ចង់ចិញ្ចឹមកូនឱ្យដើរតាមគន្លងធម៌ ឪពុកម្ដាយត្រូវដឹងពីចំណុចទាំង៧នេះ

2019-02-27 09:00:00
ចំនួនមតិ 0 | ចំនួនចែករំលែក 0

ឪពុកម្តាយគ្រប់រូបតែងចង់ឱ្យកូនស្តាប់បង្គាប់ដើរតាមគន្លងធម៌។ ប៉ុន្តែពេលកូនធំឡើងមិនអាចដូចអ្វីដែលអ្នកចង់បានទាំងអស់នោះទេ។ អ៊ីចឹងអ្នកត្រូវសួរខ្លួនឯងថាបានបង្រៀនកូនពីអ្វីខ្លះ? អ្នកបានប្រៀនប្រដៅកូនបានសព្វជ្រុងជ្រោយហើយឬនៅ? ច្បាស់ណាស់ថាអ្នកអាចបង្កើតគេបាន តែមិនអាចបង្កើតចិត្តគេបានទេ ប៉ុន្តែអ្នកក៏ផ្លាស់ប្តូរចិត្តគេបានតាមរយៈការប្រៀនប្រដៅតាំងពីតូចដល់ធំ។ ដើម្បីកុំឱ្យហួសពេលទាន់ គួរតែចាប់ផ្តើមបង្រៀនកូនតាមចំណុចទាំង៧នេះ៖

១. កុំផ្គាប់ចិត្តកូនពេក

បើចង់ឱ្យកូនអ្នកល្អ គួរតែនិយាយទេខ្លះផង។ កុំឱ្យកូននូវអ្វីដែលគេចង់បាន ទោះបីជាអ្នកមានលទ្ធភាពក៏ដោយ។ នៅពេលដែលគេទារអីបានហ្នឹង គេនឹងមិនឱ្យតម្លៃវានោះទេ។

២. បង្រៀនពីអត្តចរិត

ក្រៅពីបង្រៀនកូនអ្នកឱ្យចេះជម្រាបសួរ អរគុណ អ្នកក៏គួរតែបង្រៀនពីឥរិយាបថ និងចិត្តគំនិតផងដែរ។ ត្រូវបង្រៀនឱ្យគេចេះដឹងគុណ និងពេញចិត្តនូវអ្វីដែលគេមាន ដោយគ្មានការលោភលន់ចង់បានរបស់អ្នកដទៃ។

៣. រៀនចែករំលែក

នេះក៏ជាចំណុចដ៏សំខាន់ដែរ ពោលគឺបើអ្នកចង់ឱ្យកូនអ្នកចែករំលែក អ្នកត្រូវធ្វើជាគំរូដល់គេ។ ត្រូវធ្វើឱ្យគេយល់ថារបស់ខ្លះតិចតួចណាស់សម្រាប់គេ តែវាមានតម្លៃសម្រាប់អ្នកដទៃ។ ការធ្វើបែបនេះ គេនឹងមានអារម្មណ៍ថាពេញចិត្តនឹងអ្វីដែលគេមាន ដោយមិនទាមទារអ្វីច្រើន។

៤. កុំចាប់រាល់កំហុសរបស់គេ

ពេលកូនធ្វើខុស ឪពុកម្តាយតែងស្តីប្រដៅ តែការស្តីបន្ទោសក៏គួរមានដែនកំណត់ដែរ។ អ្នកមិនគួរចាប់រាល់កំហុសរបស់គេ ឬស្តីបន្ទោសរហូតទេ។ រឿងខ្លះគួរស្តីបន្ទោស រឿងខ្លះទៀតគួរ បើអាចមើលរំលង គួរតែមើលរំលង បើកំហុសនេះគេមិនបានតាំងចិត្តធ្វើ។

៥. កុំជួយគ្រប់ពេលគេដួល

នៅពេលកូនតូចរបស់អ្នករត់លេងដួល អ្នកមិនគួរជួយលើកគេទេ បើការដួលនោះមិនធ្ងន់ធ្ងរ។ ការធ្វើបែបនេះគឺដើម្បីឱ្យកូនអ្នកចេះក្រោកឈរដោយខ្លួនឯងនៅពេលក្រោយ។ ហើយឱ្យគេដឹងថា បរាជ័យមិនមែនជារឿងគួរឱ្យខ្លាចទេ បរាជ័យគឺជាផ្នែកមួយនៃជោគជ័យ។

៦. បង្រៀនគេពីតម្លៃនៃលុយ

ពេលដែលកូនអ្នកមិនឱ្យតម្លៃលុយនោះ គេនឹងចាយមិនចេះគិត ដោយគិតថាលុយស្រួលរក។ ត្រូវបង្រៀនគេថាលុយពិបាករក បើទោះបីជាអ្នកធូរធារក៏ដោយ។ នៅពេលគេឱ្យតម្លៃលុយ គេក៏ចេះសន្សំសំចៃដូចគ្នា។

៧. ចែករំលែកពីការលំបាករបស់អ្នកឱ្យកូនបានដឹង

ការនិយាយប្រាប់ពីបទពិសោធន៍និងការលំបាកពិតជាមានប្រសិទ្ធភាពខ្លាំងចំពោះកូនអ្នក។ គេអាចនឹងស្តាប់បង្គាប់អ្នកច្រើនជាងមុននៅពេលដែលអ្នករៀបរាប់ទុក្ខលំបាករបស់អ្នក។ ធ្វើឱ្យគេយល់ពីការខិតខំប្រឹងប្រែងរបស់អ្នក៕