រឿងពិតនឹកស្មានមិនដល់ដែលមនុស្សស្រីហ៊ានធ្វើពេលលួចក្បត់សង្សារ

2019-06-07 02:10:00
ចំនួនមតិ 0 | ចំនួនចែករំលែក 0

ធ្លាប់បានអានតែអត្ថបទច្រើនហើយ ដែលនិយាយពីទង្វើមនុស្សប្រុសពេលលួចក្បត់សង្សារមែនអត់? តាមពិតមិនមែនមានតែប្រុសៗទេដែលអាចធ្វើទង្វើដែលធ្វើឲ្យអ្នកដទៃឈឺចាប់ខ្លាំងពេលលួចក្បត់សង្សារខ្លួនឯង។ មនុស្សស្រីក៏ធ្វើរឿងបែបហ្នឹងដែរ គ្រាន់តែថាពេលធ្វើហើយតែងតែចូលចិត្តទម្លាក់កំហុសឲ្យមនុស្សប្រុសហើយមិនទទួលស្គាល់ថាខ្លួនឯងបានធ្វើ។ ទង្វើស្មានមិនដល់ទាំងអស់នេះហើយដែលមនុស្សស្រីហ៊ានធ្វើពេលលួចក្បត់សង្សារខ្លួនឯង៖

កុហកគេ ពេលគេចាប់បានក៏រកលេសថាគេមិនទុកចិត្តហើយខឹងគេវិញ

ពេលធ្វើខុសហើយត្រូវគេចាប់បាន មិនសារភាពកំហុសហើយថែមទាំងខឹងគេវិញទៀត។ ហើយយកលេសថាគេហ្នឹងមិនទុកចិត្តខ្លួនឯង បោះពាក្យមកសុទ្ធតែថាស្រលាញ់គ្នាធ្វើអីបើអត់ទុកចិត្តគ្នាអ៊ីចឹង។ ប្រាប់ថាប្រុសម្នាក់ហ្នឹងគ្រាន់តែជាមិត្តធម្មតា គ្មានអីលើសហ្នឹងទេ ទាំងការពិតកាយវិការសម្ដែងចេញមកស្និតជាងសង្សារទៀតពេលនៅជិតគេ។

មានល្បិចច្រើន

បង្កើតគណនី Facebook ផ្សេងទុកលេងជាមួយអ្នកដទៃ ព្រោះខ្លាចសង្សារដឹង។ ព្រោះគូស្នេហ៍ភាគច្រើនពេលស្រលាញ់គ្នាចូលចិត្តឲ្យលេខសម្ងាត់របស់ គណនេយ្យ Facebook ឲ្យគ្នាទៅវិញទៅមក។ បើមិនអ៊ីចឹងក៏លេងហើយលុបវិញដែរព្រោះខ្លាចគេចូលមើលទៅឃើញ។ មានល្បិចច្រើនរាប់មិនអស់ គ្មានពេលសម្រាប់សង្សារខ្លួនឯងតែមានពេលនៅជាមួយអ្នកផ្សេងរហូត ហើយយកលេសថារវល់នេះរវល់នោះមិនចេះអស់។

ចូលចិត្តនិយាយពាក្យថា "ធុញ ចង់បានសេរីភាព” ពេលដែលសង្សារសួរនាំច្រើន

ឲ្យតែពេលគេសង្ស័យច្រើន ហើយសួរនាំរៀងច្រើនបន្តិចដឹងតែមួម៉ៅ ហើយនិយាយពាក្យគំរោះគំរើយដាក់គេ។ អាងអីដឹងតែប្រើពាក្យបែកទាំងមិនខ្វល់ពីអារម្មណ៍មនុស្សប្រុស។

ធ្វើដូចមិនពេញចិត្តពេលនៅជាមួយសង្សារខ្លួនឯង គេធ្វើអីក៏ខុស

គេបារម្ភក៏ខុស គេមិនខ្វល់ជាមួយក៏ខុស។ បញ្ចេញទឹកមុខនិងអារម្មណ៍មិនសប្បាយចិត្តពេលនៅជាមួយសង្សារខ្លួនឯង។ ទាំងសម្ដីនិងកាយវិការលែងទន់ភ្លន់ និងគួរឲ្យស្រលាញ់ដូចពេលស្រលាញ់គ្នាដំបូងៗ។

