គុណសម្បត្តិស្មានមិនដល់ ពេលទារកកើតមកប្រឡាក់ សស លើស្បែក ដែលម្តាយច្រើនយល់ច្រលំ

2019-06-17 08:35:00
ចំនួនមតិ 0 | ចំនួនចែករំលែក 0

អ្នកម្តាយជាច្រើនយល់ច្រលំថា ហូបបបរអំឡុងមានផ្ទៃពោះធ្វើឲ្យកូនកើតមកមិនស្អាត ជាប់ សស ពេញស្បែកគួរឲ្យខ្ពើម។ តាមការពិត សស នៅលើស្បែកទារកនោះជារឿងល្អទៅវិញ ព្រោះវាផ្ដល់អត្ថប្រយោជន៍ច្រើនស្មានមិនដល់ចំពោះទារកទើបនឹងកើត។

ម្សៅ សស ជាប់លើស្បែកទារកនោះ ភាសាបច្ចេកទេសហៅថា Venix Caseosa ដែលវាមានមុខងារ សំខាន់នៅពេលទារកចាប់ផ្តើមលូតលាស់រយៈពេល៤០សប្ដាហ៍ពីការការពារស្បែកនៅក្នុងទឹកភ្លោះនៃផ្ទៃម្ដាយ។ សស នៅលើស្បែកទារកក្រោយពេលកើត ជារឿងធម្មជាតិនោះទេ ដូច្នេះម្ដាយគ្រប់រូបមិនគួរបារម្ភ ឬគិតថាមកពីញ៉ាំបបទើបបានជាបែបនេះឡើយ។ ជាទូទៅ ទារកកើតមុនកំណត់មាន សស នេះច្រើនជាងទារកកើតមកតាមការកំណត់ធម្មតា ។

យ៉ាងណាក៏ដោយបរិមាណសសនៅលើស្បែកទារកតិច ឬ ច្រើន មិនបង្ហាញពីគុណសម្បត្តិខុសគ្នានោះទេ ព្រោះវាមាននាទីការពារដូចគ្នាអំឡុងមានផ្ទៃពោះ និងក្រោយសម្រាល។

រូបតំណាង

ចំពោះគុណសម្បត្តិវិញមានដូចជា៖

១. ជារនាំងការពារឆ្លងមេរោគផ្សេងៗ៖ ទារកទើបកើតមានប្រព័ន្ធភាពស៊ាំខ្សោយណាស់ ដូច្នេះគេងាយនឹងឈឺ ឬឆ្លងមេរោគផ្សេងៗ។ ថ្វីត្បិតការបំបៅដោយទឹកដោះម្ដាយអាចជួយបង្កើនប្រព័ន្ធភាពស៊ាំដល់ទារក តែ Venix Caseosa នេះក៏អាចការពារទារកពីការឆ្លងមេរោគក្រោយសម្រាលបានដែរ។ នេះដោយសារវាមានសារធាតុប្រឆាំងអុកស៊ីតកម្ម រួមទាំងការរលាកផ្សេងៗ។

២. ការពារការកកិតផ្សេងៗអំឡុងសម្រាល៖ មិនត្រឹមជារបាំងការពារទារកពេលនៅក្នុងស្បូននោះទេ តែវាអាចបញ្ចៀសទារកពីការកកិតស្បែកនៅពេលអ្នកសម្រាលផងដែរ។

៣. ជួយគ្រប់គ្រងសីតុណ្ហភាពរាងកាយទារក៖ អំឡុងពពោះ ម្ដាយជាបុគ្គលសំខាន់រក្សាសីតុណ្ហភាពទារកឲ្យមានស្ថេរភាព។ តែនៅពេលទារកសម្រាលរួច Venix Caseosa មាននាទីសំខាន់ផងដែរដើម្បីរក្សាសីតុណ្ហភាពរបស់គេ ដូច្នេះហើយមិនគួរលាងសម្អាតសសលើទារកលឿនពេកទេ គួរទុកឲ្យវារលាយចូលស្បែកទារកយូរតាមដែលធ្វើបាន។ ម្យ៉ាងទៀត គួររុំទារកដោយភួយ និងទុកទារកក្នុងបន្ទប់មានផាសុកភាព។

៤. ធ្វើឲ្យស្បែកមានសំណើម៖ អត្ថប្រយោជន៍មួយទៀត ជួយឲ្យស្បែកទារកមានសំណើម ទន់បែបធម្មជាតិ មិនស្ងួតរបកក្រោយសម្រាលរួច។

ដោយសារតែគិតថា សសនេះល្អចំពោះទារក ម្ដាយមួយចំនួនមិនហ៊ានយកទារកងួតទឹកភ្លាមៗនោះទេ ដោយទុកយូរដល់ទៅមួយអាទិត្យ។ យកល្អ អ្នកគួរទុកត្រឹម២៤ម៉ោង ទៅ ៤៨ម៉ោង បានហើយ ។ មួយវិញទៀត អ្នកគួរស្នើរទៅគិលានុបដ្ឋាយិកាឲ្យប្រើក្រណាត់ទន់ៗបំផុត ពេលសម្អាតស្បែកទារក ព្រមទាំងម៉ាស្សាសសនោះឲ្យចូលស្បែកទារកបានល្អ៕

ចុចអាន៖ ភេសជ្ជៈ៣មុខ ម៉ាក់ៗគួរញ៉ាំពេលពពោះ ដើម្បីអូនៗកើតមកទ្រលុកទ្រលន់ ឆ្លាតវៃ

ប្រភព៖ healthline ប្រែសម្រួល៖ លឹម សុនា