កុំឲ្យឈឺចាប់ខ្លាំងក្រោយបែកគ្នា ស្រីៗគួរធ្វើរឿងមានតម្លៃទាំងនេះដើម្បីរឹងមាំជាថ្មី

2019-07-10 10:30:00
ចំនួនមតិ 0 | ចំនួនចែករំលែក 0

ដឹងថាពេលបែកបាក់ស្នេហា អ្នកណាក៏ពិបាកចិត្តដែរ ឲ្យកាត់ចិត្តភ្លេចគេភ្លាមៗមិនអាចទេ។ អ្នកអាចខូចចិត្តបានតែកុំយូរពេក។ បង្កើតតម្លៃឲ្យខ្លួនឯង ស្រលាញ់ខ្លួនឯងកាន់តែច្រើនពីមួយថ្ងៃទៅមួយថ្ងៃ ប្រៀបដូចឱសថជួយអ្នកឲ្យជាសះស្បើយឆាប់ៗ។ ត្រលប់មកផ្ដល់ថាមពលឲ្យខ្លួនឯង រស់នៅក្នុងជីវិតមានរស្មីនិងសប្បាយរីករាយតាមវិធីខាងក្រោមនេះ ទើបអ្នកអាចបំភ្លេចគេបាន។

១. ទទួលស្គាល់ការពិត

ព្រមទទួលថារឿងពីមុនបានចប់ហើយ ឈប់យំដើម្បីគេទៀតទៅ។ កុំធ្វើឲ្យសម្រស់យើងធ្លាក់ចុះដោយសារមនុស្សប្រុសក្បត់ម្នាក់អី គួរតែចាកចេញពីគេឲ្យផុតៗ កុំនៅសោកសៅចង់បានគេមកវិញ។

២. ឈប់ស្ដីឲ្យខ្លួនឯងទៀត

ឈប់សួរថាហេតុអ្វីគេចិត្តដាច់ដល់ថ្នាក់នេះ ឈប់ដេញដោលអ្នកណាខុសទៀត។ មនុស្សចង់ទៅ ទោះអ្នកចង់ឃាត់ក៏គ្មានប្រយោជន៍ដែរ យើងឃាត់បានតែខ្លួនប្រាណគេតែចិត្តគេមិននៅនឹងយើងទៀតឡើយ។ ព្រមលែងគេទៅ ព្រោះបើអ្នកមិនចាកចេញពីមនុស្សអាក្រក់ អ្នកគ្មានថ្ងៃបានជួបមនុស្សល្អឡើយ។ កុំខ្ជះខ្ជាយពេលវេលាគិតពីគេទៀត គួរយកពេលនេះមកគិតពីជីវិតខ្លួនឯងវិញល្អជាង។

៣. លើកលែងទោសឲ្យគេ

ចាត់ទុកថាបុណ្យរបស់អ្នកនិងគេសាងជាមួយគ្នាបានតែប៉ុណ្ណឹង ដូច្នេះទើបមិនអាចបន្តជាមួយគ្នាបាន។ កុំខឹងរហូតសងសឹកគេដោយអំពើអាក្រក់ ព្រោះមិនត្រឹមឲ្យអ្នកមិនអាចភ្លេចគេបានទេ ថែមទាំងនឹកឃើញគេគ្រប់ពេលទៀតផង។ គិតថា បោះបង់គឺជារឿងតែមួយគត់ឲ្យអ្នកឈប់ឈឺចាប់ទៀត។

៤. ខូចចិត្តបាន តែកុំយូរពេក

ប្រាកដណាស់កាលមុនអ្នកមានមិត្តប្រុសជជែកលេងជាមួយ ទៅណាជាមួយគ្នា តែពេលនេះទៅណាម្នាក់ឯងប្រាកដជាមិនទាន់សម្របខ្លួនបានភ្លាមៗអ៊ីចឹងហើយ។ ប៉ុន្តែត្រូវដឹងថា មុនពេលមិនទាន់ស្គាល់គាត់ ចុះហេតុអ្វីពេលនោះអ្នកអាចរស់បានរីករាយ។ ចាប់ផ្ដើមថ្ងៃថ្មីដោយគ្មានគាត់ក្នុងការចងចាំរបស់អ្នកទៀត រុញខ្លួនឯងចេញពីភាពសៅហ្មងឲ្យបាន។

៥. កុំបោះបង់ខ្លួនឯងចោល

តែងខ្លួនឲ្យស្អាត ផ្លាស់ប្ដូរស្ទីលខោអាវឲ្យមើលទៅប្លែក។ ធ្វើរឿងល្អៗចំពោះខ្លួនឯងឲ្យច្រើនៗ ត្រលប់មកស្រលាញ់និងឲ្យតម្លៃខ្លួនឯងដូចមុន ។ ព្យាបាលរបួសបេះដូងឲ្យជាលឿនបំផុត ផ្ដើមដោយការធ្វើរឿងសាមញ្ញ និងមើលថែខ្លួនឯងឲ្យខ្លាំងជាងមុន។ កុំភ្លេចថា អ្នកត្រូវបន្តរស់នៅរៀនរឿងថ្មីៗជាច្រើនទៀត កុំនៅអង្គុយសោកសៅគ្មានប្រយោជន៍នោះទេ។ ចាប់ផ្តើមពីឥលូវ ពិភពលោកនេះមិនខ្មៅងងឹតរហូតនោះទេ ។