ទង្វើ១០យ៉ាង ឪពុកម្ដាយច្រើនតែស្ដាយក្រោយ ពេលចាស់ទៅ

2019-01-15 03:58:31
ចំនួនមតិ 0 | ចំនួនចែករំលែក 0

នាមជាឪពុកម្ដាយតែងចង់ឃើញកូនល្អ កូនមានជោគជ័យ។ ប៉ុន្តែដោយសារតែការតាំងខ្ពស់បែបនេះ ទើបពេលខ្លះលោកធ្វើទង្វើដែលប៉ះពាល់ផ្លូវចិត្តដោយមិនដឹងខ្លួន រហូតទាល់តែអាយុកាន់តែចាស់ទើបដឹងស្ដាយក្រោយក៏ហួសពេល។ ដូចទង្វើទាំង១០យ៉ាងខាងក្រោមនេះដែលឪពុកម្ដាយភាគច្រើនបាន និងកំពុងធ្វើ ហើយបើសិនធ្លាប់ធ្វើមែន ក៏គួរបញ្ឈប់ ដើម្បីជៀសវាងការស្ដាយក្រោយនៅពេលខាងមុខ។

១. មិនសូវមានទំនាក់ទំនងជាមួយកូន

កូនតូចអាចលូតលាស់បានល្អ ដោយសារមានការប្រាស្រ័យទាក់ទងជាមួយមនុស្សធំ ហើយឪពុកម្ដាយគឺជាមនុស្សសំខាន់ក្នុងការរួមចំណែកឱ្យកូនលូតលាស់បានល្អនេះ។ ផ្ទុយទៅវិញ ដោយសាររវល់នឹងការងារផង ប៉ាម៉ាក់ភាគច្រើនតែងធ្វើការបណ្ដើរ ឱ្យកូនលេងនៅជិតខ្លួនបណ្ដើរ។

តែបើអ្នកធ្វើរឿងនេះឱ្យក្លាយទៅជាទម្លាប់ កូនអ្នកនឹងក្លាយជាមនុស្សឯកោ ហើយអ្នកអាចឃើញថា កូនអ្នកធំធាត់ឡើងដោយខ្លួនពួកគេ ចំណែកទំនាក់ទំនងជាមួយប៉ាម៉ាក់ក៏អាចនឹងកាត់បន្ថយទៅៗ។

ចុចអាន៖ កូនៗរៀនពូកែដោយសារមានម្ដាយធ្វើរឿង ៦ យ៉ាងនេះ

២. មិនសូវបានឱបកូនឱ្យបានគ្រប់គ្រាន់

អ្នកវិទ្យាសាស្ត្របានណែនាំថា ការឱបមានសារសំខាន់ណាស់ក្នុងទាំងសម្រាប់ផ្នែកផ្លូវកាយនិងផ្លូវចិត្ត។ ក្រៅពីផ្ដល់ភាពកក់ក្ដៅ ការឱបអាចផ្ដល់ភាពស្និទ្ធស្នាលដល់អ្នកទាំងពីរ។ គ្រប់គ្នាសុទ្ធតែដឹងពីគុណសម្បត្តិទាំងនេះ តែប៉ាម៉ាក់ភាគច្រើនមិនសូវបានប្រើពេលវេលាឱបថើបកូនឱ្យបានច្រើននោះទេ ដោយយកហេតុផលបែបនេះ បែបនោះ ឬក៏ដោយសារតែពាក្យសម្ដីរបស់ចាស់បុរាណចេះតែនិយាយតៗគ្នាថា "កុំឱបថ្នាក់ថ្នមកូនពេក ប្រយ័ត្នវាធ្លាប់ វាបានចិត្ត...”។

បើអ្នកពិតជាមិនបានឱប ថ្នាក់ថ្នមកូនឱ្យបានក្នុងពេលនេះ ពេលធំឡើង ពួកគេក៏នឹងមិនឱ្យអ្នកឱបទៀតដែរ។ បែបនេះកុំឆ្ងល់ថា ហេតុអីកូនមិនស្និទ្ធស្នាលជាមួយអ្នក?

