កូនធំឡើងក្លាយអាចជាមនុស្សល្អ លុះត្រាតែម្តាយមានគុណសម្បត្តិ៧ យ៉ាងនេះ

2019-06-11 03:55:00
ចំនួនមតិ 0 | ចំនួនចែករំលែក 0

ក្នុងនាមជាអ្នកម្តាយដែលពោរពេញដោយសមត្ថភាពនិងឧត្ដមគតិមួយរូប តែងតែបារម្ភពីការចិញ្ចឹមបីបាច់ទុកដាក់កូនចៅ។ អ្នកម្តាយណាក៏ស្រលាញ់ ចង់ឲ្យកូនមានអត្តចរិតល្អ មានអនាគតរុងរឿង អាចលើកមុខមាត់កិត្តិយសខ្លួនឯងនិងគ្រួសារដែរ។ កូនៗប្រៀបបាននឹងក្រដាសសស្អាតមួយផ្ទាំង ពេលពួកគេធំឡើងអាចក្លាយជាមនុស្សល្អបាន ដរាបណាអ្នកម្តាយមានគុណសម្បត្តិ ៧ យ៉ាងនេះសិន។

១. និយាយពាក្យស្រលាញ់ទៅកាន់កូនៗ

កូនៗបើមិនបានឮពាក្យសម្តីចេញពីមាត់របស់អ្នកផ្ទាល់ទេនោះ ពួកគេអាចគិតអន់ចិត្ត ឬយល់ច្រឡំថាអ្នកមិនបានស្រលាញ់គេក៏មាន។ កុំបារម្ភខ្លាចថាកូនបានចិត្ត ត្រូវឧស្សាហ៍និយាយពាក្យថាស្រលាញ់ទៅពួកគេឲ្យបានច្រើន ព្រោះវាជាការបន្ថែមភាពកក់ក្តៅនិងជំនឿចិត្តទៅវិញទេ។

២. សុំទោស

កុំភ្លេចថាយើងសុទ្ធតែជាមនុស្សដូចគ្នា។ កុំយកអំណាចជាម្តាយមកសំអាង។ បើអ្នកមានកំហុស គួរហ៊ាននិយាយសុំទោសទៅកាន់កូនៗ ទើបជាគំរូល្អ។ ថ្ងៃក្រោយពេលដែលពួកគេធ្វើខុស គេនឹងចេះសុំទោសអ្នកវិញម្តង។

៣. លើកលែងទោស

កូនៗណាដែលថាគ្មានកំហុសនោះ? ក្មេងៗតែងតែចូលចិត្តលេង រាយប៉ាយ ធ្វើឲ្យអ្នកឈឺក្បាល ឬពេលខ្លះមិនស្តាប់បង្គាប់ក៏មាន។ អ្វីដែលម្តាយត្រូវធ្វើ មិនមែនជាការមួម៉ៅស្រែកឆោឡោដាក់កូនឡើយ ប៉ុន្តែត្រូវនិយាយណែនាំដោយចិត្តត្រជាក់ អត់ឱននិងប្រាប់ពីកំហុសដើម្បីឲ្យពួកគេកែប្រែ។

៤. ស្តាប់

ត្រូវនិយាយលេងជាមួយកូនឲ្យបានច្រើន ទើបអ្នកអាចយល់ពីចិត្តរបស់គេកាន់តែច្បាស់។ ចេះស្តាប់ពីគំនិតយោបល់ហេតុផលរបស់កូនឲ្យបានត្រឹមត្រូវ ដោយមិនប្រើអារម្មណ៍ខ្លួនឯង ដើម្បីទៅវាយតម្លៃផ្តេសផ្តាសឡើយ។ ពេលខ្លះកូនៗពិតជាត្រូវការ ឲ្យអ្នកស្តាប់ ឱប ដើម្បីផ្តល់កម្លាំងចិត្តដល់ពួកគេ។

៥. ដឹងពីទេពកោសល្យរបស់កូន

ផ្តល់ពេលវេលានិងឱកាសឲ្យបានគ្រប់គ្រាន់ អនុញ្ញាតឲ្យកូនៗធ្វើអ្វីដែលពួកគេចូលចិត្ត មិនថាជាការគូររូប លេងបាល់ ផ្នែកសិល្បៈផ្សេងៗ យូរៗទៅអ្នកនឹងអាចសង្កេតដឹងពីទេពកោសល្យពិតប្រាកដដែលកូនមាន។

៦. អត់ធ្មត់

ធ្វើជាម្តាយគេមិនមែនងាយស្រួលទេ ប៉ុន្តែយ៉ាងណាក្តីអ្នកត្រូវតែមានភាពអត់ធ្មត់នៅក្នុងខ្លួន។ មិនត្រូវធ្វើអ្វីមួយដោយបង្ខំទេ សុខចិត្តសន្សឹមៗ រង់ចាំមើលលទ្ធផលដែលកូនៗបានខិតខំព្យាយាម។

៧. លើកទឹកចិត្ត

ទោះបីជាពេលកូននៅតូច ឬពេលធំឡើងក៏ដោយ ការលើកទឹកចិត្តពីម្តាយពិតជាមិនអាចខ្វះបានទេ។ បើកូនៗមិនអាចធ្វើបានល្អនៅថ្ងៃនេះ ក៏មិនត្រូវនិយាយបង្អាប់បង្អន់ដែរ។ បន្តការជឿជាក់លើពួកគេ ទោះបីជាដើរដួល កូនៗនឹងនឹកឃើញដល់អ្នកម្តាយមុនគេ ហើយក៏ខំប្រឹងងើបឈរ មិនចុះចាញ់ងាយៗឡើយ៕