៥យ៉ាងដែលមនុស្សស្រីគួររៀនសម្របខ្លួនជាមួយមនុស្សប្រុសខ្លះទើបល្អ

2019-02-07 09:31:54
ចំនួនមតិ 0 | ចំនួនចែករំលែក 0

រឿងគ្រប់យ៉ាងដែលអាចទៅមុខយ៉ាងរលូននោះ ទាល់តែសហការគ្នា យល់យោគគ្នាមិនមែនទៅតែម្ខាងៗនោះទេ ជាពិសេសសម្រាប់ស្នេហាមនុស្សពីរនាក់ក៏ដូចគ្នា។ ភាគច្រើនមនុស្សស្រីគឺត្រូវបានគេគិតថាពិបាកនឹងផ្គាប់ចិត្តបន្តិច ហើយយល់តែពីខ្លួនឯង មិនសូវជាបានស្វែងយល់ពីមនុស្សប្រុសវិញទេ។ យ៉ាងណាមិញដើម្បីឲ្យក្ដីស្រឡាញ់អ្នកមានភាពល្អប្រសើរទាំងអស់គ្នា មនុស្សស្រីគួររៀនសម្របខ្លួនជាមួយមនុស្សប្រុស ៥យ៉ាងនេះទៅ៖

១. មានហេតុផល

ពេលខ្លះមនុស្សស្រីអត់មានរឿងអីសោះ ក៏អាចរករឿងបានដែរ ហើយងរង៉ក់គ្មានមូលហេតុ រួចក៏ចង់ឲ្យខាងប្រុសមកអង្គុយលួង។ ចរិតបែបនេះមានច្រើនពេកគឺមិនល្អនោះទេ ដូច្នេះអ្នកគួរកាត់បន្ថយហើយរៀបសម្របខ្លួនឲ្យក្លាយជាមនុស្សស្រីនឹងធឹងបន្តិច ដោយមិនប្រើចរិតនេះជ្រុលហួសហេតុពេក។

២. សម្របខ្លួននឹងពេលវេលា

ដោយសារមិនសូវមានពេលច្រើនជាមួយគ្នា មនុស្សស្រីភាគច្រើនទៅហើយដែលឈ្លោះគ្នាព្រោះរឿងនេះ។ អ្នកអាចនឹងរៀនយោគយល់ពីពេលវេលាគាត់ខ្លះក៏ល្អ កុំព្យាយាមទាមទារខ្លាំងរហូតគាត់មិនអាចចែកឲ្យអ្នកបាន។ ពេលខ្លះគាត់ពិតជាមានការរវល់មែន ហើយមួយទៀតរវល់ដែលជាលេសគឺខុសគ្នាជាមួយមនុស្សប្រុសដែលរវល់ពិតប្រាកដ។

៣. សេរីភាព

អ្នកក៏គួរតែផ្ដល់សេរីភាពឲ្យគាត់បានទូលាយដែរ ព្រោះមនុស្សប្រុសគឺមិនអាចគ្មានសេរីភាពបានទេ គ្រាន់តែថាគេចេះគិតថាអ្វីគួរ ឬមិនគួរហើយ។ ការហាមប្រាមច្រើនក៏មិនសូវជាល្អដែរ ដូច្នេះអ្នកក៏គួរសម្របខ្លួនជាមួយនឹងសេរីភាពផ្ទាល់ខ្លួនរបស់ភាគីម្ខាងៗដែរ។

៤. ប្រចណ្ឌ

ឲ្យតែស្រឡាញ់គឺដឹងតែប្រចណ្ឌហើយ តែកុំឲ្យលើសលប់ពេក ព្រោះវាអាចកម្ទេចស្នេហាអ្នកឲ្យរលត់រលាយបាន។ កាត់បន្ថយការប្រចណ្ឌខុសរឿង គ្មានក្បាលគ្មានកន្ទុយនោះទើបល្អសម្រាប់គូស្នេហ៍។ បើគ្រាន់តែគេនិយាយគ្នាក្នុងន័យធម្មតា ឬមានការងាររឿងជជែកគ្នាហើយអ្នកក៏ប្រកាន់ដែរ វាពិតជាចង្អៀតពេកហើយ។

៥. ចេះទទួលកំហុសរបស់ខ្លួន

មនុស្សស្រីគឺចង់តែឈ្នះទោះពេលខ្លះខ្លួនជាអ្នកខុសក៏ដោយ។ កុំចេះតែទម្លាប់ខ្លួនបែបនេះពេកព្រោះវាក៏មិនល្អដែរ។ រឿងខ្លះបើយើងជាអ្នកខុសមែន មិនគួរនៅតែរឹងចង់ឲ្យគេមកលួងមកសុំទោសទេ គួរតែចេះសម្របខ្លួនទទួលពីកំហុសខ្លួនឯង។