ដើម្បីបំបាត់ស្រ្តេស និងកាត់បន្ថយការឆ្លងជំងឺផ្តាសាយ។

៤. ធ្វើឲ្យសម្ពាធឈាមថយចុះ

ការឱបអាចជួយបន្ថយសម្ពាធឈាមនិងកាត់បន្ថយហានិភ័យនៃជំងឺបេះដូងផងដែរ។ នៅពេលឱប ប្រេកង់កើនឡើងខ្ពស់ ប៉ុន្តែវាអាចជួយឲ្យមូលដ្ឋាននៃសម្ពាធឈាមថយចុះ

៥. ធ្វើឲ្យអារម្មណ៍ល្អ

ក្រោយពីមានបញ្ហាឬជម្លោះនានាជាមួយអ្នកទៃ អ្នកនឹងមានអារម្មណ៍មួម៉ៅមិនល្អ។ ក្នុងស្ថានភាពបែបនេះ អ្នកជំនាញបានលើកទឹកចិត្តឲ្យអ្នកមានការឱប ដើម្បីជួយឲ្យអារម្មណ៍ធូរស្បើយឡើងវិញ។

មិនថាអ្នកឱបមិត្តភ័ក្តិ ក្រុមគ្រួសារ មិត្តរួមការងារ សង្សារឬប្តីប្រពន្ធ សុទ្ធតែអាចទទួលបានអត្ថប្រយោជន៍ទាំងអស់។ កុំថាឡើយមនុស្ស សូម្បីតែសត្វ ដូចជាឆ្កែ ឆ្មា...ក៏ត្រូវការភាពកក់ក្តៅបែបនេះដែរ៕

ចុចអានបន្ត៖ សញ្ញា៦យ៉ាងបញ្ជាក់ថាមនុស្សប្រុសស្រលាញ់អ្នកពិតប្រាកដ

ប្រភព៖ entitymag ប្រែសម្រួល៖ ដេត ឈុនអ៉ី