កំហុសឆ្គងរបស់មនុស្សប្រុសគឺ ធ្វើបាបមនុស្សដែលស្រលាញ់ខ្លួនពិតប្រាកដ

2019-03-12 01:00:00
ចំនួនមតិ 0 | ចំនួនចែករំលែក 0

មនុស្សប្រុសបានខុសរួចទៅហើយនៅពេលធ្វើបាបមនុស្សស្រីដែលនៅក្បែរ និងស្រលាញ់គេពិតប្រាកដ ហើយរឹតតែខុសទ្វេដងពេលលេងសើចជាមួយនឹងយុវភាពរបស់នាង។

រូបតំណាង

អ្នកទាំង២ចាប់ផ្ដើមស្គាល់គ្នាតាំងពីរៀនសាកលវិទ្យាល័យ។ អ្នកទាំង២សុទ្ធតែអ្នកមកពីខេត្ត ដោយមានបំណងថានឹងផ្លាស់ប្ដូរជីវិតក្រោយរៀននៅទីក្រុង។ ដោយសារតែមានគោលដៅដូចគ្នា ពួកគេចាប់ផ្ដើមស្រលាញ់គ្នាពីពេលណាក៏មិនដឹង។ ក្រោយរៀបការ ជីវិតពួកគេខ្វះខាត តែពោពេញដោយសុភមង្គល។ តែនៅពេលជីវិតចាប់ផ្ដើមធូរផ្នែកហិរញ្ញវត្ថុ ក៏ជាពេលដែលគាត់ចាប់ផ្ដើមសាងកំហុសដាក់បងស្រីដែរ។

ដោយសារតែឧស្សាហ៍ធ្វើការតាមខេត្ត គាត់ស្គាល់មនុស្សស្រីជាច្រើន។ បងស្រីមិនដឹងឡើយថា គាត់មានស្រីកំណាន់ខាងក្រៅ។ ដល់ពេលដឹង អ្វីៗហួសពេលអស់ហើយ។ បងស្រីទាមទារលែងលះយ៉ាងដាច់អហង្ការ តែគាត់មិនយល់ព្រម គាត់គិតថាខ្លួនគ្មានបានធ្វើអ្វីខុសទេ។ ចំពោះគាត់ រឿងមនុស្សប្រុសមានទំនាក់ទំនងស្រពិចស្រពិលជាមួយស្រីខាងក្រៅ មិនមែនជារឿងធំឡើយ។

គាត់គិតថា មនុស្សប្រុសមានទំនាក់ទំនងទូលាយគឺត្រឹមត្រូវ។ អ្វីដែលសំខាន់នោះ គឺនៅតែមានទំនួលខុសត្រូវជាមួយគ្រួសារ តែបងស្រីមិនយល់ព្រម។ គាត់គិតថាប្ដីខ្លួនបានសាងកំហុសធ្ងន់ណាស់ នៅពេលហ៊ានក្បត់គាត់ ក្បត់ភាពស្មោះត្រង់ដែលគាត់តែងតែមានចំពោះប្ដីខ្លួន។

រូបតំណាង

គាត់មិនបានគិតដល់ មនុស្សស្រីដែលធ្លាប់ឆ្លងកាត់ព្យុះភ្លៀងជាមួយគាត់ ហ៊ានធ្វើគ្រប់យ៉ាងដើម្បីគាត់។ ចុងបញ្ចប់ គាត់បែរជារកបានក្ដីសុខជាមួយស្រីខាងក្រៅទៅវិញ។ នោះគឺជាកំហុសធំបំផុតក្នុងជីវិតរបស់ខាងប្រុស។ មិនដឹងថាគាត់មានទំនួលខុសត្រូវយ៉ាងម៉េចចំពោះគ្រួសារឡើយ ចុងបញ្ចប់អ្នកខុសខ្លាំងជាងគេ ក៏នៅតែជាអ្នកក្បត់។

កំហុសដ៏ធំរបស់មនុស្សប្រុសគឺក្បត់មនុស្សស្រីដែលបានចំណាយយុវភាពនៅក្បែរគេ។ រស់នៅលើលោកនេះ ទទួលគុណ ត្រូវសងគុណ មិនមែនយកទោសទៅសងគុណឡើយ។ មានតែដូចនេះ ទើបជោគជ័យក្នុងជីវិត។ កុំមួយថ្ងៃៗ ចង់ឲ្យគេស្មោះនឹងយើង តែយើងបែរជាចាក់ពីក្រោយខ្នងគេមួយកាំបិតឲ្យសោះ៕

ចុចអាន៖បុរសពិតម្នាក់ ស្រលាញ់ស្មោះចំពោះស្ត្រីម្នាក់គឺគ្រប់គ្រាន់បំផុតហើយ

ប្រភព៖ Guu អត្ថបទ៖Caramel