ខ្លួនឯងជាអ្នកក្បត់គេ តែដើរតួធ្វើដូចជនរងគ្រោះពេលបែកគ្នា

និយាយពីថាខ្លួនឯងជាអ្នកក្បត់គេទេ តែផុសលើបណ្ដាញសង្គមដូចខ្លួនឯងជនរងគ្រោះ។ ឲ្យគេមើលមកថាខ្លួនឯងត្រូវបានគេធ្វើបាបផ្លូវចិត្ត ធ្វើតួកម្សត់ទាក់ទាញចំណាប់អារម្មណ៍ពីអ្នកនៅជុំវិញខ្លួនដើម្បីបិតបាំងទង្វើមិនល្អខ្លួនឯង។ ទាំងដែលអ្នកឈឺចាប់មិនមែនជាខ្លួនឯងផង ហើយនៅចង់ទម្លាក់កំហុសឲ្យខាងប្រុសទៀត។

ពេលមានមិត្តភ័ក្ដិសួរពីមូលហេតុបែកគ្នា តែងប្រើពាក្យថា “បើគេជាមនុស្សល្អក៏មិនបែកគ្នាដែរ”

ជាធម្មតាទេពេលស្រលាញ់គ្នាចូលចិត្តណាស់ show off ពេញហ្វេសប៊ុក អ្នកណាក៏គេដឹង។ ហើយពេលបែកគ្នានៅផុស drama រាប់មិនអស់ទៀត។ មានមនុស្សមិនតិចទេដែលសួរថាមូលហេតុអីបានបែកគ្នា ដោយសារអត់មានពាក្យអីត្រូវរៀបរាប់ប្រាប់គេទើបឆ្លើយចម្លើយយ៉ាងខ្លីតបទៅអ្នកសួរវិញថា “បើគេជាប្រុសល្អក៏មិនបែកគ្នាដែរ” ទាំងដែលដឹងហើយថាអ្នកណាល្អអ្នកណាអាក្រក់ពិតប្រាកដនោះ។

ពេលគេដឹងថាមានសង្សារថ្មីយកលេសថា មានអ្នកថ្មីដើម្បីបញ្ឈឺអ្នកចាស់

មិនទាន់ចប់ ដល់ពេលបង្ហាញមុខសង្សារថ្មីលឿនពេក ច្បាស់ជាមានអ្នកសួរថា "ចុម! មានសង្សារមួយទៀតហើយ?” គេនឹងឆ្លើយថាព្រោះត្រូវការអ្នកមើលថែបេះដូង ឬ យកដើម្បីបញ្ឈឺអ្នកចាស់ទេ។ ដោយសំណាងល្អទៀតមនុស្សប្រុសទោះបីជាឈឺចាប់ ឬខឹងគេខ្លាំងប៉ុណ្ណាក៏មិនអាចយកការពិតទៅនិយាយប្រាប់គេឯងឲ្យដឹងដែរ និយាយឲ្យចំគេមិនពូកែនិយាយដើមគេ ឬធ្វើជាដើរតួកម្សត់ឲ្យនរណាអាណិតទេ តែក៏មានបុរសមួយចំនួនដែរដែលហ៊ានយកការពិតប្រាប់ដល់គេឯង ហើយចេះនិយាយដើមគេមិនចាញ់មនុស្សស្រីដែរ។ គ្រាន់តែថាមានភាគតិចប៉ុណ្ណោះ។

ទោះបីជាបែបហ្នឹងមែនក៏មិនមានន័យថាមនុស្សស្រីទាំងអស់សុទ្ធតែធ្លាប់ធ្វើទង្វើបែបហ្នឹងពេលលួចមានថ្មីទេ។ ពេលខ្លះនាងក៏មិនចង់ដែរតែមកពីនាងខ្វះការយកចិត្តទុកដាក់ពីមនុស្សដែលនាងស្រលាញ់ ទើបនាងសម្រេចចិត្តធ្វើបែបនេះ។ តែមិនថាអ្នកបានឆ្លងកាត់រឿងអ្វីទេ ទង្វើទាំងនេះមិនមែនជារឿងល្អដែលមនុស្សស្រីគួរធ្វើទេ ព្រោះវាប៉ះពាល់ខ្លាំងដល់កិត្តិយសរបស់អ្នក។ អ្នកគួរនិយាយគ្នាត្រង់ទៅត្រង់មក មានរឿងអីក៏ប្រាប់គ្នាតាមត្រង់ទៅ អស់ចិត្តក៏សុំបែកត្រង់ៗទៅ។ ការទាក់ទងមនុស្សប្រុសពីរបីនាក់ក្នុងពេលតែមួយមិនមែនជាជម្រើសល្អសម្រាប់អ្នកនោះទេ៕

ចុចអាន៖ ចង់ស្រលាញ់ គ្នាដល់ឆ្អឹង ក៏ស្រីៗមិនត្រូវធ្វើរឿងទាំងនេះដែរ

អត្ថបទ៖ ឃួន សុលីកា