មើលងាយកូនប្រសារស្រីថាក្ររហាម ថ្ងៃចូលពេទ្យ ម្ដាយក្មេកយំពេលឃើញក្រដាសមួយសន្លឹក

2019-02-21 03:00:00
ចំនួនមតិ 0 | ចំនួនចែករំលែក 0

ឆ្ងល់ថានៅក្នុងកាបូបមានក្រដាសអីចម្លែក ម្ដាយក្មេកបានរើកាបូបកូនប្រសារស្រីហើយអាន។ គាត់បានត្រឹមតែស្រក់ទឹកភ្នែកក្នុងក្ដីក្ដុកក្ដួល។

ពួកគេការនឹងគ្នាទាំងមានការជំទាស់យ៉ាងដាច់អហង្ការពីគ្រួសាររបស់ ចិត្រ មិនមែនមកពី លីន និយាយស្ដីឈ្លើយនោះទេ គ្រាន់តែម្ដាយ ចិត្រ មិនចូលចិត្តការស្លៀកពាក់អាវមិនអាវ ខោមិនខោវពេលជួបគ្នាដំបូងរបស់ លីន តែប៉ុណ្ណោះ។ ម្ដាយ ចិត្រ ជាមនុស្សសំខាន់សំបកក្រៅជាទីបំផុត គាត់ថាមនុស្សចង់ឲ្យគេឲ្យតម្លៃ ទាល់តែសម្ដែងចេញតាមរយៈរូបសម្បត្តិជាមុនសិន។

ពេលដែល ចិត្រ រៀននៅសាកលវិទ្យាល័យ ជំនាញរបស់គាត់មិនត្រូវបានគេវាយតម្លៃខ្ពស់ឡើយ តែក្រោយពេលរៀនចប់ ជំនាញគាត់ស្រាប់តែត្រូវប៉ាន់ ត្រូវបានក្រុមហ៊ុនជាច្រើនទាក់ទាញទៅធ្វើការ។ជាមួយនឹងរូបសម្បត្តិគ្រាន់បើ ក្រោយពេលធ្វើការបាន៥ ឆ្នាំ ពេលនេះប្រាក់ខែរបស់ ចិត្រ បានឡើងដល់ពាន់ដុល្លារហើយ។ រាល់ពេលឃើញកូនប្រុសខ្លួនឯង ម្ដាយ ចិត្រ តែងមានមោទនភាពជានិច្ច។

តែមិត្តស្រីដែល ចិត្រ នាំមកផ្ទះធ្វើឲ្យលោកស្រីមិនពេញចិត្រទាល់តែសោះ។ ម្ដាយ ចិត្រ គិតថា លីនមិនមែនជាបុគ្គលិកក្រុមហ៊ុន ជាមួយនឹងរបៀបស្លៀករយិរយៀក។ គាត់គិតក្នុងចិត្តថា លីន ប្រាកដជាធ្វើកម្មកររោងចក្រជាមួយប្រាក់ខែមិនលើស ៣០០ ដុល្លារឡើយ។ ទោះជាយ៉ាងណា ក៏អ្នកទាំង២ពុះពារនៅជាមួយគ្នាទាល់តែបាន។ ក្រោយការរួច ដោយសារតែនៅធ្វើការរដ្ឋផង ទើបឪពុកម្ដាយចិត្រ នៅតែរស់នៅឯខេត្ត មានតែប្ដីប្រពន្ធ លីន ទេដែលឡើងមករស់នៅទីក្រុង។ ក្រោយមួយរយៈ មិនសូវឃើញកូនប្រុសផ្ញើលុយមកដូចមុនម្ដាយ ចិត្រ ចាប់ផ្ដើមតឹងទ្រូង។

*ឥលូវគេមានប្រពន្ធហើយ ភ្លេចម្ដាយហើយណ៎។

*ម៉ាក់ម៉េចនិយាយចឹង ទោះមានប្រពន្ធ ក៏ម៉ាក់នៅតែជាម៉ាក់របស់ខ្ញុំដែរ អត់មានអ្វីផ្លាស់ប្ដូរទេ។

