បើមិនចង់ឲ្យកូនចេះនិយាយកុហក ម្តាយឪពុកគួរដឹងរឿង ៩ យ៉ាងនេះ
- 2019-06-19 04:30:00
- ចំនួនមតិ 0 | ចំនួនចែករំលែក 0
បើមិនចង់ឲ្យកូនចេះនិយាយកុហក ម្តាយឪពុកគួរដឹងរឿង ៩ យ៉ាងនេះ
កម្រមាននរណាដែលមិនចេះកុហកសោះ ក្នុងមួយជីវិតនេះ។ គ្រប់គ្នាតែងតែជួបមនុស្សពូកែនិយាយមិនពិតជារៀងរាល់ថ្ងៃ ប៉ុន្តែគ្មានឪពុកម្តាយណា ចង់ឲ្យកូនៗរបស់ខ្លួន ក្លាយទៅជាបែបនោះដែរទេ។ បើមិនចង់ឲ្យកូនចេះតែនិយាយកុហកឥតឈប់ឈរ អ្នកគួរដឹងពីមូលហេតុមួយចំនួនសិន។
១. កូនខ្លាចត្រូវរំពាត់
ក្មេងៗភាគច្រើនយល់ថា បើប្រាប់ការពិត អ្នកនឹងវាយគេមិនខានឡើយ។ ហេតុនេះហើយ គូរព្យាយាមលើកទឹកចិត្តឲ្យគេនិយាយត្រង់វិញប្រសើរជាង។ លើកក្រោយៗ កូនៗនឹងលែងភ័យខ្លាចក្នុងការប្រឈមជាមួយការពិតដូចមុនទៀតហើយ។
២. កូនមិនចង់ឃើញអ្នកពិបាកចិត្ត
កូនៗស្រលាញ់អ្នកខ្លាំងណាស់ ហើយក៏មិនចង់ឲ្យអ្នកពិបាកចិត្តដែរ។ បើសិនជាពេលប្រាប់ការពិត អ្នកមិនសូវមានប្រតិកម្ម ខឹងសំបារខ្លាំង ពួកគេនឹងចង់និយាយត្រង់ជាងកុហក។
៣. ពេលខ្លះកូនមិនមែនកុហកទេ គ្រាន់តែចូលចិត្តស្រមើស្រមៃ
ក្មេងខ្លះចូលចិត្តស្រមើស្រមៃ លើសពីការពិត ដូច្នេះអ្នកតែងតែឮពាក្យកុហកចេញពីមាត់របស់ពួកគេជារឿយៗ។ យ៉ាងណាក្តី កុំទាន់អាលបារម្ភអី ព្រោះបញ្ហាបែបនេះ នឹងបាត់ទៅវិញបន្តិចម្តងៗ ពេលដែលពួកគេកាន់តែធំ។
៤. កូននិយាយកុហកព្រោះពួកគេមិនចងចាំនូវអ្វីដែលបានកើតឡើង
ក្នុងស្ថានភាពខ្លះ កូនៗនិយាយកុហកដោយអចេតនា ព្រោះពួកគេជឿជាក់ថាវាជាការពិត ម្យ៉ាងវិញទៀតគេអាចនឹងភ្លេចនូវអ្វីដែលបានកើតឡើង។ គ្មានអ្វីត្រូវបារម្ភទេ ត្រូវព្យាយាមស្តាប់និងពន្យល់ពួកគេឲ្យបានល្អ ប្រសើរជាងការគំរាមឬសម្លុត នាំឲ្យបាក់ស្មារតី។
៥. កូនគិតថាការកុហកគឺជារឿងគួរសម
ជួនកាលកូនៗ គិតថាការកុហកគឺជារឿងត្រឹមត្រូវបំផុត ព្រោះពេលប្រាប់ការពិតមានតែ រឿងច្របូកច្របល់ស្មុគស្មាញ។ ទង្វើរបស់កូនៗ មានតែឪពុកម្តាយប៉ុណ្ណោះ ដែលអាចបត់បែនកែប្រែបាន។
៦. ម្តាយឪពុកចង់ឲ្យកូនៗ ឆ្លើយចំៗពេក
ពេលខ្លះអ្នកសួរតែមួយសំណួរគត់ ហើយចង់បានចម្លើយចំៗទៀត។ ឧទាហរណ៍ នៅពេលកូនមិនចូលចិត្តម្ហូបដែលអ្នកធ្វើ ហើយអ្នកបែរជាសួរថា “ឆ្ងាញ់ឬអត់?” ។ ក្នុងករណីនេះ បើមិនចង់ឲ្យគេកុហកទេ គួរសួរទៅវិញថា "តើកូនចង់ញ៉ាំអីទៅ?” ទើបជាសំណួរដ៏ល្អ។
៧. កូនគិតថា ការកុហកធ្វើឲ្យគេ មើលទៅនៅតែជាក្មេងល្អ
កូនៗខ្លាចមិនហ៊ានប្រាប់ការពិត ព្រោះគេយល់ថា សម្តីកុហកអាចធ្វើឲ្យគេនៅតែជាមនុស្សល្អ កូនល្អក្នុងក្រសែភ្នែករបស់អ្នក។ ក្នុងនាមជាម្តាយឪពុក គួរពន្យល់ទៅកូនថា មនុស្សល្អតែងតែរៀនពីកំហុស មានតែមនុស្សអាក្រក់ទេគេចវេះមិនទទួលស្គាល់ការពិត។
៨. ម្តាយឪពុកចូលចិត្តនិយាយកុហកកូនមុន
កូនៗចាំតែចម្លងពីម្តាយឪពុករបស់គេទេ។ បើរស់នៅក្នុងផ្ទះ ពោរពេញដោយមនុស្សពូកែកុហក ក្មេងៗក៏គ្មានថ្ងៃ ចេះនិយាយត្រង់ដែរ។ មានតែភាពស្មោះត្រង់ទេ ទើបអាចធ្វើជាគំរូល្អបាន។
៩. កូនៗមានអារម្មណ៍មិនល្អចំពោះខ្លួនឯង
បើមានបញ្ហាអីតិចតួច អ្នកចូលចិត្តតែស្រែកគំហកដាក់ ស្តីបន្ទោស ពួកគេនឹងមិនអាចដឹងថាអ្វីល្អ អ្វីអាក្រក់ ហើយក៏មិនចង់ប្រាប់ការពិតដែរ។
ព្យាយាមនិយាយជាមួយកូនឲ្យបានល្អ ពន្យល់នូវអ្វីដែលគេបានធ្វើខុសតាមសម្រួល។ វិធីនេះ មិនត្រឹមតែអាចជួយឲ្យគំនិតលូតលាស់ទៅមុខទេ ថែមទាំងអាចធ្វើឲ្យកូនៗ ដឹងថាការនិយាយពាក្យពិតមានសារសំខាន់ធំធេងយ៉ាងណា៕
ចុចអានបន្ត៖