បារម្ភ និងស្រឡាញ់ខ្លួនឯងឲ្យច្រើនៗទៅព្រោះភាគច្រើនគេមិនបានបារម្ភអ្នកទេ

2019-04-04 07:11:58
ចំនួនមតិ 0 | ចំនួនចែករំលែក 0

ក្នុងជីវិតយើងអ្វីដែលល្អបំផុតគឺនៅពេលដែលយើងចេះបារម្ភ និងយកចិត្តទុកដាក់ចំពោះខ្លួនឯង ព្រោះមនុស្សភាគច្រើនមិនបានស្រឡាញ់អ្នក បារម្ភអ្នកពិតប្រាកដទេ។

១. កុំបង្ហិនពេលវេលាចាំឲ្យអ្នកដទៃបារម្ភខ្វល់ខ្វាយពីអ្នក

បើសិនអ្នកប្រាកដក្នុងចិត្តថាពួកគេបានដឹងពីដំណឹងអាក្រក់ ឬក៏ជោគជ័យរបស់អ្នកហើយ គួរតែបណ្ដោយឲ្យពួកគេលើកយកដំណឹងទាំងនោះមកនិយាយដោយឯកឯង ព្រោះយ៉ាងហោចណាស់អ្នកក៏បានដឹងថាការបារម្ភខ្វល់ខ្វាយ ឬពាក្យសម្ដីសរសើររបស់គេគឺជាការពិតចេញពីចិត្តឬក៏អត់។

២. ព្រមទទួលស្គាល់ថាមនុស្សភាគច្រើនក្នុងលោកមិនបានបារម្ភពីអ្នកពិតប្រាកដទេ

ធម្មតាមនុស្សភាគច្រើននឹងធ្វើខ្លួនហាក់ដូចជាពួកគេចូលចិត្តអ្នក ឬចរិតរបស់អ្នក ប៉ុន្តែមានមនុស្សមិនច្រើននាក់នោះទេ ដែលមានអារម្មណ៍បារម្ភពីអ្នកពិតប្រាកដ លើកលែងតែថាពួកគេស្គាល់អ្នកច្បាស់មែនទែន។ ដូច្នេះវាមិនអាចទៅរួចឡើយដែលមានអ្នកណាម្នាក់ដែលអ្នកទើបស្គាល់ មកបារម្ភពីអ្នកពិតប្រាកដ។

៣. ទទួលស្គាល់ថាអ្នកគឺមនុស្សដែលអាចស្វែងរកក្ដីសុខឲ្យខ្លួនឯងបាន ១០០%

ទោះបីមិត្តភ័ក្ដិ អ្នកក្នុងគ្រួសារ និងមនុស្សជាទីស្រឡាញ់របស់អ្នកអាចផ្ដល់ក្ដីសុខ និងធ្វើឲ្យអ្នកមានអារម្មណ៍ស្កប់ស្កល់ក្នុងចិត្តខ្លាំងកម្រិតណា ប៉ុន្តែអ្នកមិនដឹងឡើយថាពួកគេអាចនៅជាមួយអ្នករហូត ឬក៏អត់ ឬក៏អាចមានស្ថានការណ៍ណាមួយដែលធ្វើឲ្យពួកគាត់មិនអាចផ្ដល់ក្ដីសុខឲ្យអ្នកដូចមុនបាន។ ដូច្នេះហើយទើបមនុស្សយើងត្រូវចេះរៀនស្វែងរកសេចក្ដីសុខដោយខ្លួនឯងខ្លះ។

៤. កុំឲ្យតម្លៃការយល់ឃើញរបស់អ្នកដទៃច្រើនជាងខ្លួនឯង

បើទោះបីការទទួលយកការណែនាំ និងគំនិតរិះគន់ពីអ្នកដទៃគឺជាគំនិតមួយល្អ ប៉ុន្តែវាអាចនឹងក្លាយជារឿងមិនល្អឡើយ បើអ្នកចាំតែធ្វើតាមពាក្យសម្ដីគេទាំងស្រុង។ ពាក្យណែនាំទាំងនោះគួរណាស់តែមានភាពគួរឲ្យជឿជាក់ ដូចជាពាក្យសម្ដីរបស់អ្នកជំនាញផ្នែកផ្សេងៗ ប៉ុន្តែអ្នកត្រូវដឹងថា នៅទីបញ្ចប់ គឺមានតែខ្លួនអ្នកប៉ុណ្ណោះដែលត្រូវទទួលខុសត្រូវជីវិតរបស់ខ្លួនឯងច្រើនបំផុត។ ដូច្នេះហើយអ្នកចាំបាច់ត្រូវជឿ និងទុកចិត្តការសម្រេចចិត្តរបស់ខ្លួនឯងជាចម្បង ៕

ចុចអាន៖ផ្លាស់ប្ដូរខ្លួនឯងជាមនុស្សមានមន្តស្នេហ៍ខ្ពស់ និងវិជ្ជមានតាមវិធីស្រួលៗទាំងនេះ

អត្ថបទ៖ ផេង ផលធិតា