*យើងនិយាយបានតែចឹង តែប្រពន្ធក្ដាប់អស់ហើយ។ វាប្រហែលសប្បាយខ្លាំងហើយ ដែលរកបានប្ដី រកបានលុយរាប់ពាន់ចឹង។

ទោះមិនសប្បាយចិត្តខ្លាំង តែ ចិត្រ ក៏មិនតបច្រើន ព្រោះដឹងចរិតម្ដាយខ្លួន។ មានកូនប្រុសយកប្រពន្ធរូបរាងដូចកម្មករ ម្ដាយលោកមួម៉ៅខ្លាំងណាស់ ថ្ងៃណាក៏ជុំគ្នាជាមួយអ្នកជិតខាងនិយាយដើមកូនប្រសារដែរ។ នៅជុំវិញ អ្នកណាក៏គិតថា លីន យក ចិត្រ ដោយសារលុយប៉ុណ្ណោះ។

ថ្ងៃមួយពេលកំពុងធ្វើម្ហូប ហើយត្រូវរលាកដៃ ម្ដាយ ចិត្រ ក៏មានអារម្មណ៍មិនស្ងប់ក្នុងចិត្ត។ ភ្លាមៗនោះ កូនប្រុសទូរសព្ទមកប្រាប់ថា លីន គ្រោះថ្នាក់ចរាចរណ៍កំពុងសង្គ្រោះបន្ទាន់នៅពេទ្យ។ ទោះមិនដឹងក្បាលកន្ទុយយ៉ាងម៉េច ហើយមិនពេញចិត្តនឹងកូនប្រសារ ក៏លោកស្រីប្រញាប់ឡើងមកក្រុងទាំងល្ងាច។ លីន របួសធ្ងន់ ត្រូវវះកាត់ជើង។ ឃើញកូនប្រុសរត់ចុះរត់ឡើង ខ្លួនជាម្ដាយក៏បារម្ភមិនតិចដែរ។

កំពុងមើលថែកូនប្រសារ ស្រាប់តែទូរសព្ទលោតសារមក។ មិនដឹងជាមានរឿងសំខាន់អីអត់ ម្ដាយចិត្រ ក៏បើកមើល។ គាត់ឡើងភ្ញាក់ព្រើត ពេលដឹងថា នេះគឺជាសារប្រាក់ខែរបស់លីន ហើយលីនមានប្រាក់ខែខ្ពស់ជាងចិត្របន្តិចទៅទៀត ហើយនាងគឺជាមេគណនេយ្យម្នាក់ តែដោយសារតែមិនចូលចិត្តធ្វើខ្លួន ទើបទៅជាបែបនេះ។ តែអ្វីដែលភ្ញាក់ផ្អើលខ្លាំងនោះគឺសៀវភៅពិនិត្យជំងឺខាងក្នុងទៅវិញទេ។

ក្រដាសនៅក្នុងសៀវភៅបង្ហាញថា ចិត្រគ្មានមេជីវិត មិនអាចមានកូនបាន ហើយអ្នកទាំង២បានទៅព្យាបាល ក៏ដូចជាប្រើថ្នាំអស់លុយជាច្រើនកន្លែង។ ម្ដាយ ចិត្រ ស្ទើរឈរមិននឹង។ តាមការពិត លីនដឹងពីមុនមកម្ល៉េះថា ចិត្រ គ្មានមេជីវិតតែនៅតែស្រលាញ់គ្នា ហើយសង្ឃឹមថាអាចព្យាបាលបាន។ គាត់មិននឹកស្មានថា លីន ស្រលាញ់កូនខ្លួនដល់ថ្នាក់នេះ ហើយបានធ្វើអាក្រក់ដាក់លីនរហូតមក។ គាត់ស្ដាយក្រោយខ្លាំងណាស់ ហើយសង្ឃឹមថា ការវះកាត់របស់លីន នឹងទទួលបានជោគជ័យ៕

ចុចអាន៖ជីវិតនារីម្នាក់ផ្លាស់ប្ដូរយ៉ាងខ្លាំង ក្រោយធ្វើអត្តឃាតខ្លួនឯង២ដងមិនបានសម្រេច

ប្រភព៖ Eva អត្ថបទ៖Caramel