បើមានបំណងចង់រៀបការជាមួយនរណាម្នាក់ ត្រូវទទួលយកចំណុចខ្វះខាតគេជាមុនសិន

2019-03-26 06:31:16
ចំនួនមតិ 0 | ចំនួនចែករំលែក 0

ពេលដំបូងដែលអ្នកចាប់ផ្ដើមលង់ស្នេហ៍ទៅលើនរណាម្នាក់ នោះគ្រប់យ៉ាងនឹងល្អ ព្រោះគ្រាចាប់ផ្ដើមម្នាក់ៗក៏មិនទាន់ដឹងចិត្តគ្នា ហើយបញ្ចេញចរិតតាមធម្មជាតិខ្លួនដែរ។

ទាក់ទងគ្នាបានមួយរយៈធំអ្នកទាំងពីរនឹងឈានដល់ដំណាក់កាលមួយទៀតគឺ Comfortzone ដែលមានន័យថា ធ្វើតាមអ្វីដែលជាខ្លួនឯង លែងខ្លាចចិត្តគ្នា។ មកដល់ចំណុចនេះគឺជាពេលដែលចរិតមិនល្អ ចំណុចខ្វះខាតចាប់ផ្ដើមចេញមកហើយ រហូតដល់ធ្វើឲ្យម្នាក់ៗមានអារម្មណ៍លែងល្អ លែងផ្អែមល្ហែមដូចពីមុន។

ដំណាក់កាលនេះគឺសំខាន់ណាស់ ហើយក៏មានគូស្នេហ៍ជាច្រើនដែរដែលបែកគ្នាព្រោះដំណាក់កាលនេះ។ ពេលចំណុចមិនល្អចាប់ផ្ដើមលេចឡើង អារម្មណ៍ផ្សេងៗក៏ចាប់ផ្ដើមកើតឡើងជាហូរហែរ ហើយម្នាក់ៗនឹងចាប់ផ្ដើមអស់អារម្មណ៍ល្អជាមួយគ្នាបណ្ដើរៗ។

យូរៗទៅក៏ចាប់ផ្ដើមមានអារម្មណ៍ថាហត់នឿយ លែងចង់បន្តជាមួយគ្នាទៀត រួចពួកគេក៏សម្រេចចិត្តចែកផ្លូវគ្នា។

ដោយឡែកសម្រាប់អ្នកដែលអាចឆ្លងផុតដំណាក់កាលនេះហើយឈានចូលដំណាក់កាល់ជាប្ដីប្រពន្ធនោះ គឺពួកគេទាំងពីរព្រមទទួលចំណុចខ្វះខាតដែលដៃគូមាន។ ពួកគេសម្របខ្លួន និងសប្បាយចិត្តចំពោះអ្វីដែលម្នាក់ៗមានសម្រាប់ស្នេហា។

ត្រូវទទួលស្គាល់ថាមនុស្សមិនអាចល្អគ្រប់យ៉ាងទេ ដូច្នេះបើអ្នកស្រឡាញ់នរណាម្នាក់ ហើយចង់រួមរស់ជាប្ដីប្រពន្ធត្រូវតែហ៊ានទទួលយកចំណុចអាក្រក់ និងរៀនបើកចិត្តទទួលយកការពិតដែលបានកើតឡើង។

បើស្រឡាញ់នរណាម្នាក់ដោយសារភាពល្អនេះល្អនោះ ថ្ងៃណាមួយអ្នកនឹងលែងស្រឡាញ់នៅពេលដែលចំណុចល្អនោះលែងនៅ ដូច្នេះត្រូវស្រឡាញ់ធម្មជាតិដែលម្នាក់ៗមាន។ បែបនេះហើយទើបគេមានដំណាក់កាលមើលចិត្តគ្នា ដូច្នេះនៅពេលអ្នកឆ្លងផុតរឿងលំបាកៗហើយ ទៅមុនចាប់ដៃគ្នាក៏មានភាពនឹងធឹងជាងសម្រេចចិត្តភ្លាមៗដែរ៕

ចុចអាន៖នៅពេលដែលអ្នកចេះស្រឡាញ់ខ្លួនឯងអ្នកនឹងដឹងថាពិភពលោកនេះស្រស់ស្អាត

អត្ថបទ៖ ផេង ផលធិតា