៣. មិនសូវបានថតរូប ឬវីដេអូជាមួយកូន

ឪពុកម្ដាយខ្លះរវល់តែការងារពេក មិនសូវបានថតរូបជាមួយកូនតូចៗឡើយ។ ភាគច្រើនបើទោះជាថត ក៏ថតតែរូបកូនម្នាក់ឯង ឬជាមួយអ្នកផ្សេង គ្មានរូបខ្លួនឯងពរ ឬថើបកូនសោះ ហើយនេះក៏គ្មានអីអាក្រក់ជាងគ្មានរូបថតជុំគ្នាដែរ ព្រោះពេលចាស់ទៅ អ្នកក៏មិនអាចហៅអតីតកាលត្រឡប់មកវិញបានដែរ មានតែអង្គុយមើលរូបថតចាស់ៗ ហើយញញឹមជុំគ្នា។ ហោចណាស់ក៏ពេលនឹកកូន ឬកូននៅឆ្ងាយអាចទាញអាល់ប៊ុមរូបថត ឬចាក់វីដេអូមើល ប៉ុន្តែបើគ្មានសូម្បីតែរូបថតទៀត ពិតជាស្រងេះស្រងោចខ្លាំងណាស់។

៤. មិនចំណាយពេលលេងល្បែងដែលមានការច្នៃប្រឌិតជាមួយកូន

មិនមែនបានន័យថា ការលេងល្បែងដែលប្រើខួរក្បាលគិតច្រើន ដឹងតែនាំឱ្យកូនក្លាយជាមនុស្សអស្ចារ្យទាំងអស់នោះទេ។ ការពិតការលេងល្បែងដែលប្រើការគិត ឬចេះច្នៃប្រឌិត អាចជួយឱ្យកូនៗចេះគិតគូរវែងឆ្ងាយ អត់ធ្មត់ និងអាចច្នៃរបស់ដែលនៅនឹងមុខទៅជាអ្វីផ្សេងដែលអ្នកគិតស្មានមិនដល់។ វាពិតជាសំខាន់ណាស់ បើអ្នកអាចបង្រៀនពួកគេឱ្យចេះធ្វើរឿងទាំងនេះ ប៉ុន្តែមិនសូវមានឪពុកម្ដាយណាគិតដល់រឿងនេះឡើយ ដោយសារតែកត្តាផ្សេងៗដូចជា ពេលវេលាមិនសូវទំនេរជាដើម។

ម្យ៉ាងទៀត ការលេងបែបនេះអាចឱ្យអ្នកដឹងពីសមត្ថភាព និងទេពកោសល្យកូនបានច្បាស់ងាយស្រួលក្នុងការតម្រង់ទិសដល់ពួកគេ។ ហេតុនេះហើយទើបមានឪពុកម្ដាយជាច្រើនដែលមិនបានដឹងពីទេពកោសល្យរបស់កូន ហើយជំរុញកូនទៅរកអ្វីដែលពួកគេមិនចង់ធ្វើ នាំឱ្យប៉ះពាល់ផ្លូវចិត្តកូន។

៥. តឹងរឹងដាក់កូនពេក

ពាក្យប្រៀនប្រដៅរបស់ឪពុកម្ដាយសុទ្ធតែចង់ឃើញកូនល្អ តែការប្រដៅមួយចំនួនហាក់ដូចជាតឹងរឹងដាក់កូនពេក រហូតដល់ក្លាយទៅជាសម្ពាធ នាំឱ្យកូនទៅជាបាក់ទឹកចិត្ត ខ្លបខ្លាចជ្រុល ឬចេះកុហកដោយសារតែខ្លាចការដាក់ទណ្ឌកម្ម ឬស្ដីបន្ទោសពីប៉ាម៉ាក់។

ចុចអាន៖ ទម្លាប់១០ប្រការរបស់ឪពុកម្ដាយ ដែលអាចបំផ្លាញអនាគតកូនទាំងស្រុង

៦. ធូររលុងចំពោះកូនពេក

ពាក្យថា "ពេក" មិនដែលល្អទេ។ បើអ្នកគិតថាតឹងរឹងចំពោះកូនពេកមិនល្អ ហើយងាកមកធូររលុងជាមួយពួកគេពេក ចង់ធ្វើអ្វីក៏បាន ចង់សុំអ្វីក៏បាន មិនដែលឱ្យកូនខ្វះខាត ចេះគិតគូរ អាងតែមានម៉ាក់ប៉ាជួយជ្រោមជ្រែង ពេលធំឡើងពួកគេមិនអាចធ្វើអ្វីដោយខ្លួនឯង មិនចេះស្គាល់ចាស់ទុំ មិនចេះសុំទោស ឬអរគុណអ្វីឡើយ។

ដូច្នេះគួរចេះថ្លឹងថ្លែងលើទង្វើដែលត្រូវធ្វើចំពោះកូន។ បើគេធ្វើល្អក៏សរសើរ បើធ្វើខុសក៏ដាក់ទោស តែគួរបង្ហាញគេពីគុណវិបត្តិនៃទង្វើរបស់គេមុន ជាជាងខុសម្ដង ដាក់ទោសភ្លាម ដែលនាំឱ្យពួកគេលែងហ៊ានធ្វើអ្វីទាំងអស់។

