នាងចាកចេញមិនមែនដោយសារចិត្តដាច់ តែមកពីទង្វើឆោតល្ងង់ ១០ យ៉ាងរបស់អ្នកហ្នឹងហើយ

2019-05-07 00:54:00
ចំនួនមតិ 0 | ចំនួនចែករំលែក 0

ប្រុសៗតែងតែគិតថាមនុស្សស្រីមានអាថ៌កំបាំងច្រើន ហើយពិបាកយល់ចិត្តណាស់ រហូតដល់នាងរៀបចំអីវ៉ាន់ ហើយចាកចេញទៅ។ នាងនឹងមិននិយាយច្រើនទេ យ៉ាងច្រើនគ្រាន់តែបើកទ្វារ ហើយចេញទៅឲ្យឆ្ងាយជារៀងរហូត ពេលដែលអ្នកកំពុងតែនៅកន្លែងធ្វើការប៉ុណ្ណោះ។ ខាងក្រោមនេះជាមូលហេតុដែលធ្វើឲ្យនាងមិនអាចទ្រាំនៅទៀតបាន៖

១.នាងមានអារម្មណ៍ថា អ្នកជាមនុស្សដែលមិនអាចពឹងពាក់បាន

ទោះបីនាងស្រលាញ់សេរីភាព តែនាងក៏អាចចង់ពឹងពាក់នរណាម្នាក់ ពេលមានបញ្ហាដែរ។ ជាពិសេសពេលពពោះ និងសម្រាលកូន ជាពេលវេលាដែលនាងត្រូវការអ្នកបំផុត។ មានតែបុរសដែលអាចទុកចិត្តបានតែប៉ុណ្ណោះទើបធ្វើឲ្យនាងកក់ក្ដៅ។

២.នាងហត់នឹងបំពេញតម្រូវការរបស់អ្នក

ត្រូវតែមានរាងស្អាត និងអារម្មណ៍ល្អគ្រប់ពេល ធ្វើម្ហូបឲ្យឆ្ងាញ់ អានសៀវភៅ និងត្រូវចុះសម្រុងជាមួយមិត្តភក្តិរបស់អ្នក វាជាតម្រូវការដ៏ច្រើនពេកហើយ។ អ្នកដឹងទេថា វាហត់នឿយខ្លាំងណាស់ដែលត្រូវផ្គាប់ចិត្តអ្នកគ្រប់រឿង គ្រប់ពេលបែបនេះ។

៣.មានអារម្មណ៍ថានាងមិនមែនជាមនុស្សតែម្នាក់សម្រាប់អ្នក

ទោះវាមិនមែនជាអំពើក្បត់ តែវាពិបាកទទួលយកណាស់ ពេលមនុស្សដែលខ្លួនស្រលាញ់សម្លឹងមើលស្រីផ្សេង ពេលនៅជាមួយនាង ឬទៅធ្វើដែលមិនឱ្យនាងមានទំនុកចិត្តថាខ្លួនគឺជាមនុស្សតែម្នាក់នៅក្នុងបេះដូងគេ។

៤.នាងធុញនឹងការមិនទុកចិត្តរបស់អ្នក ឬការដែលចង់គ្រប់គ្រងនាងគ្រប់ពេល

គ្រាន់តែចង់ទៅជួបមិត្តភក្តិត្រូវចំណាយពេល១សប្ដាហ៍មុន ដើម្បីសុំការអនុញ្ញាតពីអ្នក និងត្រូវលើកទូរសព្ទ តបសាររបស់អ្នកពេញមួយល្ងាច។ មានមនុស្សស្រីតិចណាស់ដែលពេញចិត្តនឹងទំនាក់ទំនងបែបនេះ។

៥.អ្នកជាមនុស្សអវិជ្ជមាន

អ្នកតែងតែបែបហ្នឹង ពេលអ្នកមិនសប្បាយចិត្ត មិនទទួលយកការធ្វើអ្វីដែលថ្មី ហើយមើលងាយគ្រប់គំនិតរបស់នាង ដោយសារអ្នកគិតថា នាងជាមនុស្សអត់ប្រយោជន៍។ ពេលខ្លះនាងគ្រាន់តែចង់ធ្វើឲ្យជីវិតខ្លួនឯងល្អប្រសើរជាងមុនតែប៉ុណ្ណោះ។

៦. អ្នករស់នៅពិភព២ផ្សេងគ្នា

ពេលដែលចាប់ផ្ដើមស្រលាញ់គ្នាដំបូង យើងមិនបានខ្វល់ច្រើនពីរឿងគ្រួសារ ឬមិត្តភក្តិទេ តែបន្ទាប់ពីទាក់ទងគ្នាមួយរយៈធំហើយទើបដឹងថា មិត្តភក្តិរបស់អ្នកជាមនុស្សដែលមិនគួររាប់អាន ហើយគ្រួសាររបស់នាងនឹងមិនអាចទទួលយកបានទេ។

៧. អ្នកមានចរិតដូចក្មេង

នាងចង់មានកូន តែអ្នកបែរចង់ឈប់ពីការងារដើម្បីទៅដើរលេងជាមួយមិត្តភក្តិ ឬចង់បានហ្គេមថ្មី និងនំខេកមួយដុំធំ។ ពេលខ្លះវាជាករណីលើកលែង តែមនុស្សស្រីគ្រប់រូបមិនចង់បង្កើតគ្រួសារជាមួយជាមួយមនុស្សដែលមិនទាន់ចេះគិតគូរទេ។

៨. នាងហត់នឹងការផ្ដល់ឲ្យដោយគ្មានបានអីមកវិញសោះ

ផ្ដល់ឲ្យដោយគ្មានបានអីមកវិញសោះ? ទំនាក់ទំនងដែលល្អ គេអត់ធ្វើអ៊ីចឹងទេ។ មនុស្សពីរនាក់អាចនៅជាមួយគ្នាបាន នៅពេលដែលពួកគេអាចបង្ហាញឱ្យគ្នាឃើញតាមរយៈពាក្យសម្ដីនិងកាយវិការ។

៩.នាងមិនដឹងថា អ្នកត្រូវការអ្វីពិតប្រាកដ

នាងមិនអាចពឹងពាក់អ្នកដែលមិនដែលសម្រេចផែនការ ឬសុបិនរបស់ខ្លួនឯងឡើយ។ នាងនឹងរឹតតែមិនអាចសម្រេចអ្វីបានឡើយជាមួយមនុស្សដែលប្ដូរចិត្តគ្រប់ពេល។

១០.គម្រោងពេលអនាគតមិនដូចគ្នា

អ្នកដឹងថាអ្នកចង់បានអី ហើយនាងដឹងថា នាងចង់បានអីដូចគ្នា ហើយបញ្ហាគឺថាគម្រោងពេលអនាគតរបស់អ្នកខុសគ្នាស្រឡះ ដែលគ្មានថ្ងៃអាចដើររកផ្លូវប្រសព្វឱ្យជួបគ្នាបាន៕

ចុចអាន៖ អានមួយៗហើយគិត! គំនិតល្អៗគួរយល់ដឹងមុនពេលចង់រៀបការ

អត្ថបទ៖ ឃួន សុលីកា