មនុស្សស្រីនៅលីវយូរ មិនមែនរើសពេកទេ មកពីមិនចង់បានមនោសញ្ចេតនារាក់កំភែល

2019-05-28 03:00:00
ចំនួនមតិ 0 | ចំនួនចែករំលែក 0

មនុស្សស្រីសុខចិត្តនៅម្នាក់ឯង មើលថែខ្លួនឯង ក៏គ្រាន់បើជាងនៅក្នុងមនោសញ្ចេតនាមួយដែលឈឺចាប់ ហើយឯកាជាងពេលនៅម្នាក់ឯងដែរ។

នៅជុំវិញខ្លួនយើង ប្រាកដជាមិនខ្វះឡើយមនុស្សស្រីដែលនៅលីវបាន១-២ឆ្នាំ ឬខ្លះឡើងដល់បែកគ្នា៣-៤ឆ្នាំហើយ នៅតែមិនទាន់គិតដល់រកអ្នកថ្មី។ អ្នកដទៃមើលមកបានត្រឹមគ្រវីក្បាលនិយាយថា "ប្រាកដជាមកពីរើសពេកហើយ"។ តែមូលហេតុពិតប្រាកដដែលនាងជ្រើសយកការកណ្ដោចកណ្ដែងនេះ មកពីការរើសពេក ឬក៏អត់?

ការពិត គ្មានអ្នកណាចង់នៅម្នាក់ឯងទេ ហើយរឹតតែគ្មានអ្នកណាទម្លាប់នឹងភាពឯកាទៅទៀត ទោះរស់នឹងវាយូរប៉ុណ្ណាក៏ដោយ។ អ្នកណាក៏ចង់បាន មនុស្សម្នាក់នៅក្បែរ គ្រាន់បានចែករំលែក មើលថែរក្សាគ្នាទៅមកដែរ។ មើលគេផ្អែមល្ហែមនឹងគ្នា ក៏ចេះច្រណែនដែរតើ។

យ៉ាងណាក៏ដោយ មនុស្សជាច្រើននៅតែជ្រើសយកជីវិតនៅលីវ ព្រោះគេមិនរំពឹងនឹងរកឃើញមនុស្សដែលល្អ អាចស្រលាញ់ និងបារម្ភពីគេពិតប្រាកដ។ ដូចនេះហើយ ជារៀងរាល់យប់ ក្រោយចេញពីធ្វើការ គេអាចតូចចិត្ត ពេលនារីដទៃមានគេមកយក ឯខ្លួនពាក់អាវភ្លៀងជិះតែម្នាក់ឯងលើផ្លូវអស់មនុស្សមួយនេះ។ តែទោះជាប្រឈមនឹងរឿងទាំងនេះជាប្រចាំ ក៏មនុស្សស្រីខ្លះមិនសុខចិត្តទទួលយកស្នេហាដែលមួយឆាវ ឬរបៀបស្នេហាឲ្យតែមានឡើយ។

និយាយឲ្យត្រង់ទៅ ប្រភេទស្នេហាបណ្ដោះអាសន្នគឺនាងមិនត្រូវការជាដាច់ខាត។ នាងសុខចិត្តពិបាកបន្តិចមែន ក៏មិនប្រគល់បេះដូងឲ្យខុសមនុស្ស ព្រោះមិនដឹងជាយូរប៉ុណ្ណាទើបរបួសចិត្តអាចជាបាន៕