៧. មិនដែលទុកពាក្យសម្តីកូនជាសំខាន់

ម្ដាយឪពុកភាគច្រើនតែងគិតថា ពាក្យសម្ដីរបស់ខ្លួនតែងតែត្រឹមត្រូវ ហើយមិនសូវខ្វាយខ្វល់ពីអារម្មណ៍ និងពាក្យសម្ដីរបស់កូនៗ។ អ្នកខ្លះតែងបោះពាក្យសម្ដីថា "កូនឯងក្មេងសោះចេះដឹងអី?" ឬ "មនុស្សចាស់ដឹងច្រើនជាង" ធ្វើឱ្យកូនបាក់ទឹកចិត្ត លែងចង់និយាយអ្វីបន្តទៀត។ ការធ្វើបែបនេះយូរៗទៅ កូនក៏លែងហ៊ាននិយាយរឿងក្នុងចិត្តប្រាប់ប៉ាម៉ាក់ បែរជាទៅរកអ្នកដទៃដូចជា មិត្តភ័ក្ដិ អ្នករាប់អានខាងក្រៅទៅវិញ។ ហេតុនេះទើបប៉ាម៉ាក់មួយចំនួនចេះតែឆ្ងល់ ហេតុអីពេលកូនមានបញ្ហាមិនដែលមកពិគ្រោះជាមួយខ្លួនសោះ នេះក៏ព្រោះតែហេតុផលខាងលើនេះហើយ។

៨. មិនមានពេលនាំកូនដើរលេងសប្បាយខ្លះ

កត្តាផ្លូវអារម្មណ៍ក៏ដើរតួសំខាន់ណាស់ដែរក្នុងការលូតលាស់របស់កូនៗ។ ឪម្ដាយគួរដឹងថា បើកូនៗអាចធំធាត់ក្នុងបរិយាកាសល្អ មានការថ្នាក់ថ្នមកក់ក្ដៅ និងបានជួបបទពិសោធន៍ថ្មីៗច្រើននោះ ពួកគេនឹងអាចនឹងធំឡើងក្លាយជាមនុស្សរឹងមាំ មានប្រាជ្ញាមោះមុត ឯការសម្រេចចិត្តក៏បានជ្រៅជ្រះ។

៩. ចូលចិត្តស្ដាប់ពាក្យសម្ដីអ្នកដទៃមកលើកូនខ្លួនឯង

ជារឿងធម្មតាទៅហើយដែលអ្នកអាចនឹងស្ដាប់ឮពាក្យសម្ដីខុសៗគ្នាពីអ្នកជុំវិញខ្លួនវាយតម្លៃទៅលើកូនៗរបស់អ្នក។ ប៉ុន្តែត្រូវច្បាស់ថា អ្នកស្គាល់កូនខ្លួនឯងច្បាស់ មិនចេះតែស្ដាប់គេនិយាយដោយគ្មានមូលដ្ឋានត្រឹមត្រូវ។ ម្យ៉ាងវិញទៀត ការយកកូនខ្លួនឯងទៅប្រដូចជាមួយកូនអ្នកដទៃក៏ជារឿងដែលធ្វើឱ្យកូនមិនសប្បាយ និងក្លាយជាសម្ពាធសម្រាប់ពួកគេដែរ។

យូរៗទៅ ពួកគេនឹងលែងជាខ្លួនពួកគេ តែបែរជាគិតថាខ្លួនឯងមិនល្អដូចអ្នកផ្សេង ឬភ្លេចគិតពីគោលដៅដែលខ្លួនចង់បានពិតប្រាកដដោយសារតែពាក្យអស់ទាំងនេះ។

១០. ពេលវេលាសំខាន់ៗ មិនដែលមានមុខនៅក្បែរកូន

កូនតូចៗចង់បានភាពកក់ក្ដៅ និងសើចសប្បាយជាមួយឪពុកម្ដាយ។ ជាពិសេសមានកម្មវិធី ឬឱកាសពិសេសណាមួយ កូនៗចង់នៅក្បែរប៉ាម៉ាក់ជាងអ្នកណាទាំងអស់។ ដូច្នេះគួរតែឆ្លៀតពេលដើម្បីកូនឱ្យបានច្រើន និងបង្ហាញឱ្យពួកគេឃើញថា ប៉ាម៉ាក់របស់គេមិនដែលទុកគេចោល ហើយគេតែងជារបស់មានតម្លៃសម្រាប់ប៉ាម៉ាក់ជានិច្ច៕

ប្រភព៖ Brightside ប្រែសម្រួល៖ សរ សុគន្ធី