មេរៀនដាស់តឿនមនុស្សស្រីឲ្យក្លាហានរស់នៅមិនចាញ់ប្រៀបសម្តីអ្នកដទៃ
- 2019-02-28 06:00:00
- ចំនួនមតិ 0 | ចំនួនចែករំលែក 0
មេរៀនដាស់តឿនមនុស្សស្រីឲ្យក្លាហានរស់នៅមិនចាញ់ប្រៀបសម្តីអ្នកដទៃ
រៀនរស់នៅដោយស្គាល់ពីតម្លៃនិងយល់អត្ថន័យនៃជីវិត ពិតជាសំខាន់ខ្លាំងណាស់ក្នុងការជួយដាស់តឿនខ្លួនឯង មិនឲ្យរាថយនូវរាល់ឧបសគ្គដែលបានជួបប្រទះជារៀងរាល់ថ្ងៃ និងចេះរស់នៅដោយភាពក្លាហានមិនចាញ់ប្រៀបសម្តីអ្នកដទៃ។
១.អ្នកផ្សេងចូលចិត្តនិយាយឬគិតអ្វីមិនល្អមកលើអ្នកគ្មានអ្វីត្រូវខ្វល់ សំខាន់ធាតុពិតរបស់អ្នកគឺមិនមែនបែបហ្នឹង។
២.បើអ្នកខំធ្វើល្អដាក់មនុស្សអាក្រក់ ហើយរំពឹងថាគេនឹងមកធ្វើល្អដាក់អ្នកវិញ ប្រៀបបាននឹងសូមអង្វរសត្វតោមិនឲ្យស៊ីអ្នក ព្រោះអ្នកមិនចេះស៊ីវា។ សន្តានមនុស្សមិនងាយនឹងកែឡើយ គួរប្រុងប្រយ័ត្នប្រសើរជាងព្យាយាមធ្វើរឿងដែលមិនអាចទៅរួច។
៣.បើអ្នកដទៃហ៊ាននិយាយរិះគន់ វាយតម្លៃទាំងមិនដែលស្គាល់ពីអ្នកច្បាស់ផង កុំទៅឈឺក្បាលជាមួយអី ហើយត្រូវទន្ទិញពាក្យមួយឃ្លាថា "ឆ្កែតែងតែព្រុស ពេលជួបមនុស្សប្លែកមុខ”។
៤.បើមាននរណាម្នាក់ធ្វើឲ្យឈឺចាប់ ឈប់ដើរផ្លូវរួមគ្នាទៀត ត្រូវតម្រង់ទៅទិសណាដែលគ្មានម្នាក់នោះ ស៊ូដើរលើផ្លូវមួយតែម្នាក់ឯង ដើម្បីជួយសង្គ្រោះព្យាបាលរបួសផ្លូវចិត្តឡើងវិញ។
៥.រៀនរស់ដូចជាផ្កាព្រៃ ពេលស្ថិតក្នុងស្ថានភាពលំបាកខ្លាំងក៏នៅតែអាចតស៊ូជម្នះឲ្យបាន ទោះអ្នកផ្សេងគិតថាអ្នកធ្វើមិនបានក៏ដោយ។
៦.សំបកក្រៅអ្នកអាចបង្ហាញគេត្រឹមជាជំហានឆ្មា ប៉ុន្តែត្រូវតាំងចិត្តនិងព្យាយាមបង្ហាញលទ្ធផលថា វាជាជំហានខ្លាទៅវិញទេ ដើម្បីឲ្យពួកគេភ្លឺភ្នែកម្តង។
៧.កុំប្រាប់រឿងសម្ងាត់ទៅកាន់អ្នកផ្សេងឲ្យអស់រលីងពេក ព្រោះសូម្បីតែខ្លួនឯងផ្ទាល់មិនអាចលាក់បានផង ចុះទម្រាំអ្នកក្រៅទៀត ធ្វើម្តេចអាចនឹងទុកចិត្តបានទាំងស្រុងនោះ?
៨.បើជីវិតធ្វើឲ្យអ្នកជួបបញ្ហាមិនចេះចប់ កុំឆ្ងល់ហើយសួរថា ហេតុអ្វីបានធ្លាក់មកលើខ្ញុំរហូត? ផ្ទុយទៅវិញត្រូវនិយាយថា អូខេ ខ្ញុំនឹងតទល់ជាមួយវា។
៩.ជីវិតប្រែប្រួលមិនអាចទាយបាន មនុស្សក៏ដូចគ្នា ដូច្នោះអនាគតក៏មិនអាចទាយដឹងមុនដែរ។
១០.មនុស្សមួយចំនួនខំអួតអាងដើម្បីទាមទារចំណាប់អារម្មណ៍ តែចុងបញ្ចប់ គ្មាននរណាគេកោតស្ងប់ស្ងែងទេ ព្រោះអ្វីដែលខំសំញែងគ្រាន់តែជារបស់ក្លែងក្លាយ ការពិតមិនអាចធ្វើបានសោះ។
១១.កុំឈ្លោះជាមួយមនុស្សដែលមានឋានៈនិងចំណេះដឹងទាបជាងខ្លួនដាច់ខាត។ ទោះគ្មានសមត្ថភាពប្រើរបស់ថ្លៃក៏ដោយ ត្រូវចាំថាធ្វើខ្លួនឲ្យមានតម្លៃទើបជារឿងចាំបាច់។
ចុចអានបន្ត៖ ត្រីមានប្រាជ្ញាដឹងពីអ្វីដែលពួកគេគួរនិយាយ និងមិនធ្វើឲ្យអ្នកដទៃក្ដៅក្រហាយ