៤ យ៉ាងបង្កឲ្យគូស្នេហ៍ភាគច្រើនរកាំកូសនឹងគ្នា រហូតឈានដល់ការចែកផ្លូវ

2019-02-08 07:00:00
ចំនួនមតិ 0 | ចំនួនចែករំលែក 0

ការទាស់ទែងគ្នាមានហេតុផលជាច្រើន ហើយពេលខ្លះវាក៏បណ្ដាលឲ្យគូស្នេហ៍ជាច្រើនបែកបាក់គ្នាដែរ។ ខាងក្រោមនេះជាហេតុផលមួយចំនួនដែលធ្វើឲ្យគូសង្សារភាគច្រើនរកាំរកូសជាមួយគ្នា ហើយឈានដល់ការចែកផ្លូវគ្នាដើររៀងខ្លួនទៀតផង៖

១. ចង់បានស្នេហាល្អឥតខ្ចោះ

រំពឹងថាស្នេហាខ្លួន Perfect តែតថភាពពិតមិនដូចបំណង ក៏ចាប់ផ្ដើមមានអារម្មណ៍ខកចិត្ត អន់ចិត្តនឹងដៃគូម្ខាងៗ។ នេះប្រហែលជាជំរុញមកពីប្រលោមលោក រឿងភាគ កុនដែលគេបង្ហាញនូវចរិតតួឯកល្អៗ ដែលមិនអាចមាននៅខាងក្រៅ ដូច្នេះហើយនេះជាហេតុផលមួយដែលធ្វើឲ្យគូខ្លះបែកគ្នា ដោយសារទាមទារស្នេហាពីដៃគូផ្អែមល្ហែម និងល្អពេក ដែលគេមិនអាចផ្ដល់ឲ្យបាន។

២. គ្មានភាពនឹងធឹង លេងសើចច្រើនពេក

វាអាចដោយសារវ័យ ឬជាចរិតធម្មជាតិរបស់មនុស្សម្នាក់។ ពេលខ្លះដោយសារវ័យក្មេងពេក ភាពច្បាស់លាស់នឹងខ្លួនឯងជាមួយស្នេហាមិនសូវជាពេញលេញ ដូច្នេះទើបជាកត្តាមួយដែលជំរុញឲ្យគូស្នេហ៍បែកគ្នា។ មួយវិញទៀតដោយសារតែចរិតចូលចិត្តឡេះឡោះ រញ៉េរញ៉ៃ ទើបធ្វើឲ្យចំណងស្នេហ៍មិនសូវរឹងមាំ។

៣. ឈ្លានពានសេរីភាពគេពេក

នៅពេលបានអ្នកណាម្នាក់ជាសង្សារអ្នកតែងមានអារម្មណ៍ថាគេជារបស់អ្នក ហើយអ្នកមានសិទ្ធិទៅលើគេ តែការពិតអ្នកគ្មានសិទ្ធិអ្វីទៅលើគ្នានោះទេ។ លើសពីនេះការឈ្លានពាន និងបិទសេរីភាពម្នាក់ៗពេក ក៏ជាកត្តាធ្វើឲ្យមានភាពល្អកកករជាមួយគ្នាបានដែរ។ រក្សាគម្លាតឲ្យបានល្អពីគ្នាបំផុតដើម្បីកុំឲ្យម្នាក់ណាមានអារម្មណ៍ថាមានសម្ពាធ។

៤. គិតតែអារម្មណ៍ខ្លួនឯង

គូសង្សារមិនអាចគិតតែអារម្មណ៍ម្ខាងៗឡើយ គឺត្រូវរៀនសម្រប រៀនយល់ពីគ្នាទើបអាចចុះសម្រុងគ្នាបាន។ បើក្នុងទំនាក់ទំនងស្នេហាមានភាគីណាមានគំនិតគិតតែអារម្មណ៍ខ្លួនឯងនោះ នឹងមិនមានសេចក្ដីសុខឡើយ។ ការគិតតែខ្លួនឯង អាត្មានិយមពេកក៏ជាហេតុផលដែលធ្វើឲ្យគូស្នេហ៍ឆាប់បែកបាក់ដែរ៕