កុំឆោតទៅសួរឲ្យសោះថា ចុងបញ្ចប់ខ្ញុំត្រូវជាអ្វីនឹងគេ?

2019-04-25 05:00:00
ចំនួនមតិ 0 | ចំនួនចែករំលែក 0

ស្នេហាធ្វើឲ្យមនុស្សដូចជាងងឹតភ្នែក វង្វេងផ្លូវ មួយគឺមានសុភមង្គលដល់កំពូល និងមួយទៀតឈឺចាប់ដូចធ្លាក់នរក។ តែទោះសុភមង្គលប៉ុណ្ណាក៏មិនអាចប៉ះប៉ូវមកវិញនូវការរងរបួស និងការក្បត់បោកប្រាស់បានដែរ។

រូបតំណាង

ខ្ញុំមិនយល់ទាល់តែសោះ ហេតុអ្វីអ្នកខ្លះប្រឹងព្យាយាមរុករកតំណែងណាមួយនៅក្នុងចិត្តរបស់គេ។ តែងតែដាក់សំនួររាប់ពាន់ ហើយដើររកចម្លើយខ្លួនឯង ជាមួយសំនួរថា៖ ចុងបញ្ចប់ ខ្លួនឯងត្រូវជាអ្វីនឹងគេ? ស្នេហាមួយដែលលែងមានជម្រៅ ដែលគេលែងខ្វល់ លែងបារម្ភ គ្មាននឹកនាទៀតហើយនោះ រាល់សំនួរទាំងអស់ គឺប្រែទៅជាអស់ន័យ។

ហេតុអ្វីក្នុងកំឡុងពេលដ៏វែងនោះ អ្នកមិនបានឮសំដីរបស់ដៃគូនិយាយពីតំណែងរបស់អ្នក ក្នុងចិត្តរបស់គេ។ គឺមកពីអ្នកមិនទាន់មានសារៈសំខាន់គ្រប់គ្រាន់ អ្នកមិនមែនជាតួអង្គឯកក្នុងជីវិតរបស់គេ មិនទាន់ជាជម្រើសចុងក្រោយរបស់គេនៅឡើយ។ អ្នកនឹងមិនទទួលចម្លើយ ការចែករំលែក និងមនោសញ្ចេតនាតែមួយគត់ពីគេ ព្រោះអ្នកគ្រាន់តែជាចំណតបណ្ដោះអាសន្ន មុនពេលចេញទៅចំណតមួយទៀត ដើម្បីទៅដល់ចំណតចុងក្រោយ។

រូបតំណាង

ទោះបីជាធ្លាប់ប្រាប់ថាស្រលាញ់អ្នកខ្លាំងយ៉ាងណា ស្បថស្បែរច្រើនយ៉ាងណា ធ្លាប់ចំណាយពេលនៅក្បែរអ្នករាប់ម៉ោង។ ធ្លាប់ឃើញអ្នកយំ អោបអ្នកក្នុងរង្វង់ដៃ ហើយលួងទាល់តែបាត់យំនោះ ក៏មិនប្រាកដថាគេនឹងមិនឃ្លាតពីអ្នកឡើយ។ ព្រោះនោះគ្រាន់តែជារឿងនៅមុខភ្នែកប៉ុណ្ណោះ ថ្ងៃក្រោយមិនទាន់ដឹងនៅឡើយទេ។ ប្រយ័ត្នតែកំពុងផ្អែមល្ហែមសុខៗ ពីរ បីថ្ងៃក្រោយ គេហៅអ្នកថាជាមិត្តចាស់ទៅ។

កុំប្រញាប់ជឿ និងដាក់ចិត្តទាំងស្រុងលើគេ។ ហើយក៏កុំប៉ះទូរសព្ទគេឲ្យសោះ បើសិនជាគេប្រតិកម្មខ្លាំងតាំងពីលើកដំបូង ព្រោះនៅក្នុងនោះអាចមានអាថ៍កំបាំងរបស់គេជាមួយស្រីជាច្រើនដែលគេហៅពួកគេថា ប្អូនធម៌ បងធម៌ ឬអ្នកធ្លាប់ជួយគេជាដើម។