តិចនិកផាត់មុខបែបធម្មជាតិពិតៗ មើលទៅដូចអត់ផាត់

2019-02-21 09:00:00
ចំនួនមតិ 0 | ចំនួនចែករំលែក 0

នេះគឹជាតិចនិកងាយៗ៥យ៉ាង ដែលបានចែករំលែកតៗគ្នាពីអ្នកជំនាញផាត់មុខ ដើម្បីបំពេញតម្រូវការMakeup សម្រាប់មិត្តៗនារីណាដែលចង់បានបែបធម្មជាតិ ភ្លឺរលោង ជាប្រចាំថ្ងៃ។

១. ផ្តល់សំណើមនិងជម្រុះកោសិកាចាស់ៗចេញ

ចង់ផាត់ម្សៅទឹក (Foundation) ឬ BB cream ចូលមុខល្អ អ្នកត្រូវថែរក្សាស្បែកដោយប្រើគ្រីមផ្តល់សំណើមនៅពេលយប់និងមុនពេលផាត់មុខ។ បើចេះតែផាត់យកៗមិនការពារ នោះគ្រឿងសម្អាងនឹងចូលទៅបំផ្លាញសុខភាពស្បែករបស់អ្នកពីមួយថ្ងៃទៅមួយថ្ងៃ។ ហើយកុំភ្លេចជម្រុះកោសិកាចាស់ៗឲ្យបានទៀតទាត់ផង ដើម្បីជួយឲ្យស្បែកមុខរលោង ផាត់ចូលសព្វល្អ និងមិនកកប្រតិកប្រតាក។

២. ផាត់ផ្ពាល់ផ្កាឈូកឬទឹកក្រូចប្រឿងៗ

នេះជាតិចនិកងាយៗ ដែលនារីកូរ៉េនិយមធ្វើ ព្រោះពួកគេចងបានស្ទីលផាត់មុខបែបធម្មជាតិ ក្មេងគួរឲ្យស្រលាញ់។ មិនត្រឹមតែផ្ពាល់ទេ ដែលប្រើគូល័រពណ៌ផ្កាឈូកឬទឹកក្រូចប្រឿងៗ សូម្បីតែត្របកភ្នែកក៏ត្រូវដាក់ពណ៌ឲ្យស៊ីគ្នាដែរ ដើម្បីបង្កើនភាពស្រស់ស្អាតទាក់ទាញមួយកម្រិតទៀត។

៣. ប្រើក្រាស់និងជែលសិតរោមចិញ្ចើម

ចង់បានលក្ខណៈបែបធម្មជាតិ ចិញ្ចើមជាអ្វីដែលអ្នកត្រូវយកចិត្តទុកដាក់ ព្រោះបើគូរពណ៌ដិតពេក វាអាចនឹងមិនស៊ីគ្នា ជាមូយនឹងការផាត់មុខ។ គួរប្រើជក់ឬក្រាស់ជាមួយនឹងជែលមកសិត នោះរោមចិញ្ចើមរបស់អ្នកនឹងចេញជាសរសៃៗស្រស់ស្អាត និងមានពណ៌ស្រាលល្មម។

៤. លាបក្រែមពណ៌សាច់ឬស្រដៀងនឹងពណ៌ស្បែករបស់អ្នក

ក្រែមពណ៌សាច់ ជាជម្រើសដ៏ល្អ ប្រសិនបើអ្នកចង់បានបែបធម្មជាតិ មើលទៅមិនស្រស់ឆើតពេក។ មួយវិញទៀត ត្រូវចាំថា ក្រែមដែលមានពណ៌ស្រាល ត្បិតមើលទៅមិនសូវលេចធ្លោ ប៉ុន្តែវាអាចជួយលើកមុខឲ្យឃើញក្មេង ជាងពណ៌ដិតខ្លាំង។

៥. ផាត់ ភ្នែក ផ្ពាល់ និងមាត់ពណ៌ដូចគ្នា

បើអ្នកមិនចង់មើលទៅឃើញខ្លួនឯងស្លេកស្លាំងដូចមនុស្សឈឺ ហើយក៏មិនចង់ផាត់ត្របកភ្នែកដូចទៅញ៉ាំការ អាចជ្រើសរើសពណ៌ដូចគ្នា យកមកផាត់លើភ្នែក ថ្ពាល់និងមាត់។ ជាពិសេសស្ទីលនេះ មិនចាំបាច់ត្រូវប្រើផលិតផលច្រើន និងចំណាយពេលយូរ ត្រឹមតែមួយពណ៌ វាសមួយច្វាច់រួចជាស្រេច អាចចេញទៅណាមកណាយ៉ាងជឿជាក់៕

ចុចអានបន្ត៖ គន្លឹះក្នុងការផាត់ម្សៅ ឲ្យឃើញស្បែកធម្មជាតិរលោងស្អាតមិនកកដុំៗ

ប្រភព៖ bestie ប្រែសម្រួល៖ ដេត ឈុនអ